Viorel Gutu: Azərbaycanda yerli toxumçuların və istehsalçıların inkişafına verilən töhfə təqdirəlayiqdir VİDEO
Bakı, 24 sentyabr, AZƏRTAC
Kənd təsərrüfatının inkişafına dair yeni Dövlət Proqramı Azərbaycanın davamlı və müasir aqrar-ərzaq sektoruna olan aydın baxışının bariz sübutudur.
AZƏRTAC xəbər verir ki, bunu BMT-nin Ərzaq və Kənd Təsərrüfatı Təşkilatının (FAO) baş direktorun köməkçisi, Avropa və Mərkəzi Asiya üzrə regional nümayəndəsi Viorel Gutu "Toxumçuluqda yeni dövr: Yerli toxum, etibarlı təminat" mövzusunda konfransda deyib.
“Biz bu Dövlət Proqramının icrasını dəstəkləmək üçün artıq tərəfdaşlığa başlamışıq və onu daha da genişləndirməyi səbirsizliklə gözləyirik”, - deyə o bildirib.
Viorel Gutu əlavə edib: “Hər bir məhsul yığımı sadə və sakit bir vədlə başlayır: tək bir toxumla. Lakin toxum adi bir kənd təsərrüfatı vasitəsindən çox daha böyük əhəmiyyətə malikdir. Toxum ərzaq təhlükəsizliyinin canlı təməli, kənd əhalisinin dolanışığının dayağı və dəyişkən iqlimə qarşı əsas güclü müdafiə xəttimizdir. Toxum sistemlərimizi qoruyarkən biz kənd təsərrüfatının və bəşəriyyətin gələcəyini də qorumuş oluruq. FAO dünya miqyasında toxum təhlükəsizliyini bünövrədən möhkəmləndirmək üçün üzv olan dövlətlərlə çiyin-çiyinə çalışır. Biz kiçik fermerlərə məhsuldarlığı iki dəfə artırmaq üçün iqlimə dözümlü toxumlarla təmin edirik, yerli dözümlü sortları qorumaq üçün icma toxum banklarını dəstəkləyirik və kiçik istehsalçıları birbaşa milli təchizat zəncirlərinə bağlayaraq rəsmi sertifikatlaşdırma mexanizmləri yaradırıq".
O deyib ki, istənilən davamlı kənd təsərrüfatı iqtisadiyyatının nüvəsini yerli toxumçularımız və istehsalçılarımız təşkil edir: “Həqiqətən də Azərbaycanda yerli toxumçuların inkişafına və istehsalçıların inkişafına verilən töhfə və diqqət təqdirəlayiqdir. Siz öz regionlarınızın unikal torpaq növlərini və mikroiqlimini anlayır, ənənəvi bitki sortlarının qeydinə qalır və ətraf təsərrüfatların sağlam toxumlarla etibarlı təchizatını təmin edirsiniz. Yerli toxum istehsalına sərmayə qoymaq yalnız kənd təsərrüfatı siyasəti deyil. Bu, milli ərzaq suverenliyi, iqtisadi özünü təminat və uzunmüddətli təhlükəsizlik üçün həyati vacib bir strategiyadır. Ölkə özünün güclü və bacarıqlı toxumçularına arxalandıqda, qlobal bazar axşamları və təchizat zəncirindəki şoklara qarşı davamlılıq, dözümlülük qazanır".
Bölmənin digər xəbərləri
