Naxçıvanda suvarma su təminatı yaxşılaşır, payızlıq taxıl əkinləri genişlənir - Babək rayonundan REPORTAJ VİDEO
Naxçıvan, 7 oktyabr, AZƏRTAC
Naxçıvanda kənd təsərrüfatının inkişafı istiqamətində həyata keçirilən tədbirlər, xüsusilə suvarma, su təminatının yaxşılaşdırılması və əkin sahələrinin genişləndirilməsi 2027-ci ilin məhsulu üçün payızlıq taxıl mövsümünə hazırlığa da müsbət təsir göstərir. Muxtar respublikanın rayonlarında torpaqların şumlanması, əkin və suvarma işləri davam etdirilir, fermerlər mövcud imkanların əvvəlki illərlə müqayisədə yaxşılaşdığını bildirirlər. Qarşıya qoyulan hədəflər yalnız əkin sahələrinin artırılmasını deyil, həm də məhsuldarlığın yüksəldilməsini və müasir aqrar texnologiyaların tətbiqinin genişləndirilməsini nəzərdə tutur. Bu baxımdan Prezident İlham Əliyevin 25 may 2026-cı il tarixli Sərəncamı ilə təsdiq edilmiş “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı” çərçivəsində qarşıya qoyulmuş hədəflərin Naxçıvanda da icrası istiqamətində tədbirlər davam etdirilir.
Naxçıvan Muxtar Respublikası Kənd Təsərrüfatı Nazirliyinin şöbə müdiri Məhəmməd Zeynalov AZƏRTAC-ın bölgə müxbirinə müsahibəsində bildirib ki, indiyədək 1026,6 hektar sahədə əkin, 168 hektar sahədə suvarma işləri həyata keçirilib.
Naxçıvanda hazırda 2027-ci ilin məhsulu üçün payızlıq taxıl əkinlərinin aparılması istiqamətində işlər görülür. Proqnoza əsasən, muxtar respublikada 22 min 800 hektar sahədə payızlıq taxıl əkini nəzərdə tutulur. Artıq 7415 hektar sahədə şum, 1026,6 hektar sahədə əkin və 168 hektar sahədə suvarma işləri həyata keçirilib. Ötən ilin müvafiq dövrü ilə müqayisədə cari ildə payızlıq taxıl əkinləri üzrə hazırlıq və əkin işlərinin həcmində artım müşahidə olunur. Belə ki, şum işləri 3167 hektar, əkin işləri 886,5 hektar, suvarma işləri isə 168 hektar çox həyata keçirilib.
Nazirlik rəsmisi qeyd edib ki, Dövlət Proqramı çərçivəsində Naxçıvan Muxtar Respublikasında kənd təsərrüfatının istehsal potensialının artırılması və müasir texnologiyaların tətbiqinin genişləndirilməsi üzrə də mühüm hədəflər müəyyən edilib. Müasir suvarma sistemləri tətbiq olunan sahələrin 720 hektardan 3000 hektara, ixtisaslaşmış rayonlarda buğdanın məhsuldarlığının hektardan 30 sentnerdən 50 sentnerə yüksəldilməsi, taxıl silolarının tutumunun isə 50 min tondan 60 min tona çatdırılması nəzərdə tutulur.
Muxtar respublikanın bütün bölgələrində olduğu kimi, Babək rayonunda da payızlıq əkin mövsümünə hazırlıq mütəşəkkil xarakter daşıyır. Təsərrüfatçılar torpaq sahələrində şumlama və əkinə hazırlıq işləri aparır, suvarma imkanlarının yaxşılaşmasını qarşıdakı mövsüm üçün mühüm amil hesab edirlər.
Rayonun Hacıvar kənd sakini Fikrət Məmmədov uzun illərdir təsərrüfatla məşğuldur. O, 2011-ci ildən lizinq yolu ilə əldə etdiyi traktordan istifadə etməklə əkin-biçin işlərini həyata keçirir. Öz torpaq sahələrindən istifadə edən təsərrüfatçı ehtiyac yarandıqda əlavə ərazilər də icarəyə götürür. Ötən il Fikrət Məmmədov 15-20 hektara qədər sahədə taxıl əkib və hər hektardan orta hesabla 25-30 sentner məhsul götürüb. Ümumilikdə isə 75-80 ton məhsul əldə edib.
Təsərrüfatçı qeyd edir ki, iki-üç il əvvəl su çatışmazlığı müəyyən çətinliklər yaratdığından bəzi əkinçilər torpaqlarını tam əkə bilmirdilər. Hazırda isə vəziyyət xeyli yaxşılaşıb: “Əkin sahələrimiz şumlanıb, dövlət tərəfindən bizə maddi dəstək göstərilir, gübrələr vaxtında verilir. Əkinçilər hazırda sahələrin suvarılması ilə məşğuldurlar. Keçən il də su bol olmuşdu, bu il də kifayət qədərdir. Heydər Əliyev su anbarı doludur, nasoslarımız işləyir, suvarma işləri davam etdirilir. Yağıntıların bol olması da su ehtiyatlarının artmasına müsbət təsir göstərib. Naxçıvan çayından da nasoslarımız vasitəsilə ərazilərə su verilir. Bu da suvarma imkanlarının yaxşılaşmasına kömək edir”.
Kənddə təsərrüfatla məşğul olan digər sakinlər də mövcud imkanların əkinçilik üçün əlverişli olduğunu bildirirlər. Təsərrüfatçı Arif Cəfərov də uzun illərdir əkin-biçinlə məşğuldur. O, hər il böyük ərazidə taxıl əkir və yüksək məhsuldarlığı təsərrüfatın davamlılığı üçün əsas şərtlərdən biri hesab edir.
“Hər hektardan 42-43 sentnerdən aşağı məhsuldarlıq mənim üçün qənaətbəxş deyil. Çünki çəkilən xərcləri, borcları ödəmək və təsərrüfatı davam etdirmək üçün yüksək məhsuldarlıq lazımdır”, - deyə A.Cəfərov bildirir.
Təsərrüfatçı kənd təsərrüfatına göstərilən dövlət dəstəyinin, fermer və əkinçilərlə keçirilən görüşlərin də onları ruhlandırdığını deyir: “Bu il mayın 25-də Prezident İlham Əliyevin rəhbərliyi ilə Bakıda kənd təsərrüfatı ilə bağlı müşavirə keçirildi. İyunun 22-də isə Şərurda biz fermerlərlə görüş oldu. Müşavirədə səsləndirilən fikirlər bizi də ruhlandırdı. Suyun vaxtında sahələrə çatdırılması əkinlərin inkişafına və məhsuldarlığın yüksəlməsinə birbaşa təsir göstərir. Su vaxtında verilir, əkin sahələri vaxtında suvarılır. Əgər vaxtında suvarma aparılmasaydı, bu sahələr belə məhsuldar olmazdı. Biz də ardıcıl olaraq suvarma işlərini həyata keçiririk”.
Təsərrüfatçı son illərdə yaşanan su qıtlığının müxtəlif ərazilərdə kənd təsərrüfatına müəyyən təsir göstərdiyini, lakin aidiyyəti qurumların həyata keçirdiyi tədbirlər nəticəsində vəziyyətin yaxşılaşdığını diqqətə çatdırır.
“Kənd təsərrüfatı üçün texnikanın, suvarma imkanlarının yaradılması və suyun vaxtında sahələrə çatdırılması çox vacibdir. Nə qədər əkin aparıldığı, nə qədər məhsul əldə olunduğu da görülən işlərin nəticəsini göstərir. Bu il 22 hektar sahədə taxıl əkmişəm və məhsuldarlığın yaxşı olacağına ümid edirəm. Hava şəraiti və digər imkanlar əlverişli olsa, gələcəkdə əkin sahələrimi daha da artıracağam”, – deyə o qeyd edir.
Naxçıvanda payızlıq taxıl mövsümünə hazırlıq yalnız növbəti ilin məhsulunun təmin edilməsi baxımından deyil, aqrar sahənin daha dayanıqlı inkişafı üçün də mühüm əhəmiyyət daşıyır. Su ehtiyatlarının artması, suvarma imkanlarının genişlənməsi, texnika və dövlət dəstəyi fermerlərin imkanlarını artırır. Əkinçilərin sahələrini genişləndirmək və daha yüksək məhsuldarlıq əldə etmək niyyəti isə qarşıdakı mövsümdə əsas hədəfin torpaqdan daha səmərəli istifadə etməklə həm istehsalın, həm də məhsuldarlığın artırılması olduğunu göstərir.
Müxbir-Nail Əsgərov
Bölmənin digər xəbərləri
