Bakı, 7 fevral, AZƏRTAC

Təlim-məşq toplanışı yüksək səviyyədə keçdi. Dağlıq məkanında keçdiyimiz hazırlığın böyük faydası oldu. Əsas fiziki hazırlığa diqqət yetirmişdik. Ancaq taktiki-texniki hazırlığı da unutmamışdıq. Çünki Fransadakı Qran-Pri turnirinə hazırlaşırdıq. Daha sonra 6 güləşçi ilə Nitsa şəhərinə yollandıq.

AZƏRTAC xəbər verir ki, bu sözləri qadın güləşi üzrə milli komandamızın baş məşqçisi Aslan Ağayev deyib.

Bildirib ki, turnirdə 3 medal qazandıq. Alyona Kolesnik (57 kq) və İrina Netreba (65 kq) çempion oldu. Səbirə Əliyeva (76 kq) isə üçüncü yeri tutdu. Əslində digər yığma üzvləri də yaxşı güləşdi. İştirakçı sayı az olduğundan onlar dairəvi sistem üzrə mübarizə apardı. Elmira Qəmbərova (62 kq) üç görüşdə qələbə qazandı, bir qarşılaşmada uduzdu. Ancaq onun qalib gəldiyi rəqib medal qazansa da, Elmira fəxri kürsüyə qalxa bilmədi. Türkan Nəsirovanın (50 kq) nəticəsi isə iki qələbə, iki məğlubiyyət oldu. Tatyana Varantsova (53 kq) gənc güləşçidir. Onu da bu yarışda sınaqdan keçirdik. Pis təsir bağışlamadı, amma üzərində hələ çox işləməlidir.

Təcrübəli mütəxəssis qarşıdakı planlar haqqında danışarkən deyib: “Fevralın 20-dən Türkiyədə növbəti təlim-məşq toplanışına başlayacağıq. Bu dəfə hazırlıq prosesi Ədirnədə baş tutacaq. Gənclər də bizimlə birgə toplanışda iştirak edəcəklər. Onlar oradan 23 yaşadək güləşçilərin Avropa çempionatına yollanacaq. Qalan heyət martın 4-də Vətənə qayıdacaq. Ədirnədə Çin və Monqolustan yığmaları ilə birgə toplanış keçəcəyik. Böyüklərin qitə birinciliyinə qədər daha bir Türkiyə toplanışı gözlənilir. Ancaq son hazırlıq prosesinin Türkiyənin hansı şəhərində keçiriləcəyi hələ məlum deyil.

Yığmamızın çalışdırıcısı yeniyetmələr arasında dünya və Avropa çempionu, Olimpiadanın bürünc medalçısı Şahanə Nəzərovanı da nəzərində saxlayır: “Ədirnə toplanışında Şahanə Nəzərova da iştirak edəcək. Hazırda onun çəkisi 44 kiloqramdır. Çəkisini minimum 50 kiloqrama yüksəltməliyik ki, ən yüngül kateqoriyada iştirak edə bilsin. Bunun üçün ayrıca məşqçi tutmuşuq. Fiziki durumunu istədiyimiz səviyyəyə çatdırmağa və əzələ kütləsini artırmağa çalışırıq”.

Qeyd edək ki, 2019-cu ildə ilk təlim-məşq toplanışını Türkiyənin Kayseri şəhərində keçən qadınlardan ibarət yığmamız hazırlıq prosesini başa vurduqdan sonra Fransanın Nitsa şəhərində təşkil olunan Qran-Pri turnirində qüvvəsini sınayıb.