AZAL-da itmiş baqajların izi ilə: Əşyalar sahiblərinə necə qaytarılır? - REPORTAJ VİDEO
Bakı, 18 noyabr, AZƏRTAC
Bir küncdə əlil və uşaq arabaları, müxtəlif əl yükləri və rəngbərəng çamadanlar...Bəzən adi bir çamadan belə sahibi üçün əvəzolunmaz dəyər daşıyır. Çünki hər əşyanın öz hekayəsi, hər baqajın isə onu gözləyən bir sahibi var.
Bunlar da “Azərbaycan Hava Yolları” QSC-nin (AZAL) itmiş və tapılmış əşyalar üçün nəzərdə tutulmuş xüsusi saxlanc məntəqəsində qorunan əşyalardır. Bəziləri səyahət zamanı itib, bəziləri isə hava limanında sahiblərindən ayrı düşüb. Bəs, itmiş baqajlar necə aşkarlanır? Sahiblərini müəyyənləşdirmək üçün hansı üsullardan istifadə olunur? Sahibinə qovuşmayan yüklərin aqibəti necə olur?
AZƏRTAC-ın əməkdaşları bu suallara cavab tapmaq üçün AZAL-ın itmiş baqajların mühafizə olunduğu saxlanc məntəqəsində olub, axtarış və qeydiyyat prosedurları ilə tanış olublar.
Baqajın ilkin qeydiyyatı və axtarış prosesi
Məlum olub ki, sərnişinlər tərəfindən götürülməyən çamadanlar ilk növbədə hava limanının baqaj axtarışı xidmətinin əməkdaşları tərəfindən qeydiyyata alınaraq Ümumdünya Baqaj Axtarışı Sisteminə daxil edilir. Daha sonra xüsusi mühafizə olunan saxlanc məntəqəsinə yerləşdirilir və sahibinin müəyyənləşdirilməsi istiqamətində araşdırmalara başlanılır.
Axtarış zamanı ilk növbədə, çamadanın birkası və uçuş məlumatları yoxlanılır. Birka olmadıqda isə onun rəngi, forması, xarici görünüşü, uçuş istiqaməti və sərnişinin təqdim etdiyi digər məlumatlar əsasında axtarış aparılır. Uyğunluq müəyyənləşdirildikdə baqajın sahibinə qaytarılması üçün müvafiq tədbirlər görülür.
Beynəlxalq hava daşımaları qaydalarına əsasən, baqaj təyinat yerinə çatmalı olduğu tarixdən etibarən 21 gün ərzində təhvil verilmədikdə sərnişinə kompensasiya ödənilir.
İtmiş əşyalar altı ay saxlanılır
AZAL-ın Daşınma Qaydalarına əsasən, sərnişinlər tərəfindən götürülməyən baqajlar və təyyarədə tapılan əşyalar altı ay müddətində ödənişsiz saxlanılır. Bu müddət ərzində sahiblərin müəyyənləşdirilməsi və əşyaların geri qaytarılması üçün tədbirlər görülür. Altı ay ərzində sahibi tapılmayan əşyalar isə müvafiq normativ hüquqi aktlara uyğun olaraq utilizasiya edilir.
Şirkətin qaydalarına görə, pul, qızıl-zinət əşyaları, elektron avadanlıqlar və digər qiymətli əşyaların qeydiyyata verilən baqajda daşınması tövsiyə olunmur. Bununla belə, itmiş çamadanlarda belə əşyalar aşkar edildikdə onlar qeydiyyata alınır və xüsusi mühafizə olunan şəraitdə saxlanılır. Sahibi müəyyənləşdirildikdə əşyalar ona təhvil verilir.
Uşaqlıq fotoları, məktublar, xüsusi şampun...
AZAL-ın Sərnişin Müraciətləri Şöbəsinin aparıcı mütəxəssisi Aysel Mirzəyeva AZƏRTAC-a bildirib ki, sərnişinlər təyyarə salonunda daha çox telefon, qulaqcıq, planşet, noutbuk, kitab, eynək və geyim əşyalarını unudurlar. Bəzən onların arasında şəxsiyyət vəsiqəsi kimi vacib sənədlərə də rast gəlinir.O bildirib ki, itirilmiş baqajlarla bağlı hər bir müraciət diqqətlə araşdırılır və əşyaların sahiblərinə qaytarılması üçün bütün imkanlardan istifadə olunur. İş prosesində maraqlı, bəzən isə duyğulandırıcı hadisələrlə də qarşılaşırlar: “Məsələn, Bakı–İstanbul reysi ilə uçan sərnişinlərdən biri əl yükünü təyyarədə unutmuşdu. Çantanın içərisində onun uşaqlıq xatirələrini əks etdirən fotoşəkillər, məktublar və şəxsi sənədlər var idi. Həmin sənədlərin köməyi ilə sərnişinlə əlaqə saxlamaq və çantanı ona qaytarmaq mümkün oldu. Başqa bir halda isə itmiş baqajın içərisində xüsusi şampun vardı. Həmin şampunun adını sistemə daxil etməklə onun sahibini müəyyənləşdirə bildik. Belə ki, hava limanlarının “Lost and Found” (İtmiş və tapılmış əşyalar) şöbələrinin əməkdaşları baqajların içərisindəki əşyaları da qeydiyyata alırlar. Məhz bu məlumat sayəsində çamadanın sahibini taparaq yükü ona təhvil verdik”.
İtmiş baqajların 80-90 faizi sahiblərinə qaytarılır
A.Mirzəyeva qeyd edib ki, baqajın itməsi ilə bağlı müraciətlər araşdırılarkən oxşar çamadanlar müəyyən edildikdə sərnişinlər hava limanına dəvət olunur və əməkdaşların müşayiəti ilə saxlanc məntəqəsindəki əşyalara baxış keçirilir.
“Sərnişinin baqajının içərisindəki əşyalar saxlanc məntəqəsindəki çamadanın içindəkilərlə uyğunluq təşkil edərsə, həmin baqaj dərhal sahibinə təhvil verilir. Baqaj tapılmadığı halda isə şirkət tərəfindən sərnişinə kompensasiya ödənilir. Çünki qeydiyyata alınmış hər bir baqaj aviaşirkətin məsuliyyəti altındadır. Əlimizdən gələni edirik ki, yüklər tapılaraq sərnişinlərə qaytarılsın. İtmiş baqajların 80-90 faizi aşkarlanır və sahiblərinə təhvil verilir. Sərnişin məmnunluğu şirkətimiz üçün əsas prioritetlərdəndir”, – deyə o vurğulayıb.
Beləliklə, əlil və uşaq arabaları, rəngbərəng çamadanlar və müxtəlif bağlamalar xüsusi saxlanc məntəqəsində öz sahiblərini gözləyir. Onların hər birinin arxasında yarımçıq qalmış bir səyahət, unudulmuş bir xatirə və ya sahibinə qovuşacağı günü gözləyən bir əşya var. Bəziləri tezliklə sahiblərinə qaytarılacaq, digərlərinin axtarışı isə davam edəcək.