Bakı, 8 aprel, AZƏRTAC 

Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda 18-ci Azərbaycan Beynəlxalq “Turizm və Səyahət” sərgisində iştirak edən Çin Dövlət Turizm Agentliyinin Moskvadakı nümayəndəliyinin direktor müavini xanım Xuan Yanyan ilə görüş keçirilib.

ADU-dan AZƏRTAC-a bildirilib ki, Konfutsi İnstitutunun direktoru Rafiq Abbasov Çin ilə Azərbaycan arasındakı turizm əlaqələrinin inkişafı üçün əlverişli şəraitin yaradılmasının vacibliyini vurğulayıb, ümummilli lider Heydər Əliyevin Çinə tarixi səfəri zamanı ölkələrimiz arasında turizm sahəsində əməkdaşlıq haqqında imzalanmış müqavilənin əhəmiyyətini diqqətə çatdırıb.

R.Abbasov qeyd edib ki, Azərbaycan və Çinin turizm sahəsində əməkdaşlığının inkişafı Konfutsi İnstitutu üçün olduqca əhəmiyyətli bir işdir. O, Çinin təhsil üzrə turizm sahəsində konsaltinq şirkətlərinin nümayəndələri, çinli səyyah, Beynəlxalq Qızıl Xaç və Qızıl Aypara Cəmiyyətinin elçisi Çen Lianquan ilə keçirilən görüşlərdən danışıb. R.Abbasov, həmçinin Konfutsi İnstitutu ilə Azərbaycan Turizm Assosiasiyası, Azərbaycan Turizm və Menecment Universiteti arasında əməkdaşlıq haqqında müqavilə imzalandığını qeyd edib. Bildirib ki, müqavilənin əsas məqsədi turizm sahəsində əməkdaşlığın inkişafına yardım göstərmək, Azərbaycan və Çinin turizm ehtiyatlarından səmərəli istifadə, o cümlədən bu istiqamətdəki təşəbbüsləri fəal şəkildə dəstəkləmək, ümumi turist şəbəkəsini formalaşdırmaq, turizm üzrə normativ-hüquqi sənədləri təkmilləşdirmək, vahid informasiya şəbəkəsinin tətbiqini təşviq etməkdən ibarətdir.

Xanım Xuan Yanyan Çin bazarında Azərbaycanın turizm məhsulunun və Azərbaycan bazarında Çinin turizm məhsulunun iştirakını, ölkələrimiz arasında dostluq əlaqələrinin möhkəmlənməsi istiqamətində turizm xidməti keyfiyyətinin artırılmasının əhəmiyyətini qeyd edib. O, həmçinin turizm üzrə peşəkar kadrların hazırlanması istiqamətində Azərbaycan-Çin əlaqələrinin inkişaf etdirilməsi, ölkələrimizin turizm təşkilatlarının əməkdaşları arasında iş təcrübəsi mübadiləsi, turizmin müxtəlif problemləri barədə mütəşəkkil elmi tədqiqatlar həyata keçirilməsi və sorğu-məlumat, reklam materiallarının sistematik mübadiləsinin aparılmasının əhəmiyyətini vurğulayıb.

Sonra turizm sektoru üzrə peşəkar kadrların hazırlanması və turizm təşkilatlarının əməkdaşları arasında iş təcrübəsi mübadiləsinin aparılması istiqamətində Azərbaycan-Çin əlaqələrinin inkişafı ilə bağlı fikir mübadiləsi aparılıb.