Hicran Hüseynova: "Türk Yaşıl Baxışı" kimi strateji sənədlər iqlim dəyişikliyinin təsirlərinin azaldılmasını prioritetə çevirir VİDEO
Bakı, 10 sentyabr, AZƏRTAC
Türk Dövlətləri Təşkilatı, TÜRKSOY və Türk Mədəniyyəti və İrsi Fondu çərçivəsində UNESCO-nun irs siyahısına daxil edilmiş ümumi təbii abidələrin və mədəni irs nümunələrinin qorunması istiqamətində mühüm addımlar atılır. Ekoturizm və irs marşrutları, İpək Yolu və ya Dədə Qorqud yolu kimi sərhədlərarası turizm layihələri bu bölgələrdə mədəni irsin təşviqi, endemik flora və faunanın qorunması üçün iqtisadi stimullar yaradır.
AZƏRTAC xəbər verir ki, bunu “Bakı İqlim Fəaliyyəti Həftəsi 2026” çərçivəsində Türk Mədəniyyəti və İrsi Fondunun təşkilatçılığı ilə keçirilən “Türk sivilizasiyasında mədəni irsin və biomüxtəlifliyin qorunması: Ortaq ənənələrdən birgə fəaliyyətə” mövzusunda dəyirmi masada Milli Məclisin Ailə, qadın və uşaq problemləri komitəsinin sədri Hicran Hüseynova deyib.
O bildirib ki, Mərkəzi Asiyadan Anadoluya qədər uzanan geniş regionda su qıtlığı, səhralaşma və biomüxtəlifliyin itirilməsi kimi problemlərin həlli üçün türk xalqlarının elmi və intellektual potensialının səfərbər edilməsi zəruridir.
"Burada ölkələrin nümayiş etdirdiyi birliyi və siyasi iradəni, xüsusilə vurğulamaq lazımdır. Türk dünyasının əməkdaşlıq modeli çərçivəsində prezidentlər makro səviyyədə hüquqi və iqtisadi platformalar yaradarkən, birinci xanımlar "yumşaq güc", humanitar diplomatiya və ictimai təşəbbüslər vasitəsilə cəmiyyətdə ortaq dəyərlərin qorunub saxlanılmasına və təbliğinə mühüm töhfə verirlər. Türk Dövlətləri Təşkilatının sammitləri, prezidentlər tərəfindən qəbul edilmiş bəyannamələr, "Türk Yaşıl Baxışı" kimi strateji sənədlər ekoloji təhlükəsizliyi, yaşıl iqtisadiyyatı və iqlim dəyişikliyinin təsirlərinin azaldılmasını ən yüksək səviyyədə dövlət siyasətinin prioritetinə çevirir.
Ekoloji təşəbbüslər çərçivəsində dövlət başçıları Xəzər dənizinin ekosisteminin qorunması, həmçinin su çatışmazlığı və səhralaşma ilə mübarizə kimi ümumi regional problemlərin həlli məqsədilə birgə mexanizmlər və işçi qruplar yaradırlar.
Mədəni irsin beynəlxalq səviyyədə təşviqi istiqamətində də mühüm işlər görülür. Türk dünyasının birinci xanımları xalçaçılıq sənəti və musiqi ənənələri kimi maddi və qeyri-maddi mədəni irs nümunələrinin UNESCO səviyyəsində qorunması və təşviqinə yönəlmiş layihələrə birbaşa rəhbərlik edirlər.
“Tullantısız həyat” və ictimai hərəkatlar çərçivəsində birinci xanımların təşəbbüsü və himayəsi ilə həyata keçirilən ekoloji layihələr, xüsusilə sıfır tullantı kampaniyaları, yaşıllaşdırma və biomüxtəlifliyin qorunması təşəbbüsləri cəmiyyətdə ekoloji şüurun artırılmasına güclü təkan verir.
Ailə dəyərləri və gənc nəslin tərbiyəsi istiqamətində türk ailə dəyərlərinin, milli-mənəvi köklərin və təbiətə məhəbbət ənənələrinin gənc nəslə ötürülməsi məqsədilə birgə forumlar, təhsil və mədəniyyət proqramları təşkil olunur.
Ümid edirəm ki, bu təşəbbüs və layihələr dünyamızın daha gözəl, daha yaşıl və daha təmiz olmasına töhfə verəcək", - deyə Hicran Hüseynova vurğulayıb.
Bölmənin digər xəbərləri
