Bakı, 29 iyun, AZƏRTAC

Məhkəmələrin qərarları ilə müsadirə olunmuş 470 kiloqramdan çox narkotik vasitə, psixotrop maddə və onların prekursorları iyunun 29-da Binəqədi rayonundakı Bünyad Sərdarov adına Bakı maşınqayırma zavodunda məhv edilib.

AZƏRTAC xəbər verir ki, narkotiklərin məhv olunması prosesində Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının, Daxili İşlər Nazirliyinin, Dövlət Təhlükəsizliyi Xidmətinin, Dövlət Gömrük Komitəsinin, Dövlət Sərhəd Xidmətinin əməkdaşları və KİV nümayəndələri iştirak ediblər.

Dövlət Komissiyasının işçi qrupunun rəhbəri Fəqan Şahverdiyev bildirib ki, 213 məhkəmə hökmü əsasında müsadirə edilən, barəsində məhvetmə qərarı çıxarılan 470 kiloqramdan çox müxtəlif növ narkotik vasitələr, o cümlədən 2624 çətənə bitkisi (250 kiloqram 885,74 qram marixuana, 78 kiloqram 886,257 qram tiryək, 89 kiloqram 211,65 qram heroin, 51 kiloqram 211,329 qram həşiş qətranı, 5173 ədəd psixotrop maddələr) yandıraraq məhv edilib. Müsadirə olunan müxtəlif növ narkotik vasitələrin “qara bazar”da ümumi dəyəri 13 milyon manat təşkil edir.

Qeyd olunub ki, “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”ndan irəli gələn vəzifələrin icrasını daim diqqət mərkəzində saxlayan Dövlət Komissiyasının işçi qrupu aidiyyəti qurumların əlaqələndirilməsini təşkil etməklə, antinarkotik təbliğata xüsusi önəm verir. Nəticədə birgə bir sıra qabaqlayıcı profilaktik tədbirlər həyata keçirilib, narkotiklərlə mübarizə sahəsində müsbət nəticələr əldə edilib.

Diqqətə çatdırılıb ki, cari ilin 5 ayı ərzində narkotiklərlə mübarizə sahəsində hüquq mühafizə orqanları tərəfindən 1439 fakt aşkar olunub. Onlardan 375-i satış, 1006-sı saxlama, 43-ü əkin (kultivasiya etmə), 15-ni digər faktlar təşkil edir. Aşkarlanmış faktlar üzrə qanunsuz dövriyyədən 1 ton 520 kiloqram 18,497 qram müxtəlif növ narkotik vasitələr götürülüb. Müsadirə olunan narkotik vasitələrin, psixotrop maddələrin və onların prekursorlarının 294 kiloqram 108,305 qramını marixuana, 169 kiloqram 501,11 qramını tiryək, 1 ton 37 kiloqram 427,41 qramını heroin, 16 kiloqram 290,255 qramını həşiş, 2 kiloqram 488,884 qramını digərləri, 154,22 qramını isə psixotrop maddə və 11828 ədəd həb təşkil edib.

Həmçinin “Xaş-xaş 2016” şərti adı altında keçirilən tədbirlər nəticəsində 56 kiloqram 399,885 qram narkotik tərkibli bitki yaşıl kütlə halında yığılaraq məhv edilib.

Cinayət məsuliyyətinə 850 nəfər cəlb edilib ki, onlardan 1-i 18 yaşadək, 63-ü 18-25 yaşlarında, 149-u 30 yaşadək, 637-si 30 yaşdan yuxarı, 7-si fəhlə, 3-ü qulluqçu və ya maddi məsul şəxs, 754-ü işləməyənlər, 840-ı kişilər, 10-u qadınlar, 10 nəfəri isə xarici ölkə vətəndaşları olub.

Ölkə üzrə narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizə, narkomanlığın yayılması əleyhinə görülən işlər, əhali, xüsusən yeniyetmə və gənclər arasında antinarkotik təbliğat barədə mütəmadi olaraq Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının rəsmi internet səhifəsində (nmdk.gov.az) məlumat verilir.