Vətən müharibəsi iştirakçısı: Zəfər Gününün sevincini doğma Ağdamda yaşayıram VİDEO
Ağdam, 8 noyabr, AZƏRTAC
8 Noyabr – Zəfər Günü Azərbaycan xalqının yaddaşına tariximizin ən şanlı səhifələrindən biri kimi yazılıb. Bu Zəfərə gedən yolun hər səhifəsində Vətən sevgisi, torpaq həsrəti, qəhrəmanlıq və fədakarlıq dayanır. Ağdam şəhərindəki Şəhidlər xiyabanında, Vətən müharibəsi şəhidlərinin xatirə lövhəsi qarşısında həmsöhbət olduğumuz Ucal Əliyevin həyat hekayəsi də həmin mübarizənin canlı nümunələrindəndir.
AZƏRTAC-ın bölgə müxbiri xəbər verir ki, Ağdam şəhər sakini, Vətən müharibəsi iştirakçısı Ucal Əliyev vaxtilə valideynlərindən dinlədiyi doğma yurdun azadlığı uğrunda döyüşüb. Bu yolda sağlamlığını itirsə də, bu gün uğrunda mübarizə apardığı torpaqlarda yaşayır. Onun üçün Zəfər Günü həm də şəhid silahdaşlarının xatirəsini ehtiramla yad etmək, illərlə həsrətində olduğu Ağdamda yaşamağın sevincini bölüşmək günüdür.
Ucal Əliyevin həyat hekayəsi Qarabağın işğalı, məcburi köçkünlük illəri, Vətən müharibəsi və nəhayət, doğma torpaqlara qayıdışla bağlıdır. Valideynləri Ağdamda doğulub boya-başa çatsalar da, 1993-cü ildə şəhərin işğalından sonra məcburi köçkün həyatı yaşamağa məcbur olublar. Ucal isə köçkünlük illərində Bərdədə dünyaya gəlib. Uşaqlıq illərindən valideynlərinin söhbətlərində Qarabağı, Ağdamın gözəlliklərini dinləyib. Doğma torpaqları görmək, işğaldan azad etmək arzusu onda hələ kiçik yaşlarından yaranıb. Məhz bu arzu onun hərbçi olmaq qərarına təsir göstərib.
2020-ci ildə Vətən müharibəsi başlayanda Ucal Əliyev də çoxdan gözlədiyi döyüş əmrini böyük ruh yüksəkliyi ilə qarşılayıb. Suqovuşan, Talış, Murovdağ, Ağdərə və Kəlbəcər istiqamətlərində gedən döyüşlərdə iştirak edib.
“Biz döyüş əmrini çoxdan gözləyirdik. Şükürlər olsun ki, Ali Baş Komandanımız bu əmri verdi. Biz də yüksək ruhla döyüşlərə qatıldıq və torpaqlarımızı azad etdik”, – deyə Ucal Əliyev bildirir.
Onun sözlərinə görə, döyüşçüləri irəli aparan əsas amil doğma torpaqları azad etmək istəyi idi: “Döyüş yoldaşlarım şəhid olurdu, yaralanırdı. Güllə, qəlpə yarası onları incitmirdi. Əksinə, böyük ruh yüksəkliyi verirdi, motivasiya verirdi ki, biz torpaqlarımızı azad etməliyik. Bəzilərimiz öz canından keçdi, bəzilərimiz sağlamlığını döyüş meydanında qoydu. Ancaq əsas odur ki, bu gün biz sevincliyik, qürurluyuq”.
Ucal Əliyev Vətən müharibəsindən sonra - 2022-ci ildə “Qisas” əməliyyatı zamanı düşmən tərəfindən basdırılmış piyada əleyhinə minaya düşərək bir ayağının yarısını itirib.
“Torpaqların azad olunmasında iştirak etdiyimə görə, qardaşlarımın, döyüşən igidlərin sırasında döyüşə qatıldığıma görə mən çox sevincli və qürurluyam”, – deyə müsahibimiz bildirir.
Ucal Əliyevlə söhbətimizi Ağdam şəhərində inşa edilmiş ikinci yaşayış kompleksində davam etdiririk. Onun həyatında yeni bir mərhələ başlayıb. Artıq vaxtilə valideynlərinin həsrətlə danışdığı, özünün isə görməyi arzuladığı Ağdamda yaşayır.
2025-ci il dekabrın 24-də Ağdam şəhərində Prezident İlham Əliyev tərəfindən mənzilinin açarının təqdim edildiyini deyən qazimiz doğma şəhərində yaşamağın onun üçün xüsusi məna daşıdığını bildirir: “Bu gün biz çox sevincliyik. Çünki doğma Ağdamımızda, Qarabağımızda yaşayırıq. 2025-ci il 24 dekabrda Ali Baş Komandanımız tərəfindən evlərin açarları bizə təqdim olundu. Bu gün mən həm çox sevincli, həm də çox qürurluyam. Çünki ilk növbədə Ağdamımıza həyat yenidən qayıdıb, həm də bu torpaqların alınmasında mən öz döyüş yoldaşlarımla birlikdə iştirak etmişəm”.
O əlavə edir ki, bu torpaqların azadlığı uğrunda bəziləri canından, bəziləri isə sağlamlığından keçib. Buna görə də doğma yurda qovuşmaq sevinci ilə yanaşı, şəhid silahdaşlarının xatirəsi də daim qəlbində yaşayır.
Ucal Əliyevin həyat hekayəsində Zəfər Gününün mənası xüsusilə aydın görünür. Vaxtilə valideynlərindən həsrətlə dinlədiyi Ağdam bu gün onun doğma evidir. Azadlığı uğrunda döyüşdüyü, sağlamlığını itirdiyi, silahdaşlarının canından keçdiyi torpaqlarda indi yenidən həyat qurulur.
Bu gün Ucal Əliyev doğma şəhərində yaşayır. Onun üçün bundan böyük sevinc və qürur yoxdur. Zəfər Günü münasibətilə Ağdamdan səsləndirdiyi təbrik də məhz bu sevincin ifadəsidir: “ Zəfər Günü münasibətilə Qarabağımızdan, Ağdamımızdan bütün Azərbaycan xalqımızı təbrik edirəm”.
Müxbir – Tahir Ağaməmmədov
Bölmənin digər xəbərləri
