AĞDAŞDA RABİTƏ VƏ POÇT XİDMƏTİNİN KEYFİYYƏTİ YÜKSƏLDİLMİŞDİR
Ağdaş, 5 mart (AZƏRTAC). Ağdaş rayonunda əhaliyə göstərilən poçt və rabitə xidmətinin keyfiyyətinin daha da yaxşılaşdırılması məqsədilə görülən işlər uğurla davam etdirilir.
Rayon icra hakimiyyətindən bildirmişlər ki, Ağdaş şəhərindəki 4.192 nömrəlik mərkəzi ATS-in elektronlaşdırılması başa çatmaq üzrədir. Rayonun Birinci Aral kəndindəki 50 nömrəlik ATS 128 nömrəlik yeni elektron ATS-lə əvəz olunmuş, Kotavan kəndində 48 nömrəlik, Qaradeyin kəndində isə 96 nömrəlik yeni elektron ATS quraşdırılmışdır.
Əhaliyə göstərilən poçt xidmətinin mədəni səviyyəsinin artırılması da diqqət mərkəzindədir. Son 3 ay ərzində Ağdaş şəhərində, Yuxarı Qəsil və Aşağı Ləki kəndlərində poçt şöbələri üçün yeni binalar tikilib istifadəyə verilmişdir. Bu günədək Ağdaşın 6 kəndində poçt şöbələri üçün yeni binalar tikilmişdir. Bu binalar müasir texniki avadanlıq və mebellə təmin olunmuşdur. Cari ilin sonunadək rayonun Şordəhnə, Güvəkənd, Yuxarı Ləki və Aşağı Zeynəddin kəndlərinin poçt şöbələri üçün də yeni binalar tikiləcəkdir.
Bölmənin digər xəbərləri
