Tural Novruzov: Şuşada Heydər Əliyev Fondunun dəstəyi ilə 30-dan çox tarixi abidə bərpa olunub VİDEO
Bakı, 23 oktyabr, AZƏRTAC
XII Bakı Beynəlxalq Kitab Sərgisi Azərbaycan ədəbiyyatının, eləcə də ölkəmizin zəngin tarixi və mədəni irsini əks etdirən nəşrlərin təbliği, onların geniş oxucu auditoriyasına çatdırılması baxımından mühüm əhəmiyyət daşıyır.
Bunu AZƏRTAC-a açıqlamasında Şuşa Şəhəri Dövlət Qoruğu İdarəsinin icraçı direktoru Tural Novruzov söyləyib.
Onun sözlərinə görə, bu cür beynəlxalq tədbirlər Azərbaycanın mədəni irsinin dünyada tanıdılmasına, müxtəlif ölkələr arasında ədəbi-mədəni əlaqələrin genişləndirilməsinə mühüm töhfə verir. İdarənin sərgidə iştirakının əsas məqsədlərindən biri də Şuşanın zəngin tarixi-mədəni irsini kitablar vasitəsilə beynəlxalq ictimaiyyətə daha yaxından tanıtmaqdır.
“Şuşa Azərbaycanın mədəniyyət paytaxtıdır. Eyni zamanda, şəhər 2024-cü ildə “İslam dünyasının mədəniyyət paytaxtı” seçilib. Bu gün sərgidə Şuşanın tarixi və mədəni irsinə həsr olunmuş, əvvəllər müxtəlif dillərdə çap edilmiş kitabın ərəb dilindəki nəşri də təqdim olunur. Hesab edirəm ki, bu cür nəşrlərin müxtəlif dillərdə hazırlanması və beynəlxalq oxucu auditoriyasına çatdırılması mədəni irsimizin dünyada daha geniş tanıdılmasına töhfə verir”, – deyə T.Novruzov bildirib.
İcraçı direktor vurğulayıb ki, kitablar xalqların tarixinin, mədəniyyətinin və mənəvi dəyərlərinin tanıdılmasında mühüm vasitələrdən biridir. Bu cür nəşrlər oxucuların dünyagörüşünü zənginləşdirir, Şuşanın zəngin irsi haqqında daha ətraflı məlumat əldə etmələrinə imkan yaradır.
Şuşada tarix-mədəniyyət abidələrinin bərpası istiqamətində görülən işlərdən də danışan T.Novruzov qeyd edib ki, 2020-ci ildən bu günədək Heydər Əliyev Fondunun dəstəyi ilə şəhərdə 34 tarixi abidə bərpa olunaraq istifadəyə verilib. Onlardan altısı tarixi məsciddir.
“Hazırda daha 15 tarixi abidənin konservasiyası istiqamətində işlər aparılır. Bu abidələr işğal dövründə vandalizmə məruz qalaraq ciddi zədələnib. Buna görə də onların mövcud vəziyyətinin qorunması, daha çox dağılmasının qarşısının alınması və gələcək nəsillərə çatdırılması əsas prioritetlərimizdəndir. Bununla yanaşı, Şuşada bir sıra digər tarixi abidələrin, o cümlədən karvansaranın bərpası və funksional istifadəsinin təmin edilməsi istiqamətində də işlər sürətlə davam etdirilir”, – deyə icraçı direktor əlavə edib.