8 Noyabr - Milli birliyin Zəfəri
Bakı, 6 noyabr, AZƏRTAC
Azərbaycan xalqı tarix boyu sülhün, ədalətin və birgəyaşayışın daşıyıcısı olub. Bizim milli kimliyimiz sülhə, insana hörmətə və qarşılıqlı anlaşmaya söykənir. Əsrlər boyu bu torpaq fərqli xalqların, dinlərin və mədəniyyətlərin məskəni olub. Biz heç vaxt kiminsə etnik mənsubiyyətinə və ya mənşəyinə görə ayrı-seçkilik etməmişik. Lakin bizim humanist dəyərlərimizdən sui-istifadə edən qüvvələr tarixdə acı səhifələr açdılar. Bu coğrafiyada əsla kökü olmayan ermənilər imperiya siyasətinin vasitəsi kimi Azərbaycan torpaqlarında yerləşdirildi. Sonradan həmin qüvvələr torpağımızda özlərinə dövlət yaratmaqla kifayətlənməyib, tarixi yurdlarımıza iddialarını ortaya qoydular. 1988-ci ildən etibarən mənfur qonşularımızın əsassız ərazi iddiaları bölgədə sülhü və sabitliyi ciddi şəkildə pozdu. Ermənistan rəhbərliyinin təxribatçı siyasəti nəticəsində bölgə qanlı toqquşmaların arenasına çevrildi. Azərbaycanlıların doğma yurdlarından zorla qovulması, dinc əhalinin qətlə yetirilməsi, kənd və şəhərlərin ardıcıl şəkildə işğal olunması bu planın əsas məqsədini, etnik təmizləmə siyasətini açıq şəkildə nümayiş etdirdi.
Bu fikirləri AZƏRTAC-a açıqlamasında siyasi şərhçi Emin Bağırov bildirib.
O deyib ki, Ermənistanın hərbi-siyasi rəhbərliyi uzun illər beynəlxalq hüququn norma və prinsiplərini açıq şəkildə pozaraq BMT Təhlükəsizlik Şurasının qəbul etdiyi qətnamələrin icrasını bilərəkdən təmin etmədi. İşğal siyasətini davam etdirən qarşı tərəf sülh danışıqlarını formal prosesə çevirməklə yanaşı, regionda sabitliyin bərqərar olmasına da süni maneələr yaratdı. Torpaqları illərlə işğal altında saxlanılan Azərbaycan beynəlxalq hüquqa əsaslanan sülh çağırışları edərkən Ermənistan qeyri-konstruktiv mövqeyini qoruyaraq sərhəd boyunca yeni təxribatlara əl atdı. Bu addımlar təkcə Azərbaycan dövlətinə qarşı yox, regional təhlükəsizlik və əməkdaşlıq perspektivlərinə yönəlmiş açıq təhdid idi.
"Qırx dörd günlük Vətən müharibəsi Azərbaycan üçün həm döyüş meydanında, həm də diplomatik masada tarixi Qələbə ilə nəticələndi. Prezident İlham Əliyevin rəhbərliyi altında düşmən ağır məğlubiyyətə uğradı və işğalçı qüvvələr təslimçilik aktına imza atmaq məcburiyyətində qaldı. Bu Zəfər yalnız torpaqlarımızın azad olunması deyil, həm də xalqımıza qürur, millətimizə milli birliyin və iradənin gücünü göstərdi. Silahlı Qüvvələrin Ali Baş Komandanı kimi Prezident İlham Əliyev Azərbaycan tarixində yeni bir mərhələnin təməlini qoydu və xalqımıza misilsiz qələbə yaşatdı. Tarixi Zəfər Prezident İlham Əliyevin hərbi-siyasi qətiyyəti və dönməz iradəsi sayəsində mümkün oldu. Xalqımızın illərlə qoruduğu ümidlər gerçəkləşdi, itirilmiş torpaqlar geri qaytarıldı və hər bir azərbaycanlının qəlbində qürur hissi yenidən alovlandı.
Prezident İlham Əliyevin qətiyyətli rəhbərliyi ilə Azərbaycan yalnız hərbi qalibiyyət qazanmadı, eyni zamanda, itirilmiş milli qürurunu və xalqın özünəinamını yenidən bərpa etdi. Bu Zəfər hər bir azərbaycanlının qəlbində ümid və sevinc hissi yaratdı, millətimizin birliyini möhkəmləndirdi və gələcəyə inamımızı daha da gücləndirdi.
Tarix sübut etdi ki, Prezident İlham Əliyev “Azərbaycan torpağında ikinci erməni dövləti qurulmayacaq” bəyanatını təsadüfən demirdi. Bu, ölkəmizin mövqeyinin qəti və dəyişməz ifadəsi idi. Dövlətimizin başçısı uzun illər boyunca bölgədə hökm sürən işğal və terror siyasətinin kökünü kəsdi, işğalçıya və onu dəstəkləyən qüvvələrə açıq mesaj verdi. Azərbaycanın ərazi bütövlüyü heç bir şərt altında danışıqlar mövzusu ola bilməz. Bu mövqe yalnız xalqımızın iradəsini və milli birliyini deyil, həm də Azərbaycanın beynəlxalq hüquqa əsaslanan haqqını bütün dünyaya nümayiş etdirdi, ölkəmizin haqqını müdafiədə qətiyyətli və prinsipial lider obrazını bir daha təsdiqlədi", - deyə Emin Bağırov vurğulayıb.
Onun sözlərinə görə, qəhrəman Azərbaycan əsgərinin şücaəti və şəhidlərimizin qanı sayəsində dünya Azərbaycanın əzmini və gücünü gördü. Azərbaycan Ordusu yalnız düşməni məğlub etmədi, eyni zamanda, illərlə formalaşmış mifləri və yalan iddiaları yerlə-yeksan etdi. Cəmi 44 gün ərzində ölkəmiz öz milli birliyini, ərazi bütövlüyünü və prinsipial mövqeyini bütün dünyaya nümayiş etdirdi. Bu Zəfər həm Azərbaycanın qətiyyətli liderliyini, həm də xalq-ordu birliyinin dönməzliyinin sübutu kimi yadda qaldı.
“Böyük Zəfərin ildönümünü qürur və minnətdarlıqla qeyd edirik. 8 Noyabr yalnız azadlığımızın günü deyil, həm də xalqımızın sarsılmaz iradəsinin, birliyinin və vətənpərvərlik ruhunun simvoludur. Hər addım, hər zəfər anı Azərbaycanın gücünü, xalqın əzmini və dövlətimizin möhkəmliyini bütün dünyaya nümayiş etdirdi. Bu Qələbə xalqımızın şanlı tarixində parlaq bir səhifədir, hər zaman milli qürur, birliyin və vətən sevgisinin simvolu olaraq yadda qalacaq. 8 Noyabr Zəfəri qəhrəmanlıq və sarsılmaz iradənin nümunəsi kimi tariximizdə öz əvəzolunmaz yerini tutub və gələcək nəsillərə örnək olacaq” - deyə siyasi şərhçi fikrini yekunlaşdırıb.
Bölmənin digər xəbərləri
