Cəmşid Naxçıvanski adına hərbi liseydə “Cəsurlar” hərbi-idman və turizm oyununun respublika final yarışı keçirilmişdir
Bakı, 28 aprel (AZƏRTAC). Cəmşid Naxçıvanski adına hərbi liseydə “Cəsurlar” hərbi-idman və turizm oyununun respublika final yarışı keçirilmişdir.
Təhsil Nazirliyindən AZƏRTAC-a bildirmişlər ki, bu qurumun, Gənclər və İdman, Müdafiə, Fövqəladə Hallar, Mədəniyyət və Turizm nazirliklərinin, Səfərbərlik və Hərbi Xidmətə Çağırış üzrə Dövlət Xidməti və Respublika Veteranlar Şurasının birgə qərarı ilə keçirilən yarışda ümumtəhsil məktəblərinin VII-VIII sinif şagirdləri iştirak etmişlər.
“Cəsurlar” hərbi-idman və turizm oyununun respublika final yarışında Zərdab, Xətai (Bakı şəhəri), Ordubad rayonunun komandaları müvafiq olaraq I, II, III yerlərə layiq görülmüşlər.
Qalib komandalar Təhsil Nazirliyinin fəxri fərmanı ilə təltif olunmuşlar.
Cari ilin mart-aprel aylarında Bakı və Naxçıvan şəhərlərində, Quba, Göygöl, Hacıqabul, İsmayıllı, Balakən, Ağcabədi, Neftçala rayonlarında “Cəsurlar” hərbi-idman və turizm oyunlarının zona mərhələsi keçirilmişdir.
Hazırda Təhsil Nazirliyi müvafiq qurumlarla birgə ümumtəhsil müəssisələrində gənclərin çağırışaqədərki hazırlığı fənninin tədrisinin təkmilləşdirilməsi, hərbi-idman oyunlarının keyfiyyətinin və kütləviliyinin artırılması üçün təsirli tədbirlər həyata keçirir. Bu baxımdan gənclərin vətənpərvərlik tərbiyəsinin aktual məsələləri üzrə müşavirələrin, konfransların, “dəyirmi masa”ların, mədəni-kütləvi və digər tədbirlərin keçirilməsinə hərtərəfli dəstək verilir.
Bölmənin digər xəbərləri
