ELM VƏ TƏHSİL
AMEA-da “Vətən müharibəsində Azərbaycan qadını” mövzusunda konfrans keçirilib
Bakı, 27 oktyabr, AZƏRTAC
AMEA-nın Humanitar və İctimai Elmlər Bölməsi və Qadınlar Şurasının birgə təşkilatçılığı ilə “Vətən müharibəsində Azərbaycan qadını” mövzusunda konfrans keçirilib.
Bu barədə AZƏRTAC-a AMEA-dan bildirilib. Tədbiri AMEA-nın vitse-prezidenti akademik İsa Həbibbəyli açaraq 44 günlük Vətən müharibəsini siyasi, diplomatik, humanitar aspektlərdən qiymətləndirib. Qeyd edib ki, Azərbaycanın tarixi Qələbəsində Prezident İlham Əliyevin diplomatik məharəti, prinsipiallığı, dəqiq və məqsədyönlü siyasəti böyük rol oynayıb: “Dövlət başçısı bütün platformalarda Ermənistanın işğalçılıq siyasətinə qarşı mübarizəyə rəhbərlik etdi. Azərbaycan xalqının mənafeyinin qətiyyətli müdafiəsi, məqsədyönlü, ardıcıl siyasət, xalqın həmrəyliyi və Ali Baş Komandan ətrafında sıx birləşməsi nəticəsində tarixi Qələbə qazanıldı”.
Akademik müharibədə qadınların rolu məsələsinə də toxunub. O, müharibəyə qadın gözü ilə baxmaq və bu mövzuda elmi-tədqiqat işlərində qadın yanaşmalarını aktuallaşdırmağın əhəmiyyətini vurğulayıb.
Azərbaycanın şəhid həkimi, Milli Qəhrəman Gültəkin Əsgərovanın qızı Əminə Axundova anası ilə bağlı xatirələrini bölüşüb. Şəhid övladı vətənpərvərlik mövzusuna xüsusi toxunub, tarixi Qələbədən sonra Şuşaya səfər etdiyini söyləyib.
AMEA Qadınlar Şurasının sədri professor Rəna Mirzəzadə isə “Mehriban xanım Əliyevanın Qarabağın dirçəlişində humanitar missiyası” mövzusunda danışıb: “Müharibənin ilk günlərindən Birinci vitse-prezident hamını həmrəyliyə, mübarizliyə çağırdı. Onun çağırışları xalqı həmrəyliyə, şanlı Ordumuzu qələbəyə ruhlandırdı. Müharibədən sonra dövlət başçısı ilə Qarabağa çoxsaylı səfərlər, Heydər Əliyev Fondunun təşkilatçılığı ilə “Xarıbülbül” festivalı birinci xanımın xidmətləri sırasında xüsusi yer tutur. Mehriban Əliyevanın rəhbərlik etdiyi Heydər Əliyev Fondu Vətən müharibəsi zamanı şəhid olan hərbçilərin ailəsini diqqət mərkəzində saxlayır, qazilərimizin müalicə və reabilitasiya məsələlərinə xüsusi qayğı ilə yanaşır”.
Konfransda AMEA Rəyasət Heyəti aparatının Elmi irs şöbəsinin müdiri Zemfira Hacıyeva “Azərbaycan qadını İkinci Dünya müharibəsi illərində”, Qadınlar Şurası İdarə Heyətinin üzvü Ziba Ağayeva “Vətən müharibəsində qadınlar”, Rəyasət Heyəti aparatının Doktorantura sektorunun müdiri dosent Tubuxanım Qasımzadə “Azərbaycan qadını və hərbi iş”, Nizami Gəncəvi adına Ədəbiyyat İnstitutunun baş elmi işçisi Mərziyyə Nəcəfova “Poeziyamızın Qarabağ savaşı - Vətən müharibəsi” mövzularında çıxış ediblər.
Ədəbiyyat İnstitutunun şöbə müdiri professor Vüqar Əhməd şeirin, sənətin müharibədən əvvəlki dövrdə, eləcə də müharibə ərzində xalqda yaratdığı böyük ruh yüksəkliyindən danışıb.
Tədbir akademik İsa Həbibbəylinin yekun nitqi ilə başa çatıb.