Kapitan Kənan Muradov: Komandir və müavinlər şəhid oldu, məsuliyyət üzərimə düşdü VİDEO
Bakı, 8 noyabr, AZƏRTAC
44 günlük Vətən müharibəsinin ilk günündən son gününədək rəşadətlə döyüşən igid əsgər və zabitlərimiz Qələbənin qazanılmasında müstəsna xidmətlər göstəriblər. Onlardan biri də III dərəcəli müharibə əlili, ehtiyatda olan kapitan Kənan Muradovdur.
Xocavənd istiqamətində aparılan hərbi əməliyyatlarda döyüşə girən Kənan Muradov torpaqlarımızın azadlığı uğrunda rəşadətlə vuruşub.
Təcrübəli zabit, həmçinin 2023-cü ildə keçirilən uğurlu antiterror əməliyyatlarında da fəal iştirak edərək, strateji əməliyyatların planlaşdırılmasında və düşmənin hərbi hissəsinin ələ keçirilməsində komandir kimi böyük şücaət göstərib.
Kənan Muradov AZƏRTAC-a müsahibəsində keçdiyi şərəfli döyüş yolundan danışıb.
-Qəhrəmanlıq anlayışı sizin üçün müharibədən əvvəl və sonra necə dəyişib?
-Mənim üçün hər bir Azərbaycan vətəndaşı, Azərbaycan əsgəri qəhrəmandır. Ziyalı və hərbçi-polis ailəsində böyümüşəm. Vətənə, dövlətə və dövlətçiliyə xidmət anlayışı bizə uşaqlıqdan aşılanıb.
16 yaşımdan hərbi təhsilə başlamışam, ali hərbi məktəbə qəbul olunmuşam. 20 yaşımda ilk zabit rütbəsi – leytenant rütbəsi almışam. Hərbi xidmətim boyunca tabeliyimdə olan şəxsi heyətə həm komandir, həm də böyük qardaş kimi yanaşmağa, onlara Vətənə sədaqətlə xidmət etməyin əhəmiyyətini aşılamağa çalışmışam. Ümummilli Lider Heydər Əliyevin ölkəmizin çətin dövründə həyata keçirdiyi siyasət, Azərbaycan dövlətçiliyinin möhkəmləndirilməsi və ordumuzun quruculuğu istiqamətində gördüyü işlər tariximizdə mühüm yer tutur. Bu siyasət Prezident, Müzəffər Ali Baş Komandan İlham Əliyev tərəfindən uğurla davam etdirildi. Dövlət başçısının qətiyyətli rəhbərliyi və siyasi iradəsi nəticəsində Azərbaycan Ordusu tarixi Zəfər qazandı, xalqımızın qəhrəmanlığı bütün dünyaya nümayiş olundu.
-Döyüş əməliyyatları zamanı yaddaşınızda silinməz iz buraxan hansı hadisəni bizimlə bölüşmək istərdiniz?
-Xocavənd istiqamətində mövqelərimizdən birinə düşmən tərəfindən qəfil hücum edilmişdi. Həmin mövqe bölüyümüzün dayaq məntəqəsindən sağ istiqamətdə yerləşirdi. Postun başçısı, çavuş Salman Cəbrayılov mənə məruzə etdi ki, döyüş zamanı bir hərbi qulluqçumuz şəhid olub, düşmənin isə iki hərbçisinin cəsədi səngərdə qalıb. Həmin vaxt bütün ön xətt düşmənin kiçik və iriçaplı silahlarından, minaatanlardan, top və tanklardan açılan intensiv atəşə məruz qalırdı. Buna baxmayaraq, taktiki qrup göndərmək əvəzinə, bir an belə tərəddüd etmədən özüm həmin mövqeyə yollandım. Mənimlə birlikdə üç əsgərim də gəlmişdi. Orada döyüş tapşırığının yerinə yetirilməsində böyük şücaət göstərən hərbi qulluqçularımız var idi. Mövqeyə hücum zamanı batalyon komandirimizin şəhid olması, onun müavinlərinin isə yaralanması nəticəsində komandirlik məsuliyyəti faktiki olaraq mənim üzərimə düşmüşdü. Bölük komandiri olaraq həm bölüyü, həm də batalyonu idarə etmək, döyüşün gedişinə və əməliyyat şəraitinə nəzarət etmək məcburiyyətində idim. Vəziyyət olduqca mürəkkəb və məsuliyyətli idi. İlk növbədə şəxsi heyətin təhlükəsizliyini təmin etməyə çalışdım və əsgərlərimin gizli sığınacaqlarda yerləşdirilməsinə nail oldum. Həmin döyüşdə düşmən ciddi itkilər verdi. Əsgərlərimiz böyük şücaət göstərərək düşmənin hücumunun qarşısının alınmasında mühüm rol oynadılar. Onların göstərdiyi cəsarət və döyüş əzmi heç vaxt yaddaşımdan silinməyəcək.
Bölmənin digər xəbərləri
