Daşkənddə “Humay və sehrli Huma quşu” kitabının özbək dilində nəşrinin təqdimatı olub VİDEO
Bakı, 6 noyabr, AZƏRTAC
Azərbaycanın Özbəkistandakı səfirliyinin tabeliyində Heydər Əliyev adına Azərbaycan Mədəniyyət Mərkəzində tanınmış Azərbaycan uşaq yazıçısı Sevinc Nuruqızının “Humay və sehrli Huma quşu” kitabının özbək dilində nəşrinin təqdimat mərasimi keçirilib.
Kitab Heydər Əliyev adına Azərbaycan Mədəniyyət Mərkəzi, “Təhsil” və “Çinar” nəşriyyatlarının birgə layihəsi əsasında özbək dilində nəşr olunub. Nəşrin rəyçisi filologiya elmləri doktoru, professor, Milli Məclisin deputatı Elnarə Akimovadır.
Azərbaycan Mədəniyyət Mərkəzindən AZƏRTAC-a bildirilib ki, tədbirdə Azərbaycan və Özbəkistanın ədəbiyyat və mədəniyyət nümayəndələri, yazıçılar, tərcüməçilər, nəşriyyat və kitabxana əməkdaşları, müəllimlər, uşaq bağçalarının yetirmələri, məktəblilər və uşaq ədəbiyyatına maraq göstərən qonaqlar iştirak ediblər.
Tədbirdə çıxış edən Özbəkistandakı Heydər Əliyev adına Azərbaycan Mədəniyyət Mərkəzinin rəhbəri, tarix üzrə fəlsəfə doktoru Akif Marifli bədii əsərlərin qarşılıqlı tərcüməsinin Azərbaycan–Özbəkistan ədəbi-mədəni əlaqələrinin inkişafında mühüm rol oynadığını bildirib. Vurğulayıb ki, “Humay və sehrli Huma quşu” kitabının özbək dilində nəşri gənc oxucuların dünyagörüşünün zənginləşməsinə, ortaq mənəvi dəyərlərlə tanış olmasına və iki xalq arasında dostluğun gələcək nəsillər arasında möhkəmlənməsinə töhfə verəcək.
“Təhsil” nəşriyyatının baş direktoru Tural Axundov, “Çinar Yayımları” nəşriyyatının baş redaktoru və müəllifi Əli Hənifəyev, eləcə də “Xalq qəzeti”nin Türküstan üzrə müxbiri Qulu Kəngərli çıxışlarında kitabın nəşrinin əhəmiyyətindən, uşaq ədəbiyyatının təbliğindən və əsərin bədii-mənəvi xüsusiyyətlərindən bəhs ediblər. Huma quşu obrazının türk xalqlarının ortaq mifoloji yaddaşında tutduğu yer və mənəvi dəyərlərlə bağlılığı vurğulanaraq bu cür nəşrlərin ortaq mədəni irsin tanıdılmasına töhfə verdiyi bildirilib.
Özbəkistan Respublikası Uşaq Kitabxanasının mətbuat şöbəsinin müdiri Abbos Jumayev, “Turon” İnformasiya-Kitabxana Mərkəzinin baş kitabxanaçısı Mohira Ermatova və tərcüməçi-publisist Pirmuhammad Xolmatov uşaq ədəbiyyatının mənəvi tərbiyədəki rolundan, mütaliə mədəniyyətinin formalaşmasından və bədii əsərlərin uşaqların təxəyyülünə təsirindən danışıblar. Onlar kitabın özbək dilinə tərcüməsinin Azərbaycan ədəbiyyatının gənc özbək oxucularına tanıdılması baxımından əhəmiyyətini qeyd ediblər.
Kitabın müəllifi, Azərbaycan yazıçısı Sevinc Nuruqızı çıxışında əsərin ərsəyə gəlməsindən, onun əsas ideyasından və uşaqlara aşıladığı mənəvi dəyərlərdən danışıb. Yazıçı əsərinin özbək dilində nəşr olunmasından məmnunluğunu ifadə edərək, kitabın özbək uşaqları tərəfindən maraqla qarşılanacağına ümidvar olduğunu bildirib.
Tədbir çərçivəsində “Humay və sehrli Huma quşu” kitabı əsasında hazırlanmış qısametrajlı film də nümayiş etdirilib.
Təqdimat mərasiminin bədii hissəsində Azərbaycan Mədəniyyət Mərkəzinin “Xarıbülbül” teatr truppasının üzvləri tərəfindən kitabın mövzusuna uyğun hazırlanmış kiçik teatrlaşdırılmış kompozisiya və əyləncəli səhnələr təqdim olunub. Uşaqların iştirakı ilə müxtəlif interaktiv oyunlar və əyləncə proqramı təşkil edilib.
Bədii proqramda Azərbaycan Mədəniyyət Mərkəzinin “Qarabağ Zəfəri” rəqs ansamblı “Zəngəzur yallısı” rəqsini təqdim edib.
Bölmənin digər xəbərləri
