REGİONLAR
Açıq səma altında Naxçıvan Döyüş Şöhrəti Muzeyi maraqlı eksponatlarla zəngindir
Naxçıvan, 26 oktyabr, AZƏRTAC
Naxçıvan şəhərində diqqəti cəlb edən məkanlardan biri də açıq səma altında gənclərin hərbi-vətənpərvərlik tərbiyəsində mühüm rol oynayan Naxçıvan Döyüş Şöhrəti Muzeyidir. Muzey Azərbaycan Silahlı Qüvvələrinin 100-cü ildönümü ərəfəsində yaradılıb.
AZƏRTAC-ın Naxçıvan bürosu xəbər verir ki, muzey 26 adda eksponatla fəaliyyətə başlayıb. Bu ilin iyun ayında eksponatların sırasına 3 yeni aviasiya texnikası daxil edilib. Beləliklə, hazırda muzeydə silah və texnika nümunələrinin sayı artırılaraq 40-a çatdırılıb. Yeni eksponatlardan 2 təlim təyyarəsi gənc pilotların hazırlanmasında istifadə olunub, döyüş-nəqliyyat vertolyotu isə Birinci Qarabağ müharibəsində şərəfli döyüş yolu keçib.
Ümumi sahəsi 13 min kvadratmetr olan muzeydə silah, texnika və qurğular – haubitsa, top və minaatanlar, hava hücumundan müdafiə üzrə döyüş maşınları, zenit raket və qurğuların nümayiş olunur. Burada “Mi-8T” döyüş-nəqliyyat vertolyotu, yerqazan və maneələğvetmə maşınları, tanklar, piyadanın döyüş maşınları, zirehli transportyor və döyüş kəşfiyyat maşınları, dartıcılar, eləcə də müxtəlif hərbi təyinatlı avtomobillər də yer alıb.
Muzeydə nümayiş etdirilən hərbi texnikaların hər birinin yanında məlumat lövhələri qoyulub. Həmin lövhələrdə nümayiş etdirilən texnikaların istehsal ili, istifadə sahələri, texniki xüsusiyyətləri, döyüşlərdə iştirakı haqqında məlumatlar yerləşdirilib. Xüsusilə qeyd etmək lazımdır ki, bu gün burada nümayiş etdirilən hərbi texnikalar hazırda bir çox ölkələrin ordularında, eləcə də erməni hərbi birləşmələrində istifadə olunmaqdadır. Lakin ölkəmizin iqtisadi gücünün nəticəsində bu gün ordumuzun arsenalı müasir tələblərə yüksək səviyyədə cavab verən milli və dünyanın aparıcı silah sənayelərinin istehsalı olan hərbi texnikalarla təchiz olunub.
Naxçıvan şəhərindəki Döyüş Şöhrəti Muzeyi maraqlı eksponatları ilə bu gün həm şəhər sakinlərinin, həm də muxtar respublikamıza gələn turistlərin diqqətini özünə cəlb edir.