Bakı, 17 yanvar (AZƏRTAC). Bu ilin mayında Moskvada keçiriləcək “Eurovision-2009” mahnı müsabiqəsində Azərbaycanı “Yeni ulduz-4” yarışmasının iştirakçısı olmuş 19 yaşlı Aysel Teymurzadə təmsil edəcəkdir.

Bu münasibətlə keçirilən mətbuat konfransında “Eurovision-2009” yarışmasının Azərbaycan nümayəndə heyətinin mətbuat katibi Leyla Əliyeva bildirmişdir ki, təmsilçi İTV-nin baş direktoru İsmayıl Ömərov, Bakı Musiqi Akademiyasının rektoru Fərhad Bədəlbəyli, Azərbaycan Mədəniyyətinin Dostları Fondunun icraçı direktoru İbrahim Quliyev, Beynəlxalq Musiqi Şurasının Azərbaycan Milli Musiqi Komitəsinin prezidenti Lalə Kazımova, Azərbaycan Dövlət Filarmoniyasının direktoru Murad Adıgözəlzadə, Mədəniyyət və Turizm Nazirliyinin sektor müdiri Mənzər Nurəliyeva və Gənclər və İdman Nazirliyinin nümayəndəsi Fərhad Hacıyevdən ibarət 7 nəfərlik münsiflər heyəti tərəfindən 40 iddiaçı arasından seçilmişdir.

Milli seçimlərə əsasən, televiziyalarda keçirilmiş müxtəlif mahnı müsabiqələrinin - “Yeni ulduz”, “Azəri star”, “Sing Your Song”un iştirakçıları qatılmışdır. İctimai TV-nin böyük zalında keçirilən seçim turlarına gələn sənətçilərin ifaları lentə alınmışdır. Münsiflər heyəti həmin videoyazını dönə-dönə izləyib, diskussiyalar aparmışdır. Heyətin son toplantısında qəbul edilən yekdil qərara əsasən, 54-cü “Eurovision-2009” mahnı müsabiqəsində Azərbaycan təmsilçisi olaraq Aysel Teymurzadə seçilmişdir.

L.Əliyeva bildirmişdir ki, münsiflər heyətinin rəyinə əsasən Aysel Teymurzadə “Eurovision” səhnəsində çıxış etmək üçün bütün keyfiyyətlərə malikdir: “Söhbət xarici görünüş, xarizma, rəqs, səs imkanları, dünyagörüşü və xarici dil bilməkdən gedir. Aysel kastinqlər zamanı bir neçə kompozisiya ifa etmişdir. Bura həm dünya, həm də Azərbaycan mahnıları daxil idi. Hazırda münsiflər heyətinin qarşısında duran əsas məsələ “Eurovision” səhnəsində Azərbaycanı təmsil edəcək ifaçıya uyğun və ölkəmizi layiqincə təmsil edəcək mahnının seçilməsidir. Odur ki, təşkilat komitəsi həm yerli, həm də xarici bəstəkarlara üz tutub yeni, orijinal, məhz “Eurovision” üçün yazılmış mahnı qəbulunu rəsmən elan edir. Mahnı müsabiqənin formatına uyğun, yaddaqalan və orijinal olmalıdır”.

L.Əliyeva demişdir ki, mahnılar fevralın 1-dək İTV-yə təqdim olunmalı, Azərbaycanı müsabiqədə təmsil edəcək ifaçı və mahnı martın ortalarında Avropa Yayım Birliyinə bildirilməlidir. Ötən il olduğu kimi, bu il də Azərbaycanın “Eurovision”da uğurlu çıxışını təmin etmək üçün bu sahədə böyük təcrübəsi olan Ukraynanın “Euro Media” piar şirkətinə müraciət edilmişdir. Müsabiqədə Azərbaycan təmsilçisinin hansı nömrə altında çıxış edəcəyi yanvarın 30-da keçiriləcək püşkatma zamanı məlum olacaqdır.

Azərbaycan təmsilçisi Aysel Teymurzadə özünə çox güvəndiyini bəyan etmişdir: “Azərbaycanın bayrağını göylərə qaldırmaq üçün əlimdən gələni əsirgəməyəcəyəm. Birinci olacağıma əminəm. Çünki bu gücü özümdə hiss edirəm. Artıq məlum olan rəqiblərimi də tanıyıram və hesab edirəm ki, hamısından güclüyəm”. Bir il ABŞ-da yaşadığını söyləyən A.Teymurzadə, bu ölkədə keçirilən beynəlxalq müsabiqələrdə uğurla çıxış etdiyini və müsabiqələrin birində qızıl medal qazandığını da vurğulamışdır.

Xatıradaq ki, Moskvada “Eurovision-2009” yarışmasının birinci yarımfinalı mayın 12-də, ikincisi həmin ayın 14-də, final mərhələsi isə mayın 16-da keçiriləcəkdir. Ümumilikdə builki müsabiqədə 43 ölkə təmsil olunacaqdır.