REGİONLAR


Aqrar Xidmətlər Agentliyinin sədri: Respublika ərazisində əsasən daha təhlükəli olan Mərakeş, Asiya və İtaliya çəyirtkələrinə rast gəlinir

Bakı, 28 aprel, AZƏRTAC

Hacıqabul rayonunda çəyirtkəkimilərə qarşı mübarizəyə hazırlıqla bağlı tədbir keçirilib. Tədbirdə Aqrar Xidmətlər Agentliyinin (AXA) rəhbərliyi, rayon Bitki Mühafizəsi və Fumiqasiya Mərkəzinin əməkdaşları və DAİM-in nümayəndələri iştirak ediblər.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, AXA-nın sədri Mirzə Əliyev tədbirdə çıxış edərək, əsas məqsədin cari ildə xüsusi təhlükəli zərərverici olan çəyirtkəkimilərə qarşı və mübarizə tədbirlərinin vaxtında və düzgün aparılmasını təmin etmək üçün onların yayılma arealını müəyyən etmək, bölgələrdə fitosanitar vəziyyəti nəzarətdə saxlamaq, aparılacaq mübarizə işlərinin həcminin müəyyənləşdirilməsinə dair proqnoz məlumatlarının dəqiqləşdirmək, zərərvericilərin küpələrini aşkar etmək, küpələrdəki yumurtaların bioloji vəziyyətini öyrənmək, texnika və avadanlıqları hazır vəziyyətə gətirməkdən ibarət olduğunu söyləyib.

Qeyd edib ki, hazırda respublika ərazisində çəyirtkələrin, əsasən daha təhlükəli 3 növünə - Mərakeş, Asiya və İtaliya çəyirtkələrinə rast gəlinir. Ölkəmizdə Mərakeş çəyirtkəsi geniş yayılmış və əsasən yovşanlı sahələrdə yaşayıb, çoxalır. Bu çəyirtkənin əsas yayılma mənbələri Ceyrançöl, Haramı duzu, Qarasu, Padarçöl, Küdrü, Hergi düzü, Şirinqum və Acınohur əraziləridir. Ötən il respublikada dövlət büdcəsinin vəsaiti hesabına 176103 hektar ərazidə müşahidə, sürfə və yetkin fərdlərinə qarşı 29844 hektar sahədə isə mübarizə tədbirləri həyata keçirilib. Mübarizə tədbirləri, əsasən Tovuz, Ağstafa, Samux, Şabran, Saatlı, Sabirabad, Biləsuvar və İmişli rayonlarının ərazilərində aparılıb. Dünyada baş verən qlobal iqlim dəyişikliyi ilə əlaqədar çəyirtkəkimilərin miqrasiyası, yayılma ərazilərinin vaxtında müəyyən edilməsində və yeni innovativ texnologiyaları tətbiq etməklə onlara qarşı mübarizə tədbirlərinin vaxtında və düzgün aparılmasında Bitki Mühafizəsi və Fumiqasiya Mərkəzinin əməkdaşlarının üzərinə böyük vəzifələr düşür. Bununla əlaqədar AXA-nın mütəxəssisləri tərəfindən çəyirtkəkimilərin məskunlaşdığı əsas rayonlar üzrə Bitki mühafizəsi və Fumiqasiya (zərərsizləşdirmə) Mərkəzinin yerli mütəxəssislərinə “Çəyirtkəkimilərin bioekologiyası, monitorinqi, idarə edilməsi və dərmanlamaların mənfi təsirinin azaldılması, həmçinin Məlumatların Toplanmasının Avtomatlaşdırılması (ASDC) və idarə edilməsi (CCALM) sistemləri” mövzusu üzrə təlimlər keçirilib.

Tədbirdə çəyirtkəkimilərlə sirayətləmiş ərazilərdə mübarizə işlərinin səmərəli və mütəşəkkil təşkili üçün Aqrar Xidmətlər Agentliyi tərəfindən mobil ultra kiçikhəcmli çiləyici aqreqatlarla təchiz olunmuş 20 ədəd Mitsubishi-L200 markalı avtomaşın, iri tutumlu yerüstü çiləyicilər qoşulmuş 10 ədəd MTZ-892 markalı traktor, 2 ədəd su avtomaşını, geyim dəstləri, toplanılmış məlumatların avtomatlaşdırılmış və idarəetmə sistemlərinə daxil olunması məqsədilə 2 ədəd müasir avadanlıqlarla təmin olunmuş “səyyar xidmət” mikroavtobusu, 4 ədəd dron və yanacaq çəni sirayətlənməyə yaxın olan ərazilərə dislokasiya olunub. Həmçinin kimyəvi mübarizə işlərində istifadə olunacaq preparatlar və digər vasitələr təhlükəsizlik qaydalarına əməl oluması məqsədilə digər vasitələrlə təmin edilib.

Qeyd olunan ərazilərdə çəyirtkələrin mövcud bioloji inkişaf səviyyəsi nəzərə alınmaqla, aprel ayının üçüncü ongünlüyündən etibarən mübarizə tədbirlərinə başlanılması nəzərdə tutulur.

Mübarizə tədbirlərinin səmərəli təşkili üçün texniki vasitə və avadanlıqlar sazlanaraq hazır vəziyyətə gətirilib və mobil dəstələr üzrə qruplaşdırılıb. Tədbir iştirakçıları tərəfindən xüsusi təhlükəli zərərli orqanizm olan çəyirtkəkimilərə qarşı kimyəvi mübarizə işlərinə hazırlıq vəziyyətinin qiymətləndirilməsi məqsədi ilə mübarizəyə cəlb olunan texnika və avadanlıqlara baxış keçirilib və proses əyani nümayiş olunub.

Sonda AXA sədri Mirzə Əliyev çəyirtkələrin kənd təsərrüfatı bitkilərinə vuracaq ziyanın vaxtında qarşısının alınması və mübarizə tədbirlərinin səmərəli həyata keçirilməsi məqsədilə iştirakçılara tapşırıq və tövsiyələrini verib. Mütəxəssisləri maraqlandırılan suallar cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.