Beynəlxalq Türk Akademiyası elmi layihələrini təqdim edib VİDEO
İstanbul, 5 iyun, AZƏRTAC
İyunun 5-də Türkiyənin İstanbul şəhərində İslam Tarixi, İncəsənəti və Mədəniyyəti Araşdırma Mərkəzində (IRCICA) Beynəlxalq Türk Akademiyasının təşkil etdiyi elmi-mədəni tədbir keçirilib.
AZƏRTAC xəbər verir ki, tədbirdə akademiyanın prezidenti, akademik Şahin Mustafayev, IRCICA-nın baş direktoru, professor Mahmud Erol Kılıç, Qazaxıstanın Türkiyədəki baş konsulu Amankul Nuridin, Türk Dövlətləri Təşkilatı yanında Türkiyənin daimi nümayəndəsi, səfir Ufuk Ekici, Macarıstanın diplomatik missiyasının nümayəndəsi Peter Szanto, eləcə də Türkiyənin elmi-tədqiqat və akademik ictimaiyyətinin nümayəndələri, alimlər və tədqiqatçılar iştirak ediblər.
Mərasimdə çıxış edən Şahin Mustafayev Beynəlxalq Türk Akademiyasının fəaliyyətinin türk xalqlarının ortaq tarixinin, dilinin, ədəbiyyatının və mədəniyyətinin öyrənilməsini hədəflədiyini vurğulayıb.
O, qeyd edib ki, akademiya tarix, arxeologiya, etnoqrafiya, dilçilik, beynəlxalq münasibətlər və rəqəmsal humanitar elmlər sahələrində onlarla beynəlxalq layihə həyata keçirərək Türk dünyasında elmi əməkdaşlığın möhkəmlənməsinə töhfə verir.
“Türk dünyasının zəngin irsi İslam sivilizasiyasının ayrılmaz tərkib hissəsidir. Türkologiya və islamşünaslıq sahələrində aparılan tədqiqatlar bir-birini tamamlayır və beynəlxalq elmi əməkdaşlıq üçün geniş imkanlar açır”, – deyə akademiyanın rəhbəri bildirib.
Professor Mahmud Erol Kılıç çıxışında ümumi mədəni irsin qorunmasına və öyrənilməsinə yönəlmiş elmi araşdırmaların əhəmiyyətini vurğulayaraq Beynəlxalq Türk Akademiyası ilə əməkdaşlığın gələcəkdə daha da inkişaf etdirilməsində maraqlı olduqlarını ifadə edib.
Tədbir çərçivəsində akademiyanın ekspertləri Aynur Maemerova, Nurdin Useyev və Dinməhəmməd Ametbek təmsil etdikləri qurumun elmi layihələrini təqdim edib, hazırda aparılan tədqiqatlar barədə məlumat veriblər.
Proqram çərçivəsində Beynəlxalq Türk Akademiyasının elmi nəşrlərindən ibarət sərgi təşkil olunub.
Sərgiyə təqdim edilən əsərlər arasında 1926-cı il Bakı Türkoloji Qurultayının 131 nümayəndəsi haqqında məlumatları özündə əks etdirən və 6 türk dilində nəşr olunmuş “1926-cı il Bakı Türkoloji Qurultayının Albomu”, həmçinin unikal arxiv materialları əsasında hazırlanmış, türk və rus dillərində nəşr edilmiş “1926-cı il Bakı Türkoloji Qurultayının arxiv sənədləri” kitabı xüsusi yer tutub.
Bölmənin digər xəbərləri
