Bakı, 10 dekabr, Həsrət Mahmudova, AZƏRTAC

Azərbaycan Respublikasının Gənclər Fondu və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı, bütün könüllü təşkilatları və hərəkatlarının iştirakı ilə reallaşdırılan “Azərbaycan könüllülük həftəsi”nin yekunları ilə bağlı dekabrın 10-da Bakı Konqres Mərkəzində tədbir keçirilib.

AZƏRTAC xəbər verir ki, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev tədbirdə çıxış edərək ölkəmizdə gənclər siyasətinə və könüllülük hərəkatına böyük önəm verildiyini diqqətə çatdırıb. “ASAN xidmət” mərkəzlərinin yarandığı gündən könüllülərin fəaliyyətindən geniş istifadə olunduğunu bildirən Ü.Mehdiyev qeyd edib ki, könüllülük hərəkatının formalaşması və böyüməsində “ASAN xidmət” və onun könüllülərinin böyük payı var.

Azərbaycan Gənclər Fondunun icraçı direktoru Fərid Cəfərov bildirib ki, Prezident İlham Əliyevin rəhbərliyi ilə ölkəmizdə gənclər siyasəti sahəsində, xüsusilə könüllülük hərəkatının inkişafı istiqamətində mühüm tədbirlər həyata keçirilir. Bu il fevralın 1-də dövlətimizin başçısının gənclərlə görüşündə dövlət qurumlarına müraciət edərək könüllülər hərəkatının yaradılması və gənclərin bu fəaliyyətə cəlb olunması ilə bağlı çağırış etdiyini xatırladan icraçı direktor qeyd edib ki, bu tövsiyədən irəli gələn vəzifələrin icrası nəticəsində təkcə 2019-cu ildə 9 mərkəzi icra hakimiyyəti orqanı və bütün yerli icra hakimiyyəti orqanları yanında könüllü qrupları yaradılıb. Bu gün onlar çox uğurla fəaliyyət göstərirlər.

Diqqətə çatdırılıb ki, “Azərbaycan könüllülük həftəsi”nə “ŞəhidimİZ” kampaniyası ilə start verilib. Kampaniya çərçivəsində dekabrın 1-2-də 17 şəhər və rayonda 2 mindən artıq gəncin iştirakı ilə 147 şəhid ailəsi gənc könüllülər tərəfindən ziyarət olunub, onlarla həmrəylik nümayiş etdirilib. “ŞəhidimİZ” kampaniyası Səfərbərlik və Hərbi Xidmətə Çağırış üzrə Dövlət Xidmətinin dəstəyi ilə baş tutub.

“VətənimİZ” aksiyasında isə 13 şəhər və rayonda 1300-dən artıq gəncin iştirakı ilə Heydər Əliyev muzeylərinə ekskursiyalar təşkil edilib və Ulu Öndərin abidələri gənclər tərəfindən ziyarət olunub.

Beynəlxalq Əlillər Gününə həsr olunmuş “Könüllülük Sərhəd Tanımır!” şüarı altında keçirilən aksiyada ölkə üzrə 7 rayon və şəhərlərdə fəaliyyət göstərən 19 sosial müəssisə ziyarət edilib. Aksiyalar 2024 uşaq və yeniyetməni əhatə edib. Həmçinin aksiya çərçivəsində 500-dən çox uşağa arzularını əks etdirən məktublar yazdırılıb və www.asanmektub.az saytına yerləşdirilib.

Daha sonra 3500-dən çox gəncin iştirakı ilə ölkədə “TəbiətimİZ” ekoloji aksiyası keçirilib. Bu kampaniyaya Gənclər Fondu və Dövlət Agentliyi ilə birgə IDEA İctimai Birliyi də əsas tərəfdaş olaraq qoşulub. “TəbiətimİZ” kampaniyası çərçivəsində 3500-dən çox könüllünün iştirakı ilə 9 şəhər və rayonda təmizlik, ağacəkmə aksiyaları həyata keçirilib və heyvansevər gənc könüllülərin IDEA Heyvanlara Qayğı mərkəzinə ziyarəti baş tutub. Dekabrın 5-də 3 minə yaxın gəncin iştirakı ilə Azərbaycan Könüllülərinin 2-ci Həmrəylik Forumu keçirilib. Forum çərçivəsində ölkədə fəaliyyət göstərən bütün könüllü hərəkatlarının və gənclər təşkilatlarının sərgisi də təşkil olunub. Forumda BMT-nin Azərbaycandakı rezident əlaqələndiricisi Qulam İshaqzai BMT Baş katibinin Beynəlxalq Könüllülər Günü münasibətilə müraciətini oxuyub. Forumda könüllülər təşkilatları və hərəkatlarının təmsilçilərinin “TEDx” formatında çıxışlar edib, müxtəlif təşkilatlar və könüllülük hərəkatları üzrə fərqlənən gənclər təltif olunublar.

Həftə ərzində könüllü və gənclər təşkilatlarının fəaliyyətinə dair 26 stenddən ibarət sərgi də təşkil edilib. Eləcə də “Elektra Events Hall”da 2 minə yaxın gənc könüllünün iştirakı ilə populyar estrada müğənnisi Murad Arifin “Tufan“ adlı solo konserti keçirilib. Həmçinin dekabrın 6-da həftənin ən fəal 300 könüllüsünün iştirakı ilə Qusarda dördgünlük qış düşərgəsinə start verilib. Dekabrın 9-dək davam edən düşərgə çərçivəsində könüllülər üçün təlim və seminarlar, müxtəlif qurumların rəhbərləri ilə qeyri-formal görüşlər, müxtəlif əyləncəli və intellektual oyunlar təşkil olunub. Ümumilikdə “Azərbaycan könüllülük həftəsi”ndə ölkə üzrə 15 mindən çox gənc iştirak edib.