"Şəhərlərimiz gəncliyin gözü ilə" adlı sərgidə 100-ə yaxın əl işi nümayiş etdirilib VİDEO
Şəki, 25 sentyabr, AZƏRTAC
Şəki şəhər Mirzə Fətəli Axundzadə adına Mədəniyyət Mərkəzinin tabeliyində fəaliyyət göstərən "Narınqala" Folklor evinin təşkilatçılığı ilə “Şəhərsalma və Memarlıq İli” çərçivəsində “Şəhərlərimiz gəncliyin gözü ilə” adlı sərgi keçirilib.
AZƏRTAC-ın bölgə müxbiri xəbər verir ki, "Narınqala" Folklor evinin həyətində təşkil olunan sərgidə mədəniyyət və təhsil işçiləri, şəhər ictimaiyyəti, turistlər iştirak ediblər.
Tədbirdə Dövlət Himni səsləndirilib, Ümummilli Lider Heydər Əliyevin və Azərbaycanın ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Sərgidə Şəki şəhər 1, 5, 7, 8, və 11 nömrəli tam orta məktəblərin şagirdlərinin hazırladıqları müxtəlif əl işləri, yaradıcı nümunələr və Azərbaycan şəhərlərinin maketləri nümayiş etdirilib. Şagirdlərin hazırladıqları maketlərdə şəhərlərin memarlıq siması, tarixi abidələri, küçələri və müasir şəhər təsəvvürləri yaradıcı şəkildə əks olunub.
Sərgi iştirakçılar tərəfindən maraqla qarşılanıb. Şagirdlərin hazırladıqları şəhər maketləri və əl işləri onların şəhərsalma, memarlıq və milli-mədəni irsə olan marağını, yaradıcılıq bacarıqlarını və gələcək şəhər təsəvvürlərini nümayiş etdirib.
“Şəhərlərimiz gəncliyin gözü ilə” sərgisi gənc nəslin yaradıcılıq potensialının dəstəklənməsi, onların şəhərsalma və memarlıq haqqında düşüncələrinin təşviqi və Azərbaycan şəhərlərinin gələcəyinə dair yaradıcı baxışlarının təqdim olunması baxımından əhəmiyyətli tədbir olub.
Müxbir - Rasim İslamoğlu
Bölmənin digər xəbərləri
