SİYASƏT
AZƏRBAYCAN RESPUBLİKASI XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
BMT Baş Assambleyasının 57-ci sessiyasında Azərbaycan nümayəndə heyətinə başçılıq edən xarici işlər naziri Vilayət Quliyev sentyabrın 18-də GUÖAM ölkələrinin xarici işlər nazirlərinin görüşündə iştirak etmişdir.
Görüş zamanı GUÖAM-ın inkişafı və əməkdaşlıq məsələləri, habelə GUÖAM ölkələri dövlət başçılarının ikinci Yalta zirvə toplantısında əldə etdikləri razılaşmaların həyata keçirilməsi müzakirə edilmişdir. Nazirlər GUÖAM dövlətlərinin terrorizmlə mübarizə, mütəşəkkil cinayətkarlıq, sərhədlərə nəzarətin gücləndirilməsi, nəqliyyat dəhlizlərinin təhlükəsizliyi və səmərəli fəaliyyətinin təmin edilməsi sahəsində əməkdaşlığının vacibliyini vurğulamışlar. Görüşün yekunu olaraq GUÖAM dövlətləri xarici işlər nazirləri tərəfindən rəsmi bəyanat qəbul edilmişdir.
Həmin gün GUÖAM ölkələrinin xarici işlər nazirləri və RİO qrupunun (Argentina, Braziliya, Çili, Kolumbiya, Kosta-Rika, Dominikan Respublikası, Ekvador, Salvador, Qvatemala, Honduras, Meksika, Nikaraqua, Peru, Uruqvay, Venesuela, Panama, Paraqvay, Boliviya) xarici işlər nazirləri arasında görüş keçirilmişdir. Görüş zamanı GUÖAM və RİO qrupu arasında ticarət, nəqliyyat, enerji və təhlükəsizlik sahələrində əməkdaşlığın qurulması yolları ilə bağlı fikir mübadiləsi aparılmışdır. Həmçinin, gələcəkdə belə bir formatda görüşlərin keçirilməsi barədə razılıq əldə edilmişdir.
Sentyabrın 18-də V.Quliyev BMT-nin İnkişaf Proqramının Avropa və MDB üzrə regional bürosunun direktoru Kalma Mejey ilə görüşmüşdür. Görüş zamanı Azərbaycan və BMT-nin İnkişaf Proqramı arasında mövcud olan əməkdaşlıq, habelə Azərbaycanda məskunlaşmış qaçqın və məcburi köçkünlərin vəziyyətinin yaxşılaşdırılması istiqamətində konkret layihələrin işlənib hazırlanmasının vacibliyi barədə fikir mübadiləsi aparılmışdır.
Həmin gün Azərbaycan Respublikasının xarici işlər naziri Vilayət Quliyevin başçılıq etdiyi nümayəndə heyəti Vaşinqtona işgüzar səfərə yola düşmüşdür.