REGİONLAR


BAZARLARDA KƏND TƏSƏRRÜFATI MƏHSULLARININ QİYMƏTLƏRİNİN SÜNİ ARTIMININ QARŞISI ALINIR
APRELİN 7-DƏ BAKININ RAYONLARINDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR

Aprelin 7-də Bakı şəhərinin rayonlarında əvvəlcədən müəyyən edilmiş ərazilərdə kənd təsərrüfatı məhsullarının növbəti satış yarmarkaları keçirilmişdir. Bu dəfə də qiymətlər bazarlardakından xeyli ucuz olmuşdur.
AZƏRTAC-ın müxbirləri satış yarmarkalarında olmuş, reportajlar hazırlamışlar

NƏSİMİ RAYONU

“Təzə bazar” MMC-nin (S.Vurğun küçəsi, 73) həyətindəki yarmarkada Sabirabad, Salyan, Gədəbəy, Tovuz, Hacıqabul rayonlardan gətirilmiş müxtəlif çeşiddə kənd təsərrüfatı məhsulları təklif olunurdu.
Səhər tezdən şəhər sakinləri həvəslə bazarlıq edirdilər.
Kənd Təsərrüfatı Nazirliyinin şöbə müdiri İslam İbrahimovun sözlərinə görə, bu gün satışa 19,5 ton məhsul, o cümlədən 5,2 ton ət, 4,1 ton tərəvəz, 6,5 ton kartof, 3,2 ton meyvə, 0,5 ton süd, 123 min ədəd yumurta və s. çıxarılmışdır.
Mal, qoyun, toyuq ətinin və yumurtanın qiymətlərində artım olmamışdır.
NƏRİMANOV RAYONU
Metronun “N.Nərimanov” stansiyasının yaxınlığında, “Bakı Taxıl” Açıq Səhmdar Cəmiyyətinin ərazisindəki yarmarkaya Xaçmaz, İmişli, Tovuz, Astara, Salyan, Neftçala, Oğuz və Qobustan rayonlarından 29 ton məhsul gətirilmişdi.
Alıcılara 6,8 ton ət, 0,9 ton süd, 0,3 ton bal, 1 ton taxıl məhsulları, 3 ton kartof, 3,8 ton konserv, 5,5 ton tərəvəz, 7,5 ton meyvə, Giləzi broyler fabrikindən gətirilmiş 50 min yumurta təklif olunurdu.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri məhsulların qiymətinə və keyfiyyətinə nəzarət edirdilər.
BİNƏQƏDİ RAYONU
 
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada satışa Qazax rayonundan gətirilmiş müxtəlif növ meyvə-tərəvəz çıxarılmışdı. Buradakı qiymətlər bazardakından ucuz, mallar təzə və keyfiyyətli idi.
Yeddinci mikrorayondakı Bolluq bazarının yanında təşkil edilmiş yarmarkada Goranboy və Bərdə rayonlarından gətirilmiş müxtəlif növ kənd təsərrüfatı məhsulları satılırdı. Rayon ərazisində ticarət üçün nəzərdə tutulmayan yerlərdə məhsul satanlar da yarmarkaya cəlb edilmişdilər.
Yarmarkalarda kələm 60 qəpiyə, kartof 50 qəpiyə, soğan 60 qəpiyə, mal əti 3 manat 40 qəpiyə, qoyun əti 4 manata, pendir 2 manata təklif olunurdu.
SURAXANI RAYONU
Qaraçuxur qəsəbəsi, Yeni Günəşli yaşayış massivi, “Günəş” ticarət mərkəzində təşkil olunmuş yarmarkada Samux, Qobustan və Şəki rayonlarının fermerləri şəhər sakinlərinə geniş çeşiddə kənd təsərrüfatı məhsulları təklif edirdilər.
Kənd Təsərrüfatı Nazirliyinin nümayəndəsi Fariz Əliyev dedi ki, bu gün yarmarkaya 3,5 ton kartof, soğan, kök, kələm, alma, çuğundur, turp, mal və qoyun əti çıxarılmışdır.
Həmin məhsulların qiymətləri bazardakından 20-30 faiz ucuz idi.
Əmircan qəsəbəsinin S.Bəhlulzadə küçəsində, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya Cəllabad rayonundan 3 tondan artıq noxud, buğda, lobya, ət və digər məhsullar gətirilmişdi.
Məhsulların qiymətlərinə və keyfiyyətinə nəzarət olunurdu.
XƏTAİ RAYONU
Metronun “Əhmədli” stansiyasının yaxınlığında, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzindəki yarmarkada məhsulların çeşidinin zənginliyi diqqəti cəlb edirdi.
Kənd Təsərrüfatı Nazirliyinin nümayəndəsi Mustafa Rüstəmov bildirdi ki, bu gün rayon ərazisində fəaliyyət göstərən iki yarmarkada satışa 82 ton kənd təsərrüfatı məhsulu çıxarılmışdır.
Kürdəmir, Salyan, Quba, Qəbələ, Qax, Şəmkir, Ağcabədi, Gədəbəy, Hacıqabul və Astara rayonlarından gətirilmiş meyvə-tərəvəz və digər kənd təsərrüfatı məhsulları şəhər əhalisi tərəfindən həvəslə alınırdı.
General Şıxlinski küçəsi, 37 ünvanında, metronun “Həzi Aslanov” stansiyasının yaxınlığındakı “Ordubad” kiçik müəssisəsinin ticarət mərkəzində də bolluq idi. Burada kartofun kiloqramı 50 qəpiyə, mal ətinin kiloqramı 3 manat 80 qəpiyə, qoyun əti 4 manata satılırdı.
YASAMAL RAYONU
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkaya Salyan, Qusar, Dəvəçi, Oğuz və digər rayonlardan 22 tona yaxın kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Gülağa Mustafayev bildirdi ki, məhsulların qiymətində artım müşahidə olunmur.
Paytaxt sakinləri mal və qoyun ətini, meyvə-tərəvəzi, konserv və taxıl məhsullarını, şirələri, un məmulatını, ağartını, yumurtanı həvəslə alırdılar.
SƏBAİL RAYONU
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada alıcılara Ağdaş və Salyandan gətirilmiş 2,5 ton kartof, 3,5 ton tərəvəz, 1 ton meyvə və 700 kiloqram mal əti təklif edilirdi.
Kənd Təsərrüfatı Nazirliyinin və Səbail Rayon İcra Hakimiyyətinin nümayəndələri yarmarkada keyfiyyət və qiymətlərə ciddi nəzarət edirdilər.
Ağdaşdan alma gətirmiş Canpolad Həsənov dedi ki, indiyədək yarmarkalarda 30 tonda yaxın müxtəlif kənd təsərrüfatı məhsulları satmışdır. O, alıcıların fəallığından razılıq edərək gün ərzində 100 kiloqramdan çox məhsul satdığını bildirdi.
Sakinlər yarmarkaların davamlılığını yüksək qiymətləndirmişlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.