İDMAN
Qəbələdə Olimpiya atıcılıq növləri üzrə Dünya Kuboku yarışlarının qalibləri məlum olub VİDEO
Oktyabrın 23-də Qəbələ Stend və Ox Atıcılığı Kompleksində Olimpiya atıcılıq növləri üzrə Dünya Kuboku yarışlarının final mərhələsinə start verilib.
AZƏRTAC xəbər verir ki, “Qəbələ” Atıcılıq Klubunun və Azərbaycan Atıcılıq Federasiyasının birgə təşkilatçılığı, Milli Olimpiya Komitəsinin, Gənclər və İdman Nazirliyinin dəstəyi ilə keçirilən yarışların final mərhələsində güllə və stend Olimpiya atıcılıq növləri üzrə dünya reytinq cədvəlində xüsusi yer tutan 280 idmançı iştirak edir.
Yarışların ilk günündə qadınlar və kişilər pnevmatik tüfəngdən 10 və 25 metr məsafəyə atəş açmaq üzrə bacarıqlarını nümayiş etdiriblər. Həmçinin kişilər və qadınlar arasında tapançadan 25 metr məsafəyə atəş açmaq və səngər stend atıcılığı üzrə yarışlar keçirilib.
Yarışlarda Çin, İtaliya, Rusiya, Hindistan, Serbiya, Polşa, Koreya Respublikası, Meksika, Bolqarıstan və Sinqapurdan olan idmançılar mübarizə aparıblar.
Səngər stend atıcılığı üzrə qadınların yarışında Suzana Rehak Stefekova (Slovakiya) birinci, Beaman Jo Janessa (ABŞ) ikinci, Katerin Skinner (Avstraliya) üçüncü olublar.
Pnevmatik tüfəngdən 10 metr məsafəyə atəş açma yarışında kişilər arasında Nazar Louginets (Rusiya) birinci, Nikkolo Kampriani (İtaliya) ikinci, Zhu Qinan (Çin) üçüncü yeri tutublar.
Qadınlar arasında pnevmatik tüfəngdən 10 metr məsafəyə atəş açma yarışında Yi Siling (Çin) birinci, Andrea Arsoviç (Serbiya) ikinci, Şu Liuxi (Çin) üçüncü yerdə qərarlaşıblar.
Tapançadan 25 metr məsafəyə atəş açma yarışında isə qadınlar arasında Monika Karş (Almaniya) birinci, Qundeqma Otryad (Monqolstan) ikinci, Jingjing Zhang (Çin) üçüncü olublar.
Olimpiya atıcılıq növləri üzrə Dünya Kuboku yarışlarının final mərhələsindən əvvəl cari ildə dünyanın müxtəlif ölkələrində 7 seçim mərhələsi keçirilib. Həmin yarışlarda xal toplayaraq dünya reytinqində yer tutan idmançılar Dünya Kuboku uğrunda Qəbələdə keçirilən yarışların final mərhələsində iştirak etmək hüququ qazanıblar. Bu yarış Beynəlxalq İdman Atıcılıq Federasiyasının təqvim planına uyğun olaraq, Avropa və dünya çempionatlarından sonra ən mühüm yarış hesab edilir.
Qəbələdə keçirilən final yarışlarında dünyanın 40 ölkəsindən ümumilikdə 500-dən artıq idmançı və qonaq iştirak edir. Ölkəmizi bu beynəlxalq yarışda dairəvi stend atıcılığı üzrə Nurlanə Cəfərova və Emin Cəfərov, güllə atıcılığı üzrə İradə Aşumova və Ruslan Lunev təmsil edirlər.
Yarışlar oktyabrın 27-də başa çatacaq.