Professor Ramazan Cabbarlı: Azərbaycan-Alman Tibb Günlərinin hər iki ölkədə mütəmadi keçirilməsi nəzərdə tutulur VİDEO
Berlin, 8 noyabr, AZƏRTAC
Berlində 20-ci Azərbaycan-Alman Tibb Günlərinin keçirilməsi çox vacib və uzun müddətdir arzuladığımız bir tədbirdir. Bu konfransa Azərbaycandan gəlmiş 50-yə yaxın həkim qatılıb. Konfransda müasir tibbdə texnologiyaların və süni intellektin tətbiqi kimi müxtəlif maraqlı mövzular müzakirə olunub. Bundan başqa, Azərbaycan-Almaniya tibbi və elmi əməkdaşlığına, eləcə də uzunömürlülüyə həsr olunan mövzular üzrə çıxışlar oldu. Bu çıxışlar və konfrans sayəsində biz təkcə yeni biliklər qazanmadıq, həm də yeni tanışlıqlar əldə etdik. Əminəm ki, bu görüşlər gələcəkdə yeni layihələr üçün təməl olacaq.
AZƏRTAC xəbər verir ki, bu barədə 8 Noyabr – Zəfər Günü münasibətilə Berlində keçirilən Azərbaycan-Alman Tibb Günlərinin həmsədri, Almaniyanın Essen Universiteti Klinikasının Neyrocərrahiyyə şöbəsinin həkimi, professor Ramazan Cabbarlı media nümayəndələrinə açıqlamasında bildirib.
Belə tədbirlərin Azərbaycanda və Almaniyada çalışan həkimlərin iştirakı ilə hər iki ölkədə mütəmadi keçirilməsinin vacibliyini vurğulayan professor deyib: “Bu, həqiqətən də asan deyil. Planımızda bu konfransı imkan daxilində ildə bir dəfə, bir il Azərbaycanda, bir il isə Almaniyada keçirmək var idi. Hələlik bu formatla bağlı konkret təklif yoxdur. Lakin çox vacibdir ki, başladığımız işi davam etdirə bilək və tədbirə daim yeni iştirakçılar qoşulsun. Bu tədbirin təşkili üçün çox böyük dəstək almışıq. İlk növbədə, Azərbaycanın rəsmi qurumları, Azərbaycanın Almaniyadakı səfirliyi, Berlindəki Azərbaycan Mədəniyyət Mərkəzi və Almaniyada fəaliyyət göstərən həkim birlikləri bizə dəstək veriblər. Düşünürəm ki, bu dəstək təşəbbüsün inkişafı və gələcəkdə bu kimi maraqlı konfransların keçirilməsi baxımından həqiqətən vacibdir”.
Bölmənin digər xəbərləri
