SİYASƏT
Azərbaycanın gördüyü işlər BMT və onun qurumları tərəfindən yüksək qiymətləndirilir VİDEO
Bakı, 25 aprel, AZƏRTAC
Bundan əvvəl iki dəfə Azərbaycanda olmuşam. Hər iki səfərim Bakıda keçirilən Mədəniyyətlərarası Dialoq Forumunda iştirakla bağlı olub. Bu səfərlər, forumlar, eləcə də hazırkı tədbir Azərbaycan dövlətinin mədəniyyətlərarası dialoqa, tolerantlığa, multikultural dəyərlərə necə həssas yanaşdığını, təşviq etdiyini göstərir. Bütün bunlar mühüm amillərdir. Məhz görülən bu işlərin məntiqi davamıdır ki, 2016-cı il Azərbaycanda “Multikulturalizm ili” elan edilib. Azərbaycanın bu istiqamətdə gördüyü işlər BMT və onun qurumları tərəfindən yüksək qiymətləndirilir.
Bu fikirləri BMT-nin Sivilizasiyalar Alyansı üzrə ali nümayəndəsi Nasir Əbdüləziz Əl-Nasir mətbuat konfransında AZƏRTAC-ın müxbirinin “Dünya Azərbaycanın mədəniyyətlərarası dialoqun inkişafına verdiyi töhfəni necə qiymətləndirir” sualını cavablandırarkən söyləyib.
Mətbuat konfransında çıxış edən Azərbaycan Respublikasının mədəniyyət və turizm naziri Əbülfəs Qarayev deyib ki, bu gündən öz işinə başlayan BMT Sivilizasiyalar Alyansının VII Qlobal Forumu çərçivəsində Gənclər Forumu və biznes simpozium keçirilib. Altı min nəfər dünya gəncindən seçilmiş 150 nəfər bu tədbirdə gənclərin inklüziv cəmiyyət quruculuğunda rolunu və iştirakını müzakirə ediblər. Gənclər tədbirində Heydər Əliyev Fondunun vitse-prezidenti Leyla Əliyeva çıxış edib.
Nazir qeyd edib ki, Sivilizasiyalar Alyansının VII Qlobal Forumunun Azərbaycan Respublikasının paytaxtında keçirilməsi barədə qərar 2014-cü il sentyabrın 26-da Birləşmiş Millətlər Təşkilatı Baş Assambleyasının 69-cu sessiyası çərçivəsində BMT-nin Sivilizasiyalar Alyansı Dostlar Qrupunun Nazirlər Toplantısında qəbul edilib. Bu qərarın qəbul edilməsi Prezident İlham Əliyevin nəinki həm ölkəmizdə, həm də beynəlxalq səviyyədə mədəniyyətlərarası, dinlərarası münasibətlərə verdiyi töhfələri, həmçinin dövlətimizin başçısının liderliyi ilə xalqımızın çoxəsrlik multikultural və tolerant mədəniyyətinin artıq dünyada bir nümunə, bir model kimi qəbul edilməsi ilə bilavasitə bağlıdır.
Ə.Qarayev Forumun ölkəmizdə keçirilməsi ilə bağlı Təşkilat Komitəsinin yaradılması barədə Prezident İlham Əliyev tərəfindən 2015-ci il iyulun 24-də Sərəncam imzalandığını diqqətə çatdıraraq qeyd edib ki, dəfələrlə Təşkilat Komitəsinin iclasları keçirilib və Foruma hazırlıqla bağlı məsələlər ətraflı müzakirə edilib. Ötən ilin sentyabr ayında və cari il fevralın 20-27-də BMT-nin və onun Sivilizasiyalar Alyansının nümayəndə heyəti Bakıda səfərdə olub və tədbirin reallaşacağı məkanlara baxış keçirib, dövlət qurumları, Təşkilat Komitəsinin üzvləri ilə görüşüblər.
Əbülfəs Qarayev bildirib ki, keçən dövr ərzində Forumun və Azərbaycanın dünya mədəniyyətləri arasında dialoq qurmaqda əhəmiyyətli yeri, Prezident İlham Əliyevin liderliyi ilə həm ölkə səviyyəsində, həm də beynəlxalq miqyasda həyata keçirilən multikulturalizm siyasəti, “Bakı Prosesi” barədə xarici ölkələrdə təqdimatlar keçirilib.
Nazir Forumun məqsəd və vəzifələrindən, üç gün ərzində keçiriləcək tədbirlərin, görüşlərin əhəmiyyətindən söz açıb.
Əbülfəs Qarayev vurğulayıb ki, Forumdan sonra “BMT Sivilizasiyalar Alyansının VII Qlobal Forumu Azərbaycana nə verdi?” mövzusunda KİV nümayəndələri arasında beynəlxalq müsabiqə elan ediləcək.
BMT-nin Sivilizasiyalar Alyansı üzrə ali nümayəndəsi Nasir Əbdüləziz Əl-Nasir Forumun yüksək səviyyədə təşkilinə görə Azərbaycan hökumətinə minnətdarlığını bildirib. O deyib ki, Forumun mövzusu olduqca əhəmiyyətlidir. Bu beynəlxalq tədbir müxtəlif fikirlərin və ideyaların öyrənilməsi və reallaşdırılması baxımından yaxşı platformadır. Bu Forum qarşılıqlı təcrübələrin öyrənilməsinə də öz töhfəsini verəcək.
Ali nümayəndə deyib ki, radikal ekstremizmə qarşı mübarizə səbir və uzun zaman tələb edir. Son 10 ildə BMT tərəfindən zorakı ekstremizmə qarşı mübarizə istiqamətində mühüm işlər görülüb. İnanıram ki, burada səslənən fikirlər qarşıya qoyulan məqsədə birgə çatmağımıza təkan verəcək.
Sonda jurnalistlərin sualları cavablandırılıb.