Dövlət Gömrük Komitəsində narkotiklərin qanunsuz dövriyyəsi və qaçaqmalçılığın qarşısının alınması istiqamətində mübarizəni daha da gücləndirmək məqsədi ilə Cənubi Qafqazda Narkotiklərə Nəzarət Proqramının (SCAD) və Körfəz dövlətlərinin AQFUND Fondu tərəfindən Azərbaycan gömrük xidmətinə verdiyi ümumi dəyəri 535 milyon manatdan çox olan avadanlığın təqdimat mərasimi keçirilmişdir.

Dövlət Gömrük Komitəsinin mətbuat xidmətindən AZƏRTAC-a bildirmişlər ki, komitənin sədri, gömrük xidməti general-polkovniki Kəmaləddin Heydərov çıxış edərək əməkdaşlığın real nəticələrinə görə SCAD proqramına təşəkkür etmiş, gömrük orqanlarının qaçaqmalçılığa, narkotik vasitələrin qeyri-qanuni dövriyyəsinə qarşı mübarizədə verilən avadanlığın əhəmiyyətindən danışmışdır.

Komitənin sədri bu yaxınlarda Azərbaycan Prezidenti İlham Əliyevin sahibkarlarla görüşdə qarşıya çox önəmli vəzifələr qoyduğunu, qaçaqmalçılığa qarşı mübarizəni gücləndirmək üçün mühüm tapşırıqlar verdiyini, bu məsələlərin kollegiya iclasında geniş müzakirə olunaraq konkret iş planı müəyyənləşdirildiyini və həmin istiqamətdə ciddi addımlar atıldığını diqqətə çatdırmışdır.

Narkotiklərlə qətiyyətli və barışmaz mübarizə istiqamətində görülən işlərdən danışan Kəmaləddin Heydərov, Azərbaycan ərazisi vasitəsi ilə narkotiklərin qanunsuz dövriyyəsinin qarşısını almaq üçün bir sıra məqsədyönlü tədbirlərin həyata keçirildiyini vurğulamışdır. Komitənin sədri demişdir ki, gömrük orqanları müasir texniki nəzarət və nəqliyyat vasitələri ilə təchiz olunmuş, qabaqcıl təcrübənin öyrənilməsi və tətbiqi, peşəkar gömrükçülərin hazırlığı məqsədi ilə seminarlar və treninqlərin keçirilmiş, müasir standartlara uyğun Regional Tədris Mərkəzi və Kinoloji Mərkəz istifadəyə verilmişdir. Bütün bunlarla yanaşı, biz SCAD proqramı tərəfindən göstərilən texniki yardımları yüksək qiymətləndiririk. Bugünkü təqdimatı da əməkdaşlığın davamı kimi səciyyələndiririk və əminik ki, bu avadanlıq gömrükçülərin gələcək fəaliyyətində önəmli rol oynayacaqdır.

SCAD proqramının milli əlaqələndiricisi Məzahir Əfəndiyev mərasimdə çıxış edərək Avropa İttifaqı tərəfindən maliyyələşdirilən Cənubi Qafqazda Narkotiklərə Nəzarət Proqramının əsas istiqamətlərindən danışaraq demişdir ki, onlardan biri də sərhədlərin mühafizəsi və bu beynəlxalq qurumun Dövlət Gömrük Komitəsi ilə əməkdaşlığa üstünlük verməsidir. Azərbaycan müstəqillik əldə etdikdən sonra Dövlət Gömrük Komitəsinin işini ən müasir səviyyədə qurması birmənalı olaraq Avropa Birliyi ölkələri tərəfindən xüsusi diqqətdə saxlanılır. Son üç ildə beynəlxalq təşkilatların hesabatlarında DGK-da aparılan islahatlar çox yüksək qiymətləndirilmişdir. Bunun nəticəsi olaraq hər il DGK-ya və Azərbaycan hökumətinə sərhədlərin mühafizəsini gücləndirmək üçün ayrılan vəsaitin məbləği artırılır.

Son üç ildə Azərbaycana SCAD çərçivəsində narkotiklərin qaçaqmalçılığının qarşısının alınması üçün təkcə Avropa İttifaqının Yardım Komissiyası vəsait ayırırdısa, artıq bu işə BMT-nin Narkotiklərə Nəzarət Proqramı da Azərbaycana xüsusi regional gömrük xidməti yaratmaqdan ötrü 800 min dollar verilməsini nəzərdə tutub. BMT-nin Narkotiklərə Nəzarət Proqramının rəhbəri Antonio Mario Kostanın respublikamızda səfərdə olarkən Azərbaycan Prezidenti İlham Əliyevlə keçirdiyi görüşə diqqəti yönəldən M. Əfəndiyev demişdir ki, Dövlət Gömrük Komitəsinin rəhbərliyinin məqsədyönlü fəaliyyəti nəticəsində qısa müddətdə ölkənin sərhədlərinin mühafizəsinin dünya səviyyəsinə çatması üçün böyük işlər görmüşdür. Bütün bunların nəticəsi olaraq Avropa Birliyinin dövlətləri artıq Azərbaycanla əməkdaşlığa daha çox üstünlük verirlər.

Azərbaycanda olmuş beynəlxalq ekspertlərin yerli gömrük orqanlarının fəaliyyəti ilə tanışlıqdan sonra zəruri avadanlığın alınıb təhvil verilməsinin planlaşdırıldığını deyən M. Əfəndiyev, bu gün təqdim olunan texniki vasitələrin gömrük əməkdaşlarının gündəlik işində önəmli rol oynayacağını bildirmişdir. O demişdir ki, əməkdaşlığın davamı olaraq aprel ayında Qaçaqmalçılıq və Gömrük Qaydalarının Pozulması ilə Mübarizə Baş İdarəsinin 40 əməkdaşı üçün yeni avadanlıqdan istifadə qaydalarını, eyni zamanda Avropa təcrübəsini özündə əks etdirən təlim kursları təşkil ediləcəkdir.

Milli əlaqələndirici onu da bildirmişdir ki, aprel ayından etibarən Avropa İttifaqı 2004-2006-cı illər üçün Azərbaycana 2,2 milyon avro vəsait ayıracaqdır. Bu vəsaitin 200 min avrosu DGK üçün planlaşdırılıb. Burada yenilik ondan ibarətdir ki, biz apreldən etibarən DGK –nın müəyyən etdiyi hava limanlarında narkotiklərlə mübarizənin təşkili üçün xüsusi qurğunun yaradılmasına çalışacağıq.

M. Əfəndiyev belə maraqlı faktı da diqqətə çatdırmışdır ki, bu günlərdə Bakıda “Böyük İpək yolu dövlətlərində narkotik vasitələrin qanunsuz dövriyyəsinə qarşı mübarizə” mövzusunda keçirilən konfransda iştirak edən Avropa İttifaqı Yardım Komissiyasının narkotiklərlə bağlı bölməsinin rəhbəri Soren Klem Bakı dəniz limanının gömrük məntəqəsi üçün dəyəri 1 milyon dollardan yuxarı olan xüsusi rentgen aparatının alınması üçün Avropa İttifaqının rəhbərliyi qarşısında məsələ qaldırıb. Bu fikrə o, Dövlət Gömrük Komitəsinin sədri ilə keçirdiyi görüşdən sonra gəlmişdir.

DGK Qaçaqmalçılıq və Gömrük Qaydalarının Pozulması ilə Mübarizə Baş İdarəsinin rəisi Güloğlan Muradov verilən avadanlıqla bağlı fikrini açıqlamış, slaydın köməkliyi ilə baş idarə tərəfindən hazırlanan məlumatı diqqətə çatdırmışdır. Sonda həmin avadanlıq Bakı Baş Gömrük İdarəsinin, Hava Nəqliyyatında Baş Gömrük İdarəsinin, Astara, Biləsuvar, Xaçmaz, Tovuz, Balakən və digər gömrükxanaların rəislərinə təqdim olunmuşdur.

Qeyd edək ki, narkotiklərin və digər qadağan olunmuş maddələrin axtarışı üçün xüsusi cihazlardan, endeskoplardan, narkotiklərin növünü müəyyən etmək üçün ekspres laboratoriyadan, rabitə vasitələrindən, video və foto aparatlardan, gecə görmə cihazlardan və digər vasitələrdən ibarət həmin avadanlıq qaçaqmalçılığa qarşı daha səmərəli mübarizə aparmağa imkan yaradacaqdır.