Tullantılardan hazırlanan 200 kiloqramlıq “cəngavər” - REPORTAJ VİDEO
Siyəzən, 24 avqust, AZƏRTAC
Siyəzənli mühəndis Cavid Yəhyayev qeyri-adi əl işləri ilə görənləri təəccübləndiməkdə davam edir.
AZƏRTAC-ın bölgə müxbiri xəbər verir ki, Cavid Yəhyayev bu dəfə tullantılardan iki metr hündürlüyündə “dəmir cəngavər” hazırlayıb.
Dörd aya başa gələn “dəmir cəngavər” üçün 200-dən çox detal istifadə olunub. İki yüz kiloqrama yaxın çəkisi olan qeyri-adi əl işi daşına bilməsi üçün bir-birindən ayrılan beş hissədən ibarətdir.
“Dəmir cəngavər”ə yaxından baxdıqda yararsız kəlbətin, mühərrik zəncirləri, sınmış çilingər alətləri, avtomobil yayları, şamlar, velosiped hissələri, kreslo altlığı və bir çox başqa detalları görmək olar.
“Neçə müddət idi beynimdə belə bir dəmir sərkərdə, cəngavər hazırlamaq ideyası var idi. Bu ilin aprel ayında işə başladım. Çox diqqət və zəhmət tələb edən iş idi. Xüsusilə dəbilqəsi çox vaxt apardı. Çünki qaynaqdan istifadə etmədim. Nəhayət dörd ayın tamamında - avqustun 22-si doğum günümdə əl işi hazır oldu. Bu “dəmir cəngavər”i özümə ad günü hədiyyəsi etdim. Bu əl işim bizim qəhrəmanlarımızı simvolizə edir”, - deyə o söyləyib.
Cavid Yəhyayev 62 illik ömrünün 30 ildən çoxunu neftçıxarma sahəsində mühəndis kimi çalışıb. Hazırda təqaüddədir. Tullantılardan əl işləri hazırlamağa isə 15 il əvvəl başlayıb.
İlk illər yararsız təkərlərdən istifadə edib. Sonra nazik dəmirli şirə qabları ilə çalışıb. İndi isə əl işləri üçün daha çox dəmir tullantılardan istifadə edir. Metalları avtomobil təmiri sexlərindən toplayır. Bundan başqa, gündəlik məişətdə işlədilən, amma indi istifadəyə yararsız olan dəmir alətlərdən də yararlanır. Daha çox heyvan, quş, böcək və sair fiqurlar düzəldir. Son əl işləri arasında hörümçək, çəyirtkə, motosikletlər, quş və balıq fiqurları var. Hazırladığı əl işlərinin bəziləri abstrakt janrdadır. Onun yararsız materiallardan hazırladığı maraqlı eksponatların sayı 150-yə çatıb.
Bundan əvvəl istedadlı mühəndisin üç ay ərzində ərsəyə gətirdiyi “dəmir maral” görənlərin marağına səbəb olmuşdu. “Dəmir maral” kəlbətin, qayçı, şiş, çarpayının tutacaqları, velosiped zəncirləri, müxtəlif disklər, eləcə də avtomobil və başqa texnikaların yararsız ehtiyat hissələrindən hazırlanmışdı.
Cavid Yəhyayevin əl işlərinin videogörüntülərini sosial şəbəkələrdə yüz minlərlə insan izləyir. Görənlər onun qeyri-adi istedadını alqışlayır, hazırladığı əl işlərini təəccüblə qarşılayırlar.
Siyəzənli mühəndisin belə əl işləri düzəltməkdə əsas məqsədi tullantıların sayını azaltmaq və onlardan istifadə etməyin mümkünlüyünü göstərməkdir.
Müxbir- Elxan Yusifli
Bölmənin digər xəbərləri
