Vasif Qurbanzadə: “Türk Dünyası Həftəsi” türk dövlətləri arasında elmi və mədəni həmrəyliyi gücləndirəcək VİDEO
Bakı, 3 iyul, AZƏRTAC
Bakıda Birinci Türkoloji Qurultayın 100 illiyinə həsr olunmuş “Türk Dünyası Həftəsi” təşkil olunub. Elm və mədəniyyətlə bağlı silsilə tədbirlərdən ibarət həftə Azərbaycan Respublikasının Prezidenti İlham Əliyevin “Birinci Türkoloji Qurultayın 100 illik yubileyinin keçirilməsi haqqında” 22 oktyabr 2025-ci il tarixli Sərəncamına uyğun olaraq təşkil edilib.
Həftə çərçivəsində dünyanın müxtəlif ölkələrindən olan türkoloq-alimlər və mədəniyyət xadimləri Azərbaycana gəliblər. Qonaqların bir araya gələrək müasir çağırışları, elmi araşdırmaları və ortaq mədəniyyət layihələrini müzakirə etməsi türk dövlətləri arasında həmrəylik və əməkdaşlığın davamlı olduğunu göstərir.
Bunu AZƏRTAC-a açıqlamasında Mədəniyyət Nazirliyinin Azərbaycan dili və ədəbiyyat siyasəti şöbəsinin müdiri Vasif Qurbanzadə deyib.
O bildirib ki, 1926-cı ildə Bakıda keçirilən Birinci Türkoloji Qurultay Türk dünyasının elmi və mədəni həyatında mühüm dönüş nöqtəsi olmaqla yanaşı, yeni elmi ənənənin əsasını qoyub. Bu gün, həmin tarixi qurultayın 100 illiyi ərəfəsində, Türk dünyasının görkəmli elm və fikir adamlarının xatirəsi dərin ehtiramla yad edilir, onların zəngin elmi və mənəvi irsinin qorunması, öyrənilməsi və gələcək nəsillərə çatdırılması istiqamətində geniş müzakirələr aparılır.
Vasif Qurbanzadə vurğulayıb ki, “Türk Dünyası Həftəsi” çərçivəsində iştirakçılar üçün Qarabağa səfər də təşkil olunub. Səfər zamanı qonaqlar əvvəlcə Ağdam şəhərində yerləşən “İmarət” Kompleksini ziyarət ediblər. Daha sonra onlar Azərbaycan mədəniyyətinin və memarlığının incilərindən hesab olunan Şuşa şəhəri ilə tanış olublar. Qonaqlara şəhərin tarixi, memarlıq abidələri və zəngin mədəni irsi barədə ətraflı məlumat verilib.
O, proqram çərçivəsində Qarabağ Universitetində “Türk Dünyası Həftəsi”nin yekun elmi panelinin keçirildiyini deyib: “Panel yüksək elmi səviyyədə və məhsuldar müzakirələr şəraitində olub. Həm məruzələr, həm də auditoriya tərəfindən səsləndirilən suallar Türk dünyasının müasir çağırışları, ortaq elmi əməkdaşlığın perspektivləri və mədəni inteqrasiyanın inkişafı baxımından aktual mövzuları əhatə edib. Daha sonra qonaqlar üçün Xankəndi şəhərinə tanışlıq turu təşkil olunub. Tur zamanı onlara şəhərin görməli məkanları, tarixi və inkişaf perspektivləri barədə məlumat verilib”.
Onun sözlərinə görə, Türk dünyasının birliyi və həmrəyliyi minilliklərdən gələn ortaq tarixə, dilə, mədəniyyətə və mənəvi dəyərlərə söykənir: “Bu birlik qarşılıqlı etimad və əməkdaşlıq əsasında gələcəkdə daha da möhkəmlənəcək, ortaq elmi, mədəni və humanitar layihələrin həyata keçirilməsinə yeni imkanlar yaradacaq”.
Vasif Qurbanzadə bildirib ki, “Türk Dünyası Həftəsi” çərçivəsində təşkil olunan tədbirlər “Azərbaycan Mədəniyyəti – 2040” Konsepsiyasında əksini tapan milli-mənəvi dəyərlərin qorunması, mədəni irsin təbliği və mədəniyyətimizin beynəlxalq əlaqələrinin genişləndirilməsi hədəflərinə mühüm töhfə verəcək.
Bölmənin digər xəbərləri
