İQTİSADİYYAT


Azərbaycan-Səudiyyə Ərəbistanı enerji əməkdaşlığına dair müzakirələr aparılıb

Bakı, 18 fevral, AZƏRTAC

Azərbaycan Respublikası Energetika Nazirliyi və Səudiyyə Ərəbistanı Krallığının Energetika Nazirliyi arasında fəaliyyət göstərən Birgə Texniki Komitənin ikinci iclası videokonfrans formatında keçirilib.

Energetika Nazirliyindən AZƏRTAC-a bildirilib ki, komitənin Azərbaycan tərəfindən rəhbəri, energetika nazirinin müavini Kamal Abbasov iki ölkə arasında energetika sahəsində əlaqələrin inkişaf etdiyini, “OPEC+” formatında intensiv əməkdaşlığın enerji sahəsində əlaqələrin inkişafına təkan verdiyini bildirib. Qeyd edilib ki, energetikanın müxtəlif sektorlarında, həm ənənəvi enerji daşıyıcıları, həm bərpaolunan enerji sahəsində əməkdaşlığın genişləndirilməsi üçün böyük potensial var və Texniki Komitənin iclasları bu potensialın reallaşdırılmasına, əlaqələrin gələcək inkişafına öz töhfəsini verəcək.

Komitənin Səudiyyə Ərəbistanı tərəfindən rəhbəri, bu ölkənin energetika nazirinin baş müşaviri Nasir Əl Dossari isə enerji sahəsində etibarlı əməkdaşlığın mövcud olduğunu, bu əməkdaşlıq əlaqələrinin inkişafının hər iki ölkənin maraqlarına cavab verdiyini bildirib. Ötən ilin sonunda Energetika Nazirliyi və ”Azərenerji” ASC ilə Səudiyyə Ərəbistanı Krallığının “ACWA Power” şirkəti arasında qoyuluş gücü 240 meqavat olan külək elektrik stansiyası layihəsi üzrə müvafiq müqavilələrin imzalandığı, yaxın gələcəkdə isə layihənin təməlqoyma mərasiminin keçiriləcəyinə diqqət çəkilib. İki ölkə arasında bərpaolunan enerji sahəsində əməkdaşlığın inkişaf dinamikası yüksək qiymətləndirib.

İclasda neft hasilatı, emalı və neft-kimya məhsullarının dünya bazarlarına çıxarılması, Səudiyyə Ərəbistanı Krallığının “Saudi Aramco”, “SABIC” və “ACWA Power” şirkətlərinin Azərbaycanda müvafiq sahələrdə layihələrdə iştirak və sərmayə perspektivləri, eləcə də qaz kəşfiyyatı və hasilatın inkişafı, xarici investisiyaların təşviqi mexanizmləri kimi mövzular ətrafında fikir mübadiləsi aparılıb. Dairəvi karbon iqtisadiyyatı, elektroenergetika, bərpaolunan enerji, enerji səmərəliliyi sahələrinə dair qarşılıqlı təqdimatlar dinlənilib. Azərbaycanın, xüsusilə də işğaldan azad edilmiş ərazilərimizin bərpa olunan enerji potensialı, burada yaşıl enerji zonasının yaradılması planları, müvafiq sahə üzrə qanun layihəsinin hazırlanması və bərpaolunan enerji hərraclarının keçirilməsinə hazırlıq işləri haqqında qarşı tərəfə məlumat verilib.

İclasda Azərbaycan tərəfindən Energetika Nazirliyi ilə yanaşı İqtisadiyyat Nazirliyi, SOCAR və “Azərenerji” ASC-nin nümayəndələri iştirak ediblər. Sonda Texniki Komitənin növbəti iclasının Azərbaycanda keçirilməsi razılaşdırılıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.