İDMAN
Almaniya yığmasında etnik əlamətlərə görə parçalanma varmı?
Bakı, 4 sentyabr, AZƏRTAC
Futbol üzrə Almaniya yığmasının yarımmüdafiəçisi Tomas Müller 2018-ci il dünya çempionatı dövründə guya bu etnik əlamətlərə görə bir-biri ilə münaqişə edən qruplaşmalara parçalanma olması barədə KİV-lərdə yayılmış xəbərləri təkzib edib. AZƏRTAC TASS agentliyinə istinadla xəbər verir ki, futbolçu bu fikrini çərşənbə axşamı Frankfurt Maynda keçirilən mətbuat konfransında söyləyib.
Müller deyib: “Mən hər hansı parçalanma olmasını inkar edirəm. Anlayıram ki, nəticə olmayanda həmişə nə isə axtarırlar, amma bu axtarış heç də həmişə uğurlu olmur”.
Almaniyada çıxan “Spiegel” həftəliyi avqustun sonunda yazıb ki, dünya çempionatı zamanı Almaniya yığmasının oyunçuları iki düşərgəyə bölündülər. Onlardan birinə əcnəbi oyunçuları, o cümlədən Cerom Boatenq, Məsut Ozil və İlkay Gündoğanı, digər düşərgəyə isə həmin məqalədə “tipik almanlar” adlandırılan Tomas Mülleri, Mats Xummelsi və başqalarını aid edirlər. Jurnal göstərirdi ki, hər iki qruplaşma stereotip ləqəblərdən istifadə edərək bir-birinin həyat tərzini və vərdişlərini lağa qoyurdu.
Müller deyib: “Bir-birini ələ salma haqqında söhbətlər yalandır. Biz yaxşı yola gedirik”.
Almaniya yığması Rusiyada keçirilən dünya çempionatına çempion titulunun sahibi statusunda gəlmişdi. Yoaxim Levin idarə etdiyi komanda İsveç, Meksika və Cənubi Koreya komandaları ilə birgə daxil olduğu F qrupunda iki məğlubiyyətə uğrayaraq dördüncü yeri tutdu və qrupdan çıxa bilmədi.