Bakı, 29 oktyabr, AZƏRTAC

Dünyada BMT-dən sonra ikinci ən böyük və nüfuzlu təşkilat sayılan Qoşulmama Hərəkatına ölkəmizin 2019-2022-ci illərdə rəsmən sədrlik etməsi dünya ölkələri tərəfindən Prezident İlham Əliyevin yürütdüyü ciddi və demokratik siyasətə ən layiqli münasibətdir. Müxtəlif dövlətlərin qarşılıqlı beynəlxalq əməkdaşlıq çərçivəsində apardığı xüsusi siyasət və onun fərqli istiqamətləri üzrə təmin olunacaq yüksək inkişafın təməli məhz Azərbaycan Respublikasının sədrlik edəcəyi Qoşulmama Hərəkatında qoyulur.

Bu fikirləri AZƏRTAC-a Azərbaycan Televiziyası Mədəniyyət kanalının direktoru Ramil Qasımov söyləyib.

Ramil Qasımov bildirib ki, 2011-ci ildə Hərəkata daimi üzv seçilən Azərbaycanın qısa müddətdə - 2016-cı ildə keçirilən sammitdə yekdilliklə quruma sədrliyinin qəbul edilməsinin olduqca mühüm əhəmiyyəti və önəmi vardır.

Ölkəmizin beynəlxalq aləmdə ərazi bütövlüyünün tanınması, Ermənistan-Azərbaycan Dağlıq Qarabağ münaqişəsinin hüquqi müstəvidə həlli, bir çox dövlətlərlə iqtisadi, siyasi və mədəni əlaqələrin genişləndirilməsi və başqa sahələr üzrə əsas məsələlər Hərəkata sədrlik etdiyimiz dövrdə də prioritet hədəflərə çevriləcəkdir.

Müstəqil Azərbaycanın dünya dövlətləri arasında ciddi, tarixi və hüquqi məsələlərdə təşəbbüskarlığı, Qoşulmama Hərəkatının Bandunq prinsiplərinin qorunması və həyata keçirilməsi, beynəlxalq hüququn norma və prinsiplərinə əməl olunması istiqamətində səylər göstərməsi Prezident İlham Əliyevin 2019-cu il oktyabrın 25-də Qoşulmama Hərəkatının Bakıda keçirilən XVIII Zirvə Görüşündə səsləndirdiyi əsas fikirlərdir. Zirvə Görüşündə dövlətimizin başçısının toxunduğu bir çox məsələlər nəinki ölkəmizin, o cümlədən təşkilata daimi üzv olan 120 ölkənin də gələcək taleyində xüsusi rol oynayacaq və inkişafa sövq edəcəkdir.

Cari il oktyabrın 15-də Bakıda keçirilən Türkdilli Dövlətlərin Əməkdaşlıq Şurasının VII Zirvə Görüşü, həmçinin ötən ay ölkəmizin “77-lər qrupu”na qoşulması bir daha Azərbaycanın beynəlxalq nüfuzuna olan inamı nümayiş etdirir.

Şübhəsiz ki, cəmi 28 ildir müstəqilliyini yaşayan xalqımız son 15 il ərzində ölkədə aparılan ciddi islahatların şahidi olur, bütün bu prosesdə dövlətimizin başçısına səmimi dəstəyini əsirgəmir. Məhz ümumxalq sevgisinə arxalanan Prezident İlham Əliyev Ermənistan-Azərbaycan Dağlıq Qarabağ münaqişəsi ilə bağlı dövlətimizin qətiyyətli mövqeyini daim müdafiə edir.

Bu il oktyabrın 3-də Rusiya Federasiyasının Soçi şəhərində “Valday” Beynəlxalq Diskussiya Klubunun XVI illik iclasının plenar sessiyasında çıxış edən Azərbaycan Prezidenti İlham Əliyevin səsləndirdiyi “Qarabağ Azərbaycandır və nida işarəsi” şüarı xalqımızda mübarizə hissinin oyanmasına, xalq-iqtidar birliyinin sarsılmaz olduğuna zəmin yaratdı. Həmişə olduğu kimi, Qoşulmama Hərəkatının XVIII Zirvə Görüşündə də dövlətimizin başçısı Azərbaycanın 20 faiz torpağının 26 ildən artıqdır Ermənistanın işğalı altında olduğunu vurğuladı, Ermənistanın azərbaycanlılara qarşı apardığı etnik təmizləmə siyasətindən, bir milyondan artıq azərbaycanlının qaçqın və məcburi köçkün vəziyyətinə düşməsindən, ikili standartlar siyasətinə son qoyulmasından danışdı və hüquqi müstəvidə məsələnin həlli istiqamətində yeni fikirlərin formalaşmasına zəmin yaratdı. Qarabağın Azərbaycanın əzəli torpağı olması və məsələnin Azərbaycanın ərazi bütövlüyü və suverenliyi çərçivəsində həll olunması Prezident İlham Əliyevin münaqişə ilə bağlı səsləndirdiyi əsas və qətiyyətli fikirlər idi.

Son 15 il ərzində ölkəmizdə keçirilən müxtəlif beynəlxalq irimiqyaslı layihələr, kütləvi-mədəni tədbirlər multikulturalizmə Azərbaycanda həyat tərzi kimi münasibətin formalaşdırılmasına səbəb olub. Mədəniyyətlərarası dialoqun inkişafında müstəsna xidmətləri ilə daim beynəlxalq müstəvidə özünə xüsusi hörmət və nüfuz qazanmış Azərbaycan bundan sonra azı üç il ərzində 120 ölkənin daimi üzv olduğu Qoşulmama Hərəkatına sədrlik edəcəkdir.

Ölkəmizdə əhalinin böyük hissəsinin gənclər olduğunu nəzərə alsaq, dövlətimizin başçısının keçirilən Zirvə Görüşündə gənclər siyasəti ilə bağlı səsləndirdiyi əsaslı fikirlər dövlətimizin nəinki Azərbaycan gənclərinə, o cümlədən savadlı, humanist dəyərlərə söykənən dünya gənclərinə xoş niyyətinin və qayğısının əsas göstəricisidir. Qoşulmama Hərəkatı tarixində ilk dəfə Gənclər Sammitinin keçirilməsi təşəbbüsü ilə çıxış edən Azərbaycan bir daha dünya ölkələrinə dayanıqlı inkişafın, kadr islahatlarının, dövlət gənclər siyasətinin müxtəlif istiqamətləri üzrə yüksəlişin vacibliyini nümayiş etdirdi.

İllər ötdükcə biz bir daha Prezident İlham Əliyevin müasir Azərbaycanın qurucusu, ümummilli lider Heydər Əliyevin siyasi ənənələrinə sadiqliyinin şahidi oluruq.

Ölkəmizin bir sıra beynəlxalq tədbirlərə ev sahibliyi etməsi, zəngin qarşılıqlı əlaqələrin dinamik inkişafı daha üç il ərzində də öz bəhrəsini verəcəkdir.

Azərbaycan Respublikasının Birinci vitse-prezidenti Mehriban Əliyevanın uğurlu fəaliyyəti sayəsində Azərbaycan mədəniyyəti dünyanın qeyri-maddi irs siyahılarına əlavə edilir. Heç şübhəsiz, Qoşulmama Hərəkatına ölkəmizin sədrliyi məhz ulu öndər Heydər Əliyevin illər əvvəl başladığı və Prezident İlham Əliyevin, birinci xanım Mehriban Əliyevanın layiqincə davam etdirdiyi qüdrətli siyasi iradə Azərbaycanın bütün sahələrdə əldə edəcəyi şanlı qələbələrin bariz göstəricisidir.

Prezident İlham Əliyev adından Qoşulmama Hərəkatının Bakıda keçirilən XVIII Zirvə Görüşündə iştirak edən dövlət və hökumət başçılarının, nümayəndə heyətlərinin rəhbərlərinin şərəfinə verilən rəsmi ziyafətdə iştirak edən incəsənət xadimləri arasında təmsil olunmağım məndə böyük şərəf və iftixar hissi doğurdu.

Azad, sülhsevər, demokratik ölkəmizin gələcəkdə daha böyük qürurla sevinəcəyi zəfər anı çox yaxındadır. Bunun üçün dövlətimizin başçısının ətrafında sıx birləşməli və onun qətiyyətli siyasətinə hamılıqla dəstək olmalıyıq.