Antalyada COP31 konfransı işini davam etdirir VİDEO
Antalya, 11 noyabr, AZƏRTAC
Türkiyənin Antalya şəhərində keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyası (COP31) üçüncü günündə işini davam etdirir.
AZƏRTAC xəbər verir ki, noyabrın 9-da fəaliyyətə başlayan və noyabrın 20-dək davam edəcək beynəlxalq konfransın bugünkü proqramında əsas diqqət “Sıfır tullantı” mövzusuna yönəlib. Gün ərzində tullantıların azaldılması, resurslardan səmərəli istifadə, metan emissiyalarının məhdudlaşdırılması və dövri iqtisadiyyatın inkişafı məsələlərinin müzakirəsi nəzərdə tutulur.
COP31-in üçüncü günü, eyni zamanda, Dünya Liderlərinin İqlim Fəaliyyəti Sammitinin ilk günüdür. Noyabrın 11-12-də keçirilən sammitdə dövlət və hökumət başçıları bir araya gələrək qlobal iqlim gündəliyini, beynəlxalq əməkdaşlığın gücləndirilməsini və iqlim öhdəliklərinin praktiki nəticələrə çevrilməsini müzakirə edəcəklər.
Tədbirlər çərçivəsində iqlim dəyişikliyi ilə mübarizə, enerji keçidi, davamlı inkişaf, maliyyələşdirmə və ekoloji dayanıqlılıq kimi aktual məsələlərin diqqət mərkəzində olması gözlənilir.
Türkiyənin ev sahibliyi etdiyi COP31 dünyanın 197 ölkəsinin və müxtəlif beynəlxalq təşkilatların nümayəndələrini bir araya gətirir.
Bölmənin digər xəbərləri
