8 Noyabr - əbədi yaşayacaq tarix
Bakı, 8 noyabr, AZƏRTAC
Şuşa şəhərinin düşmən işğalından azad edildiyi gündən dörd il keçir. İllər ötsə, nəsillər dəyişsə də Şuşa zəfəri haqqında daha çox yazılacaq. Çünki insanlar şahidi olduqları, gözləri ilə gördükləri böyük tarixi əhəmiyyətli hadisə və proseslərin miqyasını və əhəmiyyətini bəzən bütün dərinliyi ilə zamanında dərk edə bilmirlər. Hər il 8 Noyabr – Zəfər Günü qeyd edildikcə onun əhəmiyyəti, xalqın həyatındakı yeri daha çox qiymətləndiriləcək.
Bu fikirləri AZƏRTAC-a müsahibəsində Milli Məclis sədrinin müavini Musa Qasımlı deyib. O bildirib ki, 1992-ci ilin may ayında təcavüzkar Ermənistan tərəfindən Şuşa şəhəri işğal edildikdən sonra uzun illər boyu Azərbaycan xalqı belə bir həsrət və ümidlə yaşayırdı: Şuşa təcavüzkar Ermənistanın işğalından nə zaman və necə azad ediləcək? Bu, mümkün olacaqmı? İllər ötdükcə insanlarda ümidlər azalırdı.
Nəhayət, Prezident, Müzəffər Ali Baş Komandanı İlham Əliyev qərar verdi. 2020-ci il sentyabrın 27-dən başlayan və xalqın toy-bayrama gedən kimi qoşulduğu Vətən müharibəsinin noyabrın 8-də başa çatan mərhələsinin yekunu bu həsrətə son qoydu. Azərbaycan tarixi və mədəniyyətində özünəməxsus yeri olan Şuşa şəhəri düşmən işğalından xilas edildi.
Musa Qasımlı Vətən müharibəsi günlərində Azərbaycan xalqının hər axşam televiziya ekranları qarşısında oturub Prezident İlham Əliyevin növbəti qələbə xəbəri dolu müraciətini eşitmək istəyini, Şuşanın azad edilməsi müjdəsinin verilməsini gözlədiyini vurğulayıb: “Nəhayət, həmin an gəldi. Prezident, Silahlı Qüvvələrin Ali Baş Komandanı İlham Əliyev və birinci xanım Mehriban Əliyeva noyabrın 8-də Fəxri xiyabanda və Şəhidlər xiyabanında oldular. Əvvəlcə Fəxri xiyabanda Heydər Əliyevin məzarını ziyarət edərək xatirəsinə ehtiram bildirdilər, abidənin önünə əklil qoydular.
Prezident İlham Əliyev və birinci xanım Mehriban Əliyeva Şəhidlər xiyabanına gələrək Azərbaycan Respublikasının suverenliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini yad etdilər, məzarlarına çiçək dəstələri düzdülər. Dövlətimizin başçısı “Əbədi məşəl” abidəsinin önünə əklil qoydu. Prezident İlham Əliyev Azərbaycan xalqına müraciət edərək xalqın uzun illər boyu həsrətində olduğu şad xəbəri verdi. Qələbə Azərbaycan hərbçisinin qanı və canı bahasına qazanılmışdı.
Dövlətimizin başçısının qələbə xəbəri xalqı sevinc göz yaşları selinə qərq etdi. İnsanlar əllərində bayraq küçələrə axışdılar. Bir-birini tanıyan da, tanımayan da təbrik edirdi. Xalq sanki xoşbəxtlik dənizində üzürdü.
Qələbədə iqtisadi güc, ordunun gücü, hərbi sənaye, milli birlik, siyasi iradə, Qusardan Astaraya, Naxçıvandan Ağstafaya qədər bütün şəhər, rayon, qəsəbə və kəndlərdən vətəndaşların tək bayraq altında tək millət kimi birləşərək tək dövlət, tək vətən uğrunda azadlıq müharibəsinə çiyin-çiyinə getmələri, düşünülmüş xarici siyasət, Azərbaycan oğullarının qəhrəmanlığı, Prezident, Ali Baş komandan İlham Əliyevin şəxsiyyəti amili, qəti iradəsi, prinsipial mövqeyi, mahir diplomatiyası, üstün zəkası və sərkərdəlik məharəti, xalqın dövlət rəhbərinə böyük inam və etimadı başlıca rol oynamışdı”.
Şuşa şəhərinin azad edilməsinin böyük tarixi əhəmiyyəti olduğunu söyləyən Musa Qasımlı şəhərin Azərbaycan xalqı üçün təkcə ərazi, torpaq məsələsi deyil, xüsusi məna daşıdığını vurğulayıb: “Hər şeydən əvvəl, Azərbaycan mədəniyyətinin beşiklərindən biri, dünyaya görkəmli mədəniyyət xadimləri bəxş etmiş Şuşa şəhərinin azad edilməsinin milli-mənəvi əhəmiyyəti var idi.
Şuşanın işğaldan qurtarılmasının strateji və siyasi əhəmiyyəti var idi. Mühüm strateji mövqedə yerləşən Şuşa şəhəri Qarabağın açarı və tacıdır. Şuşa kimdədirsə, Qarabağ da ondadır. Şuşanın azad edilməsi ilə işğalçı ölkə Azərbaycan qarşısında diz çökdü və üçtərəfli Bəyanatı imzaladı.
Azərbaycan Ordusunun Şuşa şəhərini işğaldan azad etdikdən müvəqqəti dayanması gələcək qələbələrə hazırlıq idi.
1992-ci ildə Şuşanın təcavüzkar Ermənistan tərəfindən işğal edilməsi, 2020-ci ildə isə şanlı Azərbaycan Ordusu tərəfindən azad olunması bir sıra ibrət dərsləri verir. Şuşa şəhəri ölkəmizdə xaos, anarxiya, dövlət hakimiyyətinin qanadları arasında intriqalar, dövlət rəhbərləri isə zəif olan zaman işğal edilmişdi.
Şuşa şəhəri ölkəmizdə sabitlik, ciddi qayda-qanun, güclü dövlət, qüdrətli dövlət rəhbəri olanda, xalq tək bayraq altında birləşəndə işğaldan xilas edildi. Deməli, Azərbaycan xalqının bundan sonrakı bütün inkişafının və qarşıya qoyduğu hədəflərə çatmasının təməlində məhz bu amillər dayanır”.
Bölmənin digər xəbərləri
