ELM VƏ TƏHSİL


Azərbaycan Milli Elmlər Akademiyası Çinin elmi qurumları ilə əlaqələrini genişləndirir

Bakı, 29 iyun, AZƏRTAC 

İyunun 29-da Çin Mühəndislik Akademiyasının keçmiş icraçı vitse-prezidenti, akademik Pan Yunhenin başçılıq etdiyi nümayəndə heyəti Azərbaycan Milli Elmlər Akademiyasının (AMEA) prezidenti, akademik Akif Əlizadə ilə görüşüb.

AMEA-dan AZƏRTAC-a bildirilib ki, görüşdə akademik A.Əlizadə qonaqlara akademiyanın yaranma tarixi, inkişaf mərhələləri və müasir dövrdə burada aparılan tədqiqatlar haqqında məlumat verib. Bildirilib ki, 1945-ci ildən fəaliyyətə başlayan bu elm ocağında çalışan alimlər ayrı-ayrı sahələr üzrə mühüm tədqiqatlar aparıb, dünya elminə dəyərli töhfələr veriblər. O, hazırda akademiyada 6 elmi bölmənin fəaliyyət göstərdiyini, bu müəssisələrdə multidissiplinar problemlərin araşdırıldığını, innovativ layihələrin həyata keçirildiyini deyib.

A.Əlizadə ümummilli lider Heydər Əliyevin rəhbərliyi dövründə AMEA-da elmin inkişafı, elmi-texniki potensialın gücləndirilməsi, yüksəkixtisaslı elmi kadrların hazırlanması, eləcə də bütövlükdə cəmiyyətdə elmi işçilərin nüfuzunun artırılması sahəsində önəmli tədbirlərin həyata keçirildiyini diqqətə çatdırıb.

“Azərbaycan dünyanın inkişaf etmiş neft ölkəsidir”, – deyə bildirən alim 1994-cü ildə “Əsrin müqaviləsi”nin imzalanması ilə əsası qoyulmuş Azərbaycanın neft strategiyasının qeyri-neft sektorunun inkişafı üçün də əlverişli imkanlar yaratdığını qeyd edib.

A.Əlizadə AMEA-da ilk dəfə 2015-ci ildən etibarən təşkil olunan magistratura pilləsi barədə də məlumat verib. Bildirib ki, əsas məqsəd gəncləri elmi mühitə cəlb etmək, onların elmi təfəkkürünü artırmaqdır. Akademiyanın magistratura pilləsində təhsil alan tələbələr elmi laboratoriyalarda təcrübə keçir, elmin son nailiyyətləri ilə tanış olur, görkəmli alimlərlə ünsiyyət qururlar.

Qonaqlara AMEA-nın Yüksək Texnologiyalar Parkı haqqında məlumat verən alim bildirib ki, belə bir müəssisənin yaradılmasında əsas məqsəd iqtisadiyyatın davamlı inkişafı və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiya sahələrinin genişləndirilməsinə dövlət dəstəyini artırmaqdır.

Azərbaycan-Çin elmi əlaqələrindən söz açan A.Əlizadə Çin Sosial Elmlər Akademiyasının nümayəndə heyəti ilə olan görüşü və imzalanmış əməkdaşlıq müqaviləsini xatırladıb. Alim Çin Mühəndislik Akademiyası ilə müvafiq sahələrdə əlaqələrin qurulmasının hər iki elmi qurumun gələcək fəaliyyətinə müsbət təsir edəcəyinə əminliyini ifadə edib.

A.Əlizadə AMEA-da fəaliyyət göstərən alimlərin elmi, elmi-təşkilati və pedaqoji fəaliyyətinin stimullaşdırılmasının əsas hədəflərdən olduğunu bildirərək, Azərbaycan alimlərinin əməyinin qiymətləndirilməsi məqsədilə “AMEA-nın professoru” elmi adının təsis edildiyini diqqətə çatdırıb. O, həmçinin qonaqlara geologiya, seysmologiya, neft-kimya, kimya texnologiyaları sahələrində əldə olunmuş nailiyyətlər barədə də məlumat verib. AMEA-da biofizika, biotibb, bioinformatika, biotexnologiya və digər prioritet istiqamətlərdə yeni tədqiqatların aparıldığı diqqətə çatdırılıb.

Akademiya prezidenti ölkəmizdə uzun illərdir ki, vulkanların öyrənilməsi ilə bağlı araşdırmaların aparıldığını, bütün dünya üzrə mövcud 3000-dən artıq vulkanın 400-nə Azərbaycanda rast gəlindiyini diqqətə çatdırıb. O, Çin Mühəndislik Akademiyasının nümayəndə heyətini akademiyanın elmi müəssisə və təşkilatları ilə yaxından tanış olmağa dəvət edib.

Sonra çıxış edən Çin Mühəndislik Akademiyasının keçmiş icraçı vitse-prezidenti, akademik P.Yunhen AMEA-da həyata keçirilən layihələri, burada çoxaspektli problemlər üzrə aparılan tədqiqatları yüksək qiymətləndirib.

P.Yunhen təmsil etdiyi qurumda 9 bölmənin fəaliyyət göstərildiyini, 870 akademikin çalışdığını bildirib. Qeyd edib ki, Çin Mühəndislik Akademiyasında süni intellekt, nanotexnologiyalar, robot texnikası, mühəndislik, həyat elmləri və digər yeni sahələrdə elmi tədqiqatlar aparılır.

AMEA ilə əməkdaşlıqda maraqlı olduqlarını bildirən qonaq müvafiq sahələrdə kadr və təcrübə mübadiləsinin aparılmasının məqsədəuyğun olduğunu deyib. O, Çin təcrübəsinin öyrənilməsi üçün lazımi köməkliyi göstərməyə hazır olduğunu vurğulayıb.

P.Yunhen AMEA rəhbərini Çin Mühəndislik Akademiyasının strukturu və laboratoriyaları ilə tanış olmaq üçün Pekinə dəvət edib.

Görüşdə, həmçinin Azərbaycan-Çin elmi əlaqələrinin möhkəmləndirilməsi, ardıcıl birgə fəaliyyətin təşkili və müştərək layihələrin həyata keçirilməsi ilə bağlı müzakirələr aparılıb, əməkdaşlıq müqaviləsinin imzalanması qərara alınıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.