Qaxda Region Gənclərinin Məşğulluq Forumu çərçivəsində 130 vakansiya təklif olunub VİDEO
Qax, 4 sentyabr, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Qax Rayon İcra Hakimiyyətinin təşkilatçılığı ilə Qax rayonunda Region Gənclərinin Məşğulluq Forumu keçirilib.
AZƏRTAC-ın bölgə müxbiri xəbər verir ki, tədbirdə Dövlət Məşğulluq Agentliyinin İdarə Heyətinin sədri Hasil Abbasov, Qax Rayon İcra Hakimiyyətinin başçısı Elvin Paşayev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi sədrinin müavini Ceyhun Salmanov, işəgötürənlər və digər rəsmi qonaqlar iştirak ediblər.
Tədbirin məqsədi region gənclərini gələcəyin tələblərinə cavab verən peşələrlə tanış etmək, eləcə də onların fərdi istedad və bacarıqlarını müəyyənləşdirərək inkişaf istiqamətlərini göstərməkdir.
Dövlət Məşğulluq Agentliyinin İdarə Heyətinin sədri Hasil Abbasov çıxış edərək bildirib ki, gənclərin məşğulluğunun təmin edilməsi, onların əmək bazarının tələblərinə uyğun bacarıqlar əldə etməsi və düzgün karyera seçiminə dəstək göstərilməsi Agentliyin fəaliyyətinin əsas istiqamətlərindəndir. Bu məqsədlə müxtəlif layihələr həyata keçirilir, məşğulluq tədbirlərinin icrasında gənclərə üstünlük verilir.
Qax Rayon İcra Hakimiyyətinin başçısı Elvin Paşayev bildirib ki, region gənclərinin məşğulluğunun artırılması dövlət siyasətinin prioritet istiqamətlərindən biridir. Gənclərin düzgün peşə seçimi etmələri, öz potensiallarını reallaşdırmaları üçün bu kimi platformalar mühüm əhəmiyyət daşıyır.
Forum çərçivəsində gənclər üçün peşə və məşğulluq yarmarkası təşkil olunub, müasir peşələrlə bağlı tanıtım stendləri qurulub, eləcə də region gənclərinin uğur hekayələrini əks etdirən sərgi təqdim edilib. Qonaqlar vakansiyalarla tanış olublar, işəgötürənlər tərəfindən iş yerlərinə dair məlumatlar verilib.
Forum “Gələcəyin iş yerləri və müasir peşələr: Dövlət dəstəyi mexanizmləri” mövzusunda panel müzakirəsi ilə davam etdirilib. Panel müzakirəsində spikerlər tərəfindən gəncləri maraqlandıran suallar cavablandırılıb, onların təklif və fikirləri dinlənib.
Tədbir çərçivəsində, həmçinin Qax rayonunun gənclərinin iştirakı ilə bədii hissə təşkil olunub. Proqram çərçivəsində gənclər tərəfindən müxtəlif rəqs və musiqi nümunələri təqdim edilib.
Müxbir - Rasim İslamoğlu
Bölmənin digər xəbərləri
