Oğuzda fermerin sınağı uğurlu oldu - 1 hektardan 35 tondan çox çiyələk yığıldı FOTO VİDEO
Oğuz, 28 avqust, AZƏRTAC
Avqustun qızmar günləridir. Günəş altında torpaqdan yüksələn istilik insanı yorsa da, Oğuz rayonunun Bayan kəndində çiyələk sahəsində hərəkətlilik səngimir. Sıralanmış cərgələr boyunca yetişən qırmızı çiyələklər bir-bir dərilir, yeşiklərə yığılır. Bir neçə ay əvvəl bu sahədə görülən işlərin nəticəsi artıq göz önündədir – bol və keyfiyyətli məhsul.
AZƏRTAC-ın bölgə müxbiri xəbər verir ki, adətən ilin bu vaxtında, xüsusilə avqust ayında bazarlarda çiyələyə az-az rast gəlinir. Lakin Bayan kəndində vəziyyət fərqlidir. Burada fermer Elgün Umarlı bölgədə ilk dəfə geniş ərazidə çiyələk yetişdirməyi qərara alıb. Üstəlik, məhsulun becərilməsində əsasən təbii gübrələrdən istifadə olunub.
Bu, sadəcə yeni bir təsərrüfat layihəsi deyil, həm də Oğuz torpağında çiyələkçiliyin geniş miqyasda mümkün olub-olmadığını müəyyənləşdirmək məqsədi daşıyan bir sınaq idi. Aylarla davam edən zəhmət isə öz nəticəsini verib. Fermer nəinki gözlədiyi məhsulu əldə edib, hətta ilkin proqnozları üstələyən nəticəyə nail olub.
Çiyələk sahəsində işə səhər saatlarından başlanılır. Məhsulun yığılmasına əsasən Bayan kəndinin sakinləri, xüsusilə həyət-bacalarında çiyələk yetişdirərək müəyyən təcrübə qazanmış evdar qadınlar cəlb olunublar. Onlardan biri də Samirə Mikayılovadır.
“Fevral ayından işlərə başlamışıq. Demək olar ki, hər gün işdəyik. Təki belə iş çox olsun. Bizim kimi evdar qadınlar, eləcə də gənclərimiz işləsinlər. İş olarsa, kəndlər də boşalmaz”, – deyə Samirə Mikayılova bildirir.
Onun sözlərindən kənddə yaradılan yeni iş yerlərinin ailələr üçün nə qədər əhəmiyyətli olduğu da hiss olunur. Uzun müddətdən sonra daimi gəlir mənbəyi qazanan qadınlar çəkdikləri zəhmətin bəhrəsini məhsul yığımında görürlər. Təsərrüfatda işləyənlər hər iş gününün sonunda əməkhaqlarını alır və bununla ailə büdcələrinə töhfə verirlər.
Çiyələk sahəsinin ərsəyə gəlməsində aqronom Allahverdi Nurməmmədovun da böyük əməyi var. O, əkinin ilk günlərindən başlayaraq bitkinin inkişafını, torpağın vəziyyətini və aqrotexniki tədbirlərin düzgün aparılmasını diqqətdə saxlayır.
Aqronomun sözlərinə görə, Oğuzda çiyələkçiliyin inkişaf etdirilməsi üçün qarşıdakı illərdə daha geniş planlar var. Mövcud əkin sahəsinin mərhələli şəkildə 10 hektaradək artırılması nəzərdə tutulur. Artıq bununla bağlı yeni ərazilər müəyyənləşdirilib və həmin sahələrin təbii gübrələrlə təmin olunmasına başlanılıb.
“Çiyələk istehsalının genişləndirilməsi qarşıya qoyulan əsas hədəflərdəndir. İlk nəticələr göstərir ki, Oğuzda bu məhsulun yetişdirilməsi üçün imkanlar var. Qarşıdakı dövrdə sahələrin genişləndirilməsi ilə yanaşı, məhsuldarlığın daha da artırılmasına çalışacağıq”, – deyə Allahverdi Nurməmmədov qeyd edir.
Fermer Elgün Umarlı isə bildirir ki, təsərrüfatda çiyələk əkininə cari ilin fevral ayında başlanılıb. İlk mərhələdə bir hektar ərazidə salınan çiyələk sahəsi artıq gözlənilən nəticəni verib. İndiyədək bir hektardan 35 tondan çox məhsul yığılıb. Əlverişli hava şəraiti davam edərsə, mövsümün sonunadək ümumi məhsul istehsalının 60 tona çatdırılması planlaşdırılır.
Təsərrüfat üzrə orta məhsuldarlığın isə 45–50 ton olacağı proqnozlaşdırılır. Təbii gübrələrdən istifadə olunması məhsulun keyfiyyətinə və dadına da müsbət təsir göstərib. Elə buna görədir ki, Oğuz çiyələyi artıq alıcıların rəğbətini qazanıb.
Hazırda təsərrüfatda yetişdirilən çiyələk Ağsu, Qəbələ, Şamaxı və Şəki rayonlarının bazarlarına çıxarılır. Məhsula tələbatın yüksək olması fermerin gələcək planlarını daha da genişləndirib.
Elgün Umarlının sözlərinə görə, növbəti illərdə çiyələk əkinlərinin daha 8–10 hektar genişləndirilməsi, işçi sayının isə ən azı 120–150 nəfərə çatdırılması nəzərdə tutulur. Əsas hədəflərdən biri məhsulun daxili bazarla yanaşı, xarici bazarlara da çıxarılmasıdır.
“Əsas məqsədimiz təsərrüfatı genişləndirmək, məhsuldarlığı artırmaq və gələcəkdə Oğuzda yetişdirilən çiyələyi xarici bazarlara çıxarmaqdır. İlk nəticələr bu istiqamətdə nikbin olmağa əsas verir”, – deyə fermer bildirir.
Oğuz Rayon Dövlət Aqrar İnkişaf Mərkəzindən bildirilib ki, rayonda kənd təsərrüfatının müxtəlif istiqamətlərinin inkişaf etdirilməsi, yeni istehsal sahələrinin yaradılması və müasir yanaşmaların tətbiqi istiqamətində layihələr həyata keçirilir. Bu işlər “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın məqsədlərinə uyğun olaraq davam etdirilir.
Qeyd olunub ki, belə fermer təsərrüfatlarının genişləndirilməsi yalnız kənd təsərrüfatı məhsullarının istehsalının artırılmasına deyil, həm də kənd əhalisinin məşğulluğunun təmin edilməsinə, gəlir imkanlarının genişləndirilməsinə və rayonun aqrar potensialının gücləndirilməsinə mühüm töhfə verir.
Oğuzda çiyələkçiliyin inkişaf etdirilməsi yerli istehsalın artırılması, kənd sakinlərinin məşğulluğunun genişləndirilməsi və gələcəkdə məhsulun xarici bazarlara çıxarılması üçün yeni imkanlar yaradır. Bu gün bir hektardan başlayan çiyələk təsərrüfatının qarşıdakı illərdə 10 hektara qədər genişləndirilməsi isə Oğuzda bu sahənin yeni istiqamətə çevrilə biləcəyindən xəbər verir.
Müxbir - Rasim İslamoğlu
Bölmənin digər xəbərləri
