Bakı, 3 dekabr, AZƏRTAC

Əmək və Əhalinin Sosial Müdafiəsi Nazirliyinin Əlilliyi olan şəxslər üçün Şağan Müalicə Pansionatında 3 Dekabr - Beynəlxalq Əlillər günü ilə əlaqədar tədbir keçirilib.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, tədbirdə respublikamızda həyata keçirilən sosial siyasətin mühüm bir istiqamətinin əlilliyi olan şəxslərin sosial müdafiəsinin gücləndirilməsinə, onların reabilitasiyasına yönəldiyi vurğulanıb.

Qeyd olunub ki, Azərbaycan Prezidenti İlham Əliyevin sosial cəhətdən həssas əhali qruplarına yüksək diqqət və qayğısı əlilliyi olan insanların da rifah halının yaxşılaşdırılması, tibbi-sosial reabilitasiyası sahəsində aparılan işlərin ildən-ilə güclənməsinə şərait yaradıb. Bu qəbildən olan insanlar sosial müavinət və Prezident təqaüdləri, əmək pensiyaları ilə təmin edilirlər. Əvvəlki illərdə olduğu kimi, cari ildə də Azərbaycan Respublikası Prezidentinin müvafiq Fərmanları və Sərəncamı ilə sosial müavinət və pensiyaların artırılması təmin edilib.

Tədbirdə Əmək və Əhalinin Sosial Müdafiəsi Nazirliyi tərəfindən müharibə əlilləri və onlara bərabər tutulan şəxslərin mənzil və minik avtomobilləri, reabilitasiya vasitələri ilə təmin olunması sahəsində görülən işlər, bu qəbildən olan vətəndaşların cəmiyyətə inteqrasiyası məqsədilə həyata keçirilən tədbirlər diqqətə çatdırılıb. Bildirilib ki, əlilliyi olan şəxslərin sağlamlıqlarının bərpası, bu məqsədlə onların bərpa-müalicə tədbirlərinə cəlb olunması nazirliyin əsas fəaliyyət istiqamətlərindən biridir. Nazirliyin əlilliyi olan şəxslər üçün 15 bərpa-müalicə müəssisəsində təkcə bu ilin 10 ayında 19 400 nəfərdən çox əlilliyi olan şəxs bərpa-müalicə və protez-ortopedik xidmətlərlə təmin edilib. Bu dövrdə onlara 28 687 protez-ortopedik məmulat və reabilitasiya vasitəsi, o cümlədən 1 108 ədəd əlil arabası, 597 ədəd eşitmə aparatı və s. verilib. Keçən il və cari ilin ötən dövründə 400 nəfərə yaxın əlilliyi olan şəxsin və sağlamlıq imkanları məhdud uşağın nazirlik tərəfindən xaricdə ixtisaslaşmış bərpa-müalicəsi təşkil olunub.

Pansionatın direktoru Pərvanə Hacıyeva əlilliyi olan şəxslərin səmərəli bərpa-müalicə xidmətləri ilə təmin olunması yönündə müəssisədə aparılan işlər barədə məlumat verib. O bildirib ki, 250 çarpayılıq pansionatda əlilliyi olan şəxslərin tibbi-sosial diaqnostikası və reabilitasiyası istiqamətində işlər aparılır. Məqsədyönlü fizioterapevtik müalicə üsullarının tətbiq olunduğu pansionatda əlilliyi olan şəxslərin xəstəlikləri nəzərə alınmaqla onların dietik və rasional qidalanması da təşkil edilir. Burada il ərzində orta hesabla 4 minə yaxın əlilliyi olan insana bərpa müalicəsi xidmətləri göstərilir. Onların əksər hissəsini müharibə əlilləri və onlara bərabər tutulan şəxslər təşkil edir.

Tədbirdə pansionatda müalicə olunan əlilliyi olan şəxslər onların həyat şəraitlərinin yaxşılaşdırılması üçün görülən işlərdən razılıqlarını bildiriblər. Onlar bütün sahələrdə qayğı ilə təmin olunmalarına, eyni zamanda əlilliyi olan şəxslər üçün müasir və səmərəli reabilitasiya sisteminin qurulmasına görə Azərbaycan Prezidenti İlham Əliyevə minnətdarlıqlarını ifadə ediblər.