Xocalıda yaradılan yeni iş yerlərində təhlükəsiz əmək şəraiti diqqət mərkəzindədir REPORTAJ VİDEO
Xocalı, 8 sentyabr, AZƏRTAC
İşğaldan azad olunmuş ərazilərdə bərpa və quruculuq işləri ilə yanaşı, yeni müəssisələrin yaradılması, iş yerlərinin açılması və əhalinin məşğulluğunun təmin olunması istiqamətində də mühüm layihələr həyata keçirilir. Bu prosesdə çalışanların sağlam və təhlükəsiz əmək şəraiti ilə təmin olunması da əsas məsələlərdən biridir.
AZƏRTAC xəbər verir ki, Dövlət Əmək Müfəttişliyi Xidmətinin tabeliyindəki “Əməyin Mühafizəsi Mərkəzi” publik hüquqi şəxs tərəfindən Xocalı rayonuna mediatur təşkil olunub.
Mediaturun məqsədi işğaldan azad olunmuş ərazilərdə fəaliyyət göstərən müəssisələrdə yaradılmış təhlükəsiz və sağlam əmək şəraitini ictimaiyyətə təqdim etmək, əməyin mühafizəsi sahəsində görülən işlər və qabaqlayıcı tədbirlər barədə məlumatlılığı artırmaq olub.
Tədbirdə media nümayəndələri ilə yanaşı, Dövlət Əmək Müfəttişliyi Xidmətinin sosial tərəfdaşları olan Azərbaycan Respublikasının Minatəmizləmə Agentliyinin, Kiçik və Orta Biznesin İnkişafı Agentliyinin, Azərbaycan Həmkarlar İttifaqları Konfederasiyasının, Azərbaycan Sahibkarlar Konfederasiyasının və Dövlət Məşğulluq Agentliyinin nümayəndələri də iştirak ediblər.
İştirakçılara əməyin mühafizəsi sahəsində həyata keçirilən tədbirlər barədə məlumat verilib. Bildirilib ki, cari ildə sosial tərəfdaşlarla birgə “Əməyin Mühafizəsi Mərkəzi” tərəfindən 73 tədbir keçirilib. Bu tədbirlərə 226 işəgötürən və 2800-dən çox işçi cəlb olunub. Keçirilən tədbirlər zamanı əməyin mühafizəsi, iş yerlərinin attestasiyası, işçilərin sağlam və təhlükəsiz şəraitdə çalışmasının təmin olunması, yeni dövlət standartlarının tətbiqi, əmək qanunvericiliyinin əsas tələbləri və mina təhlükəsizliyi qaydaları barədə məlumat verilib.
Dövlət Əmək Müfəttişliyi Xidmətinin Qarabağ Regional Şöbəsinin rəisi Akif Baxşəliyev bildirib ki, mediatur çərçivəsində Xocalıda fəaliyyət göstərən iki müəssisədə əməyin mühafizəsi və təhlükəsizlik tədbirlərinin təşkili ilə bağlı vəziyyət yerində qiymətləndirilib.
Azərbaycan Həmkarlar İttifaqları Konfederasiyasının Əmək və Sağlamlığın Mühafizəsi şöbəsinin müdiri Adil Rəhimli qeyd edib ki, işğaldan azad olunmuş ərazilərdə yeni müəssisələrin yaradılması və iş yerlərinin açılması məşğulluğun təmin olunmasına mühüm töhfə verir.
Mediatur çərçivəsində əvvəlcə “Qarabağ Tekstil Evi” MMC-nin fəaliyyəti ilə tanışlıq olub. Burada istehsal prosesi, əməkdaşlar üçün yaradılmış şərait, əməyin mühafizəsi və təhlükəsizlik tədbirləri barədə məlumat verilib.
Müəssisədə yeni işə qəbul olunan əməkdaşların peşə hazırlığına da xüsusi diqqət yetirildiyini bildirən “Qarabağ Tekstil Evi” MMC-nin təlimçisi Tərlan Akimova deyib: “Dörd aydır burada çalışıram. Təlimçi kimi yeni işə qəbul olunan əməkdaşlara öz peşəmi öyrədirəm. Mənim üçün çox sevindirici və qürurvericidir ki, hazırda Xocalı şəhərində işləyirəm. Naxçıvanlıyam və burada öz sənətimi davam etdirməkdən məmnunam”.
Müəssisənin əməkdaşları da Xocalıda yaradılan şəraitdən razılıqlarını ifadə ediblər. Bildirilib ki, iş və yaşayış imkanlarının yaradılması doğma yurda qayıdan sakinlərin məşğulluğuna mühüm töhfə verir.
“Qarabağ Tekstil Evi”nin digər əməkdaşı Leyla Hüseynova isə deyib: “Dörd aydır burada işləyirəm. Köç zamanı Xocalıya gəlmişik. Bizə ev də verilib, iş də. Öz vətənimizdə yaşayırıq və işləyirik. İş yerimizin evimizə yaxın olması da bizim üçün əlavə üstünlükdür”.
Mediaturun növbəti ünvanı “Accurate Az” MMC olub.
Bildirilib ki, müəssisədə əsasən ofis mebelləri və onların komponentləri istehsal edilir. İstehsalın genişləndirilməsi ilə yanaşı, yerli əhalinin işlə təmin olunması da müəssisənin əsas istiqamətlərindən biridir.
“Accurate Az” MMC-nin istehsalat rəhbəri Natiq Əmiraslanov deyib ki, müəssisədə çalışanların böyük hissəsini Qarabağ sakinləri təşkil edir. “Əsas məqsədlərimizdən biri Qarabağda yerli əhalinin işlə təmin olunmasıdır. Çalışırıq ki, əsasən buraya köçən sakinləri işə götürək. Hazırda müəssisədə 80-ə yaxın əməkdaş çalışır. İstehsal gücümüz artdıqca işçilərin sayını da artırmağı planlaşdırırıq”, - deyə N.Əmiraslanov vurğulayıb.
“Accurate Az”-ın əməkdaşı Mübariz Muradov isə deyib: “Artıq bir ilə yaxındır burada çalışıram. Müəssisədə ofis mebelləri, stullar və müxtəlif aksesuarlar istehsal olunur. İşçilərin əksəriyyəti Qarabağ sakinləridir. Burada işləmək həm bizim üçün, həm də regionun iqtisadi inkişafı baxımından əhəmiyyətlidir”.
Qeyd edək ki, Xocalıda fəaliyyət göstərən müəssisələr bir tərəfdən regionda istehsalın və məşğulluğun inkişafına, digər tərəfdən isə təhlükəsiz əmək mühitinin formalaşdırılmasına töhfə verir. Doğma yurda qayıdan insanların burada yaşaması, işləməsi və əmək fəaliyyətini təhlükəsiz şəraitdə davam etdirməsi Xocalının bərpa prosesinin mühüm göstəricilərindən biridir.
Bölmənin digər xəbərləri
