RƏSMİ SƏNƏDLƏR

Azərbaycan Respublikası Prezidentinin 11 fevral 2004-cü il tarixli 24 nömrəli Fərmanı ilə təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)” ölkənin bütün regionlarında uğurla həyata keçirilir.

Dövlət Proqramının icrası nəticəsində şəhər və rayonlarda təhsil və səhiyyə sistemi möhkəmləndirilir, sahibkarlığın inkişafı üçün əlverişli şərait yaradılır, iş yerləri açılır, infrastruktur yenidən qurulur və iqtisadiyyatın dinamik inkişafı təmin edilir.

Lakin görülmüş işlərlə yanası, Daşkəsən rayonunun sosial-iqtisadi həyatında həlli vacib olan bir sıra problemlər hələ də qalmaqdadır.

Qeyd edilənləri nəzərə alaraq, Azərbaycan Respublikasının Daşkəsən rayonunun sosial-iqtisadi inkişafının sürətləndirilməsini təmin etmək məqsədi ilə qərara alıram:

1. “Azərbaycan Respublikasının Daşkəsən rayonunun sosial-iqtisadi inkişafının sürətləndirilməsinə dair Tədbirlər planı” təsdiq edilsin (əlavə olunur).

2. Azərbaycan Respublikasının Nazirlər Kabinetinə tapşırılsın ki:

- bu Sərəncamın 1-ci bəndi ilə təsdiq edilən Tədbirlər planının həyata keçirilməsi ilə əlaqədar mütəmadi olaraq Azərbaycan Respublikasının Prezidentinə məlumat versin;

- öz səlahiyyətləri daxilində bu Sərəncamdan irəli gələn məsələləri həll etsin.

3. Bu Sərəncam imzalandığı gündən qüvvəyə minir.

İlham Əliyev

Azərbaycan Respublikasının Prezidenti

Bakı şəhəri, 13 iyun 2006-cı il