Hektardan 40 sentner məhsul, böyüyən təsərrüfatlar - Sədərəkdən reportaj VİDEO
Naxçıvan, 18 noyabr, AZƏRTAC
Bir ovuc toxumun torpağa əmanət edilməsi ilə başlayan əkinçilik əslində zəhmətin, təcrübənin və sabaha olan inamın sınağıdır. Hər şumlanan sahədə gələcək məhsulun təməli qoyulur. Torpağa bağlılıq və hər hektardan daha çox bəhrə götürmək istəyi bu gün Naxçıvan Muxtar Respublikasının Sədərək rayonunda aqrar inkişafın əsas hərəkətverici qüvvəsinə çevrilib.
Rayonda yeni əkin mövsümü həm sahələrin genişləndirilməsi, həm də müasir aqrotexniki yanaşmaların tətbiqi ilə diqqət çəkir. Ötənilki yüksək məhsuldarlıqdan ruhlanan fermerlər bu il əkin sahələrini genişləndirməklə yanaşı, keyfiyyətli toxum seçiminə və vaxtında suvarma işlərinə xüsusi önəm verirlər. Hədəf sadəcə daha çox torpaq əkmək deyil, mövcud resurslardan səmərəli istifadə etməklə məhsuldarlığı maksimuma çatdırmaqdır.
Naxçıvan Muxtar Respublikası Kənd Təsərrüfatı Nazirliyinin mətbuat xidmətindən AZƏRTAC-ın bölgə müxbirinə bildirilib ki, 2026-cı ilin ötən dövründə Sədərəkdə 1367 hektar sahədə şum aparılıb, 965 hektarda taxıl əkilib. Bu, ötən illə müqayisədə 33,6 faiz artım deməkdir. Əkinlərin 927 hektarını arpa, 38 hektarını isə buğda sahələri təşkil edir.
Məhsuldarlığın əsas şərti olan su təminatı da diqqət mərkəzindədir. İndiyədək 570 hektar ərazidə - yəni ümumi taxıl sahələrinin 59 faizində suvarma işləri həyata keçirilib.
Torpaqdan səmərəli istifadə edərək təsərrüfatını ilbəil genişləndirən fermerlərdən biri rayonun Heydərabad qəsəbə sakini Vəzir İmamverdiyevdir. 2001-ci ildən əkinçiliklə məşğul olan təsərrüfatçı ötən il 5 hektarda arpa, 2 hektarda isə buğda yetişdirib. Hər hektardan 40 sentnerdən artıq məhsul götürməsi onu bu il əkin sahəsini 10 hektara çatdırmağa həvəsləndirib. Artıq 7 hektarda payızlıq arpa səpini yekunlaşıb, qalan 3 hektarda isə hazırlıq işləri görülür.

Vəzir İmamverdiyev uğurun sirrini dincə qoyulmuş torpaqda, düzgün toxum seçimində və aqrotexniki qaydalara dəqiq əməl etməkdə görür. Bu il də seçilmiş toxumlardan istifadə edən fermer şırım üsulu ilə suvarmaya üstünlük verib. O, su ehtiyatlarının düzgün idarə olunmasını xüsusi vurğulayır: “Sədərəyin torpaq-iqlim şəraiti taxılçılıq üçün geniş imkanlar açır. Əsas məsələ mövcud su ehtiyatlarından qənaətlə istifadə etmək və itkilərin qarşısını almaqdır. Bəzən suyun sahələrə vaxtında çatdırılmasında çətinliklər yaransa da, suvarma sisteminin düzgün təşkili yüksək məhsuldarlığın başlıca şərtidir”.
Qaraağac kənd sakini Qurban Əliyev də təcrübəli əkinçilərdəndir. Ötən mövsüm 4 hektar taxıl sahəsindən 6 tondan artıq məhsul əldə edən fermer bu il əkin sahəsini 6 hektara yüksəldib.
Hazırda sahələrdə suvarma işlərini davam etdirən Q.Əliyev su təminatının qənaətbəxş olduğunu və əkinlərin vaxtında suvarılması üçün lazımi şərait yaradıldığını bildirir. Bütün diqqətini torpağa qulluğa yönəldən fermer builki məhsulun ötənilkindən daha bol olacağına əmindir.
Sədərəkdə əkin sahələrinin 33 faizdən çox genişlənməsi rayonun aqrar potensialının reallaşdırılması baxımından mühüm göstəricidir. Fermerlərin təşəbbüskarlığı göstərir ki, bölgədə taxılçılığa maraq davamlı xarakter alıb. Qarşıdakı dövrdə su ehtiyatlarının səmərəli idarə olunması, keyfiyyətli toxum təminatı və müasir aqrotexniki üsulların tətbiqi bu artımın davamlılığını təmin edəcək.
Əkinçinin alın təri ilə ərsəyə gələn hər ton taxıl isə təkcə fermer ailəsinin rifahı deyil, həm də ölkənin ərzaq təhlükəsizliyinə verilən töhfədir.
Müxbir- Nail Əsgərov