CƏMİYYƏT
“Azəriqaz”da qanvermə aksiyası keçirilib
Bakı, 10 fevral, AZƏRTAC
Fevralın 10-da “Azəriqaz” İstehsalat Birliyinin inzibati binasında könüllü qanvermə aksiyası keçirilib.
Birlikdən AZƏRTAC-a bildirilib ki, Prezident İlham Əliyevin müvafiq Sərəncamı ilə təsdiqlənmiş “Hemofiliya və talassemiyadan əziyyət çəkən uşaqlara qayğı” Dövlət Proqramının icrası ilə bağlı reallaşdırılan könüllü qanvermə aksiyasında baş direktor Ruslan Əliyev başda olmaqla birliyin əməkdaşları fəal iştirak ediblər. “Talassemiyasız həyat naminə” devizi ilə keçirilən qanvermənin təşkili üçün B.Ə.Eyvazov adına elmi-tədqiqat Hematologiya və Transfuziologiya İnstitutunun Mərkəzi Qan Bankının 12 nəfərlik tibbi heyəti cəlb olunub. Müxtəlif qan xəstəliklərindən əziyyət çəkən insanlara kömək məqsədilə keçirilən tədbirdə qan vermək istəyən qaz təsərrüfatı işçiləri əvvəlcə ətraflı müayinə edilib. Üç gün davam edəcək aksiyaya birliyin İdarəetmə Aparatının, həmçinin digər struktur bölmələrin ümumilikdə 434 könüllü işçisinin qatılacağı gözlənilir.