SİYASƏT
AKADEMİK Y.POQREBNYAK: “HEYDƏR ƏLİYEV AZƏRBAYCANA HƏLƏ UZUN İLLƏR GƏRƏK OLACAQDIR!”
Məlum olduğu kimi, Yakov Petroviç Poqrebnyakın Ukraynanın nüfuzlu “Faktı i kommentarii” qəzetinə verdiyi müsahibəni (cari il 13 may) AZƏRTAC mayın 18-də öz kanalları ilə belə bir cəlbedici başlıqla yaymışdı: “Deyəsən, bu yara ürəyimdə həmişəlik qalacaq!” Tezliklə o, infarkt keçirdi”.
Respublikamızın bir çox qəzetlərində dərc olunan bu yazı Azərbaycan və Ukrayna cəmiyyətlərində böyük müsbət əks-səda doğuraraq, yüksək vəzifələrdə təkəbbürə və rəhmsizliyə qapılmamış, hər bir insanın ağrı-acısını, dərd-sərini bütün varlığı ilə ürəyinə salmış əsl dövlət xadimi, siyasi xadim və insan olan Heydər Əliyevin ömürnaməsinin daha bir naməlum faktını üzə çıxarmışdır.
Azərbaycanın Ukraynadakı səfirliyində bu günlərdə akademik, “Ukrayna-Polşa” cəmiyyətinin vitse-prezidenti Yakov Poqrebnyakla və yuxarıda adı çəkilən, müsahibənin müəllifi, jurnalist İrina Lisniçenko ilə görüş olmuşdur.
Səfir Tələt Əliyev səmimi və maraqlı müsahibəyə görə həm akademikə, həm də jurnalistə ürəkdən minnətdarlığını və təşəkkürünü bildirdi.
Müsahibəsinin AZƏRTAC tərəfindən Azərbaycan oxucularına çatdırılmasından məmnun qaldığını bildirən Yakov Petroviç görüşə əliboş gəlməmişdi, şəxsi arxivindən Heydər Əliyev ilə görüşlərinin əks olunduğu, həqiqətən misilsiz dəyərli fotoşəkillər gətirmişdi. O, şəkillərin bir neçəsini məmnuniyyətlə AZƏRTAC-a hədiyyə etdi.
Y.Poqrebnyak şəkillərdə əbədiləşmiş məqamları şərh edərək söylədi ki, Heydər Əliyev ilə ilk dəfə 1977-ci il dekabrın 17-də, onun Ukraynada sovet hakimiyyəti qurulmasının 60 illiyi münasibətilə şənliklərə gəldiyi gün tanış olmuşdur.
Yakov Petroviç sözünə davam edərək dedi: “MK katibi kimi mən Azərbaycan nümayəndə heyətinə təhkim olunmuşdum. Heydər Əliyev rus dilində səlis danışır, söz və ifadələri təmiz tələffüz edirdi, onun çıxışının məzmunu aydın idi.
Axşam, təntənəli yığıncaqdan sonra Heydər Əliyev məni həyat yoldaşımla birlikdə öz iqamətgahına dəvət etdi və biz həmin gecəni çox gözəl, əsl dostluq şəraitində keçirdik, ayrılanda da doğma adamlar kimi ayrıldıq.
Mən Heydər Əliyev ilə ikinci dəfə 1980-ci ildə Bakıda eynilə bu cür yubileydə görüşdüm.
O vaxtki Ukrayna Ali Soveti Rəyasət Heyətinin sədri A.Vatçenkonun başçılıq etdiyi nümayəndə heyətinə MK-nın katibi kimi mən də daxil idim. Heydər Əliyev bizi hava limanında qarşıladı. Bir-birimizi görməyimizə çox şad olduq. Mən ona “siz”, o isə mənə “sən” deyə müraciət edirdik.
Sonra tale bizi kədərli bir hadisə ilə əlaqədar 1986-cı ildə Novorossiyskdə görüşdürdü.
“Admiral Naximov” sərnişin gəmisinin düçar olduğu faciəli hadisədən, - bu, Heydər Əliyevə bir dərd oldu, - sonra o, həlak olanların övladlarının ali məktəblərə daxil olması, ailələrinin isə mənzil alması üçün əlindən gələn köməyi əsirgəmədi. Biz bir daha gördük və hiss etdik ki, Heydər Əliyev çox həssas qəlbli və son dərəcə alicənab bir insan və rəhbərdir”.
AZƏRTAC-ın Kiyevdəki xüsusi müxbiri Ukrayna siyasətinin ağsaqqalı Y.Poqrebnyakdan Heydər Əliyevin Azərbaycanda yüksək dövlət vəzifəsinə namizədliyini yenidən irəli sürmək qərarına öz münasibətini bildirməyi xahiş etdi.
Yakov Petroviç dedi:
- İndi müstəqil dövlətlər olan keçmiş Sovet İttifaqı respublikalarının düşdükləri qeyri-sabit vəziyyəti nəzərə alsaq, görərik ki, Heydər Əliyev vəziyyəti sabitləşdirməyə qadir olan yeganə namizəddir, çünki Azərbaycanda hakimiyyətə az səriştəli, az savadlı adam gəlsə, Azərbaycan xalqı üçün arzuolunmaz bəlalar yarana bilər.
Təbii ki, Ukrayna və digər ölkələr kimi, Azərbaycan da müstəqil, demokratik dövlət olaraq təşəkkül yoluna hələ təzə qədəm qoymuşdur. Buna görə də onun güclü rəhbərə ehtiyacı var. Heydər Əliyevi 20 ildən artıq bir müddətdə tanıdığıma görə, onun siyasətçi və diplomat kimi keyfiyyətlərinə bələd olduğuma görə hesab edrəm ki, o, Naxçıvandan qayıdıb, ölkədə vəziyyəti sabitləşdirdiyi vaxtda olduğu kimi, indi də Azərbaycana çox gərəkdir.
Heydər Əliyevin kiçik dostu kimi mənim fikrim belədir. Mənim fikrim isə onun şəxsi keyfiyyətlərinə bələdliyimə əsaslanır. Mən Heydər Əliyevə möhkəm cansağlığı diləyirəm. Qoy, o, xalqının bu kəşməkəşli dövründə ona arxa-dayaq olsun. Mən onun Prezident seçilməsini də arzu edirəm!
Y.Poqrebnyak sözünün sonunda dedi: ”Heydər Əliyev Azərbaycana hələ uzun illər gərək olacaqdır!”
X X X
“Admiral Naximov” sərnişin gəmisinin qəzaya uğramasından zərərçəkənlərə yardım göstərilməsi üzrə Sov.İKP MK komissiyasının sədri Heydər Əliyev və Ukrayna qrupunun rəhbəri Yakov Poqrebnyak (soldan birinci) onların qohumları ilə görüşdə. Novorossiysk. 1986-cı il.
