MƏDƏNİYYƏT
“AZƏRBAYCANIN ABİDƏLƏRİ UŞAQLARIN GÖZÜ İLƏ”
Azərbaycan Mədəniyyətinin Dostları Fondunun prezidenti Mehriban xanım Əliyeva açılış mərasimində iştirak etmişdir.
Respublikamızın tanınmış mədəniyyət və incəsənət xadimlərinin, xarici ölkələrin səfirliklərinin də iştirakı ilə keçirilən açılış mərasimində mədəniyyət naziri Polad Bülbüloğlu, Rəssamlar İttifaqının sədri Fərhad Xəlilov çıxış etdilər.
Qeyd olundu ki, sərgidə 5-16 yaş arasında 100-dən artıq uşağın təsviri sənətin müxtəlif janrlarında 150-yə yaxın əl işi nümayiş etdirilir. Bədii səviyyəsinə görə diqqəti cəlb edən əsərlərin müəllifləri təkcə Bakı məktəbliləri deyil, onların arasında respublikamızın bütün bölgələrinin təmsilçiləri də vardır. Azərbaycanın mədəni irsinə saf uşaq məhəbbəti və səmimiyyəti ilə seçilən işlər uşaqlarımızın vətən sevgisindən, onların gələcəkdə yaxşı fırça ustası kimi yetişəcəklərindən xəbər verir.
Mərasimdə belə sərgilərin respublkamızın müxtəlif bölgələrində də açılmasının əhəmiyyəti vurğulandı.
Tədbirin keçirilməsində Azərbaycan Mədəniyyətinin Dostları Fondunun və onun prezidenti Mehriban Əliyevanın xüsusi xidmətlərini vurğulayan natiqlər bildirdilər ki, Fondun sifarişi ilə sərgidəki əsərlərin yüksək poliqrafik səviyyədə kataloqu hazırlanmışdır.
Mehriban xanım Əliyevanın kataloqa yazdığı ön sözdə uşaqlara müraciətlə deyilir:
“Dünyanın ən tanınmış mədəniyyət ocaqlarından biri də bizim doğma Vətənimiz, Azərbaycandır. Qədim və müasir incəsənətimizin gözəl nümunələri bir çox ölkələrdə məşhurdur. Azərbaycan torpağı tarixin hər bir dövründə dünya mədəniyyəti xəzinəsinə görkəmli şəxsiyyətlər bəxş etmişdir. İstedadlı Azərbaycan xalqının yaratdığı mədəniyyət inciləri onları görənləri heyran etmiş, bu əsərlərin sorağı bütün yer kürəsinə yayılmışdır.
Bu inciləri yaratmaq nə qədər çətindirsə, onları qoruyub saxlamaq, nəsildən-nəslə ərməğan etmək də asan iş deyil. Başqa mədəniyyət nümunələri kimi, memarlıq abidələrinin də yaşaması üçün bir çox insanlar böyük zəhmət çəkmiş, ayrı-ayrı zamanlarda daşdan yaradılmış əsərlərin bugünkü nəslə çatdırılması yolunda xeyli işlər görmüşlər.
Bu gün siz də bu insanlar sırasındasınız. Mən inanıram ki, sizin istedadınız, çəkdiyiniz rəsmlər, milli memarlıq incilərimizi zərif uşaq əlləriniz ilə təsvir etməyiniz o deməkdir ki, siz doğma vətəninizi sevir, onun gözəlliklərinin yaşaması üçün çalışırsınız.
Əziz balalar, sizə uğurlar arzulayıram!”
Sərgi iştirakçılarının hamısına hədiyyələr və kataloq təqdim olundu.
Kataloq uşaqlarda böyük sevinc doğurdu və onlar bunu əziz xatirə kimi saxlayacaqlarını bildirdilər.
Mehriban Əliyeva sərginin eksponatlarına baxdıqdan sonra yeniyetmə istedadlarla və onların valideynləri ilə söhbət etdi, uşaqlara avtoqraf verdi. O, səfirlərlə və onların xanımları ilə də görüşdü.
Axırda “Bəri bax” vokal qrupunun konserti oldu.
Mehriban Əliyeva sərgi iştirakçıları ilə xatirə şəkli çəkdirdi.