AZƏRTAC xəbər verir ki, Dominikan Respublikasında cüdo üzrə gənclər arasında dünya çempionatı başa çatmışdır.

73 ölkədən 429 idmançının yarışdığı birincilikdə Azərbaycanı baş məşqçi Ağayar Axundzadə və məşqçi Hacıağa Hacıəhmədovun rəhbərliyi ilə iki cüdoçu təmsil etmişdir. 60 kiloqram çəkidə yarışan Nicat Şıxəlizadə ardıcıl olaraq, Haiti, Ermənistan, Yunanıstan və Sloveniya idmançılarını məğlub etmişdir. Finalda yaponiyalı Suzuki Masanoriyə “ippon” fəndi ilə qalib gələn Nicat Şıxəlizadə dünya çempionu adını qazanmışdır.

Daha bir cüdoçumuz Elnur Məmmədli (73 kq) isə ilk iki görüşdə Finlandiya və Danimarka idmançılarına qalib gəlsə də, Koreya cüdoçusuna məğlub olmuşdur. Təsəlliverici görüşlərdə uğurla çıxış edən idmançı, 3-cü yer uğrunda qarşılaşmada rusiyalı Şirazudin Məhəmmədova uduzaraq 5-ci yerlə kifayətlənməli olmuşdur.

Bu nəticə ilə Azərbaycan yığması qeyri–rəsmi komanda hesabında 73 ölkə arasında 8-ci yeri tutmuşdur.