Xırdalan, 26 mart, Ətrabə Rzayeva, AZƏRTAC

Artıq beşinci ildir ki, Azərbaycanın orta ümumtəhsil məktəblərinin 9-11-ci sinif şagirdlərinin “Ölkəmizi tanıyaq” devizi altında Vətənimizin müxtəlif bölgələrinə maarifləndirici tur-aksiyaları təşkil olunur. Dövlətimizin başçısı İlham Əliyevin tövsiyəsinə əsasən keçirilən tur-aksiyalar ənənə halını alıb.

AZƏRTAC xəbər verir ki, martın 26-da “Ölkəmizi tanıyaq” tur-aksiyasının Abşeron rayonundan olan iştirakçılarının Gəncə-Şəmkir-Göygöl marşrutu üzrə yolasalma mərasimi keçirilib. Rayonun IX-XI siniflərindən olan 40 şagird dörd gün ərzində marşrutu üzrə bölgənin görməli yerləri ilə tanış olacaqlar.

Səyahətə yola düşməzdən əvvəl məktəblilər Xırdalan şəhərində yerləşən Heydər Əliyev parkında ümummilli liderin abidəsini ziyarət edib, önünə gül dəstələri düzüblər.

Heydər Əliyev Mərkəzində keçirilən yolasalma mərasimində layihənin məqsədindən danışan rayon icra hakimiyyəti başçısının müavini Fuad Cəbrayılov şagirdləri ölkəmizin müxtəlif bölgələrinin müasir həyatı, tarixi, mədəni irsi, adət-ənənələri, özünəməxsus xüsusiyyətləri, ümummilli lider Heydər Əliyevin qurub-yaratdığı müstəqil Azərbaycanın nailiyyətləri ilə yaxından tanış etmək, Prezident İlham Əliyevin qətiyyəti və iradəsi ilə respublikamızın dinamik sosial-iqtisadi inkişafı, gündən-günə abadlaşan şəhər və rayonlarımızın yeniləşən siması barədə gənclərdə əyani təsəvvür yaratmaq olduğunu vurğulayıb.

Bildirilib ki, tur-aksiya ölkəmizin tarixinin, mədəniyyətinin, adət-ənənələrinin, müstəqillik illərində əldə olunmuş nailiyyətlərin öyrənilməsində, tədrisdə qazanılan nəzəri biliklərin möhkəmlənməsində önəmli rol oynayacaq, səfərin xoş təəssüratları şagirdlərin mənəvi zənginliyini daha da artıracaq.

Yolasalma mərasimində iştirak edən Abşeron rayon təhsil şöbəsinin müdiri Nazilə Məmmədova qeyd edib ki, tur-aksiyanın iştirakçıları marşrut və proqramla bağlı tam təlimatlandırılıb. Məktəbliləri 4 müəllim və bir həkim müşayiət edir.

Çıxışlarda vurğulanıb ki, Prezident İlham Əliyevin təşəbbüsü ilə reallaşan və hər kəs tərəfindən bəyənilən “Ölkəmizi tanıyaq” layihəsi gənc və yeniyetmələrin vətənpərvərlik tərbiyəsinin daha da yüksəldilməsində, dünyagörüşünün formalaşmasında mühüm rol oynayacaq.

Abşeronlu tur-aksiya iştirakçıları dörd gün ərzində Gəncə-Göygöl-Şəmkir istiqaməti üzrə səfər edəcək, bu bölgədə genişmiqyaslı quruculuq işləri, maddi-mənəvi irsin qorunması və bərpası istiqamətində həyata keçirilən önəmli sosial layihələr, həmçinin 200 il əvvəl salınan alman məskənləri ilə tanış olacaqlar.

Məktəblilər əvvəlcə Azərbaycanın ikinci ən böyük şəhəri Gəncənin sosial-iqtisadi və mədəni həyatı ilə ətraflı tanış olacaqlar. Tur-aksiyanın iştirakçıları şəhərin tarixi məkanlarına - Cavadxan məqbərəsi, Cümə məscidi, Şah Abbas məscidi, Çökək hamam, Xan bağı, Qədim Qala divarları, “İmamzadə” kompleksi, Comərd Qəssab türbəsi, Nizami Gəncəvi məqbərəsi və Gəncə Dövlət Filarmoniyasının yeni binasına ekskursiya edəcək, Şəmkir rayonunda “Orta əsr Şəmkir şəhəri”, “Abidələr” parkı, Alman kilsəsi, Göygöl rayonunda Alman kirxası, sonuncu alman Viktor Klaynın ev-muzeyi ilə tanış olacaq, Hacıkənd qəsəbəsinə, Göygöl Milli Parkına və Şəmkir şəhərində səfər edəcəklər.

Məktəblilər “Ölkəmizi tanıyaq” layihəsində iştirak etməklə Vətənimizin tarixi məkanları, bölgələrimizin sosial-iqtisadi həyatı barədə zəngin bilik əldə edəcəklərinə əmin olduqlarını vurğulayıblar.

Sonda şagirdlər avtobusla Gəncəyə yola düşüblər.