Düşənbənin vizit kartına çevrilən “Koxi Navruz” sarayı VİDEO
Düşənbə, 3 iyun, AZƏRTAC
Tacikistan paytaxtının mərkəzində Düşənbənin ən tanınan və gözəl binalarından biri olan “Koxi Navruz” sarayı ucalır.
AZƏRTAC xəbər verir ki, bu sarayın tarixçəsi təvazökar bir planla başlayıb: köhnə çayxananın yerində milli üslubda yenisini tikmək nəzərdə tutulub. Lakin dizayn prosesi zamanı miqyas böyüyüb və 2014-cü ildə şəhər möhtəşəm saraya sahib olub.
Kompleks təxminən 40 min kvadratmetr sahəni əhatə edir və beşmərtəbəlidir. O, milli memarlıq qanunlarına uyğun olaraq inşa edilib. Tacikistanın hər yerindən təxminən dörd min sənətkar bu şah əsər üzərində işləyib. Geniş zallar, açıq yay terrasları və fəvvarələr saraya xüsusi cazibə qatır.
Sarayın on iki zalı tacik xalq sənətkarlığı ənənələri ilə bəzədilib, suvaq, mozaika, vitraj, ağac və daş oymaları, güzgü dekorasiyası diqqəti cəlb edir. Hər bir zal özünəməxsus üslubda bəzədilib və ənənəvi dekorativ sənətin fərqli bir qolunu nümayiş etdirir.
Saray ilk dəfə 2014-cü ilin sentyabr ayında Şanxay Əməkdaşlıq Təşkilatının Zirvə toplantısının iştirakçılarını qəbul edib, qapılarını hörmətli qonaqlara açıb. 2019-cu ildə isə “Koxi Navruz” üzv dövlətlərin hər birinin abidəsinin daxil edildiyi turizm layihəsinin bir hissəsi olaraq ŞƏT-in səkkiz möcüzəsi siyahısına daxil edilib.
Bu gün “Koxi Navruz” təkcə milli memarlıq abidəsi deyil, həm də hörmətli qonaqların görüşlərinə və beynəlxalq forumlara ev sahibliyi edən məkandır. Burada tacik xalqının qədim sənətkarlıq nümunələri müasir diplomatiya ilə vəhdət təşkil edir və sarayın özü Düşənbənin vizit kartına çevrilib.
Bölmənin digər xəbərləri
