Muxtar Babayev: İqlim sahəsində əməkdaşlıq üçün şərtlər 10 il əvvəllə müqayisədə daha da çətinləşib VİDEO
Bakı, 9 sentyabr, AZƏRTAC
Paris Sazişi təxminən on il əvvəl qəbul ediləndə qarşıda duran əsas vəzifə çox aydın idi: vahid qlobal istiqamət ətrafında konsensus formalaşdırmaq. O vaxtdan bəri çox şeyə nail olunub. Lakin həmin Sazişi həyata keçirməyə çalışdığımız dünya köklü şəkildə dəyişib. Pandemiya dövrünü yaşadıq. Münaqişələrin, enerji böhranlarının, inflyasiyanın və artan geosiyasi rəqabətin şahidi olduq.
AZƏRTAC xəbər verir ki, bunu Azərbaycan Prezidentinin iqlim məsələləri üzrə nümayəndəsi və COP29-un prezidenti Muxtar Babayev “Bakı İqlim Fəaliyyəti Həftəsi 2026” (BCAW2026) çərçivəsində Nizami Gəncəvi Beynəlxalq Mərkəzinin təşkilatçılığı ilə keçirilən "COP31-dən sonra iqlim liderliyi: Tərəfdaşlıq vasitəsilə icranın təmin edilməsi" mövzusunda dəyirmi masada çıxış edərkən deyib.
M.Babayev qeyd edib ki, qlobal hərbi xərclər hazırda ildə 3 trilyon dollara yaxınlaşır. Eyni zamanda, iqlim təsirləri daha aydın görünür və daha böyük iqtisadi itkilərə səbəb olur. Ekstremal istilər şəhərlərimizi ciddi sınaq qarşısında qoyur. Quraqlıq su və ərzaq sistemlərinə təzyiq göstərir. Daşqınlar və meşə yanğınları illərlə davam edən inkişafı cəmi bir neçə saat və ya gün ərzində məhv edə bilər.
"Beləliklə, ilk müşahidəm budur ki, iqlim sahəsində əməkdaşlıq üçün şərtlər 10 il əvvəllə müqayisədə daha da çətinləşib.
İkinci məqam ondan ibarətdir ki, iqlim üzrə fəaliyyət milli prioritetlərlə rəqabət aparmaqla uğur qazana bilməz. O, ölkələrin həmin prioritetləri necə həyata keçirdiyinin bir hissəsinə çevrilməlidir. Enerji keçidi eyni zamanda enerji təhlükəsizliyini və əlçatanlığını gücləndirməlidir. Adaptasiya tədbirləri iqtisadiyyatları, infrastrukturu və icmaları qorumalıdır. İqlimədavamlı kənd təsərrüfatı ərzaq və su təhlükəsizliyinə xidmət etməlidir. Başqa sözlə, biz göstərməliyik ki, iqlim fəaliyyəti inkişafı, rəqabət qabiliyyətini və dayanıqlılığı dəstəkləyə bilər. Siyasi dəstəyi davamlı şəkildə qorumaq üçün bu əlaqənin nümayiş etdirilməsi mühüm əhəmiyyət daşıyacaq.
Üçüncü məqam həyata keçirmə ilə bağlıdır. Ardıcıl COP-lar vasitəsilə geniş qlobal iqlim arxitekturası formalaşdırmışıq. Hədəflərimiz, planlarımız, institutlarımız və maliyyə mexanizmlərimiz var. Lakin razılaşma ilə onun real nəticəyə çevrilməsi arasındakı məsafə hələ də çox böyükdür. Bəlkə də məhz burada COP prosesinin özündən kənara baxmalıyıq”, - deyə Muxtar Babayev əlavə edib.
Bölmənin digər xəbərləri
