Oktyabrın 8-də – bazar günü Bakı şəhərinin rayonlarında əvvəlcədən müəyyən edilmiş ərazilərdə kənd təsərrüfatı məhsullarının növbəti satış yarmarkaları keçirilmişdir. Bu dəfə də qiymətlər bazarlardakından xeyli ucuz olmuşdur.

AZƏRTAC-ın müxbirləri satış yarmarkalarında olmuş, reportajlar hazırlamışlar.

SURAXANI RAYONU

Əmircan qəsəbəsinin S.Bəhlulzadə küçəsində, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində sakinlərə Cəlilabad rayonunun fermer və kəndli təsərrüfatlarında istehsal olunmuş geniş çeşiddə kənd təsərrüfatı məhsulları təklif olunurdu.

Fermerlər məhsullarını rahat satmaq üçün yaradılmış şəraitdən razılıq edirdilər.

Qaraçuxur qəsəbəsində, “Yeni Günəşli” yaşayış massivindəki “Günəş” ticarət mərkəzindəki yarmarkada isə Balakən, Biləsuvar fermerləri alıcılara kələm, pomidor, xiyar, armud, nar, üzüm və s, Qobustan heyvandarları isə ət məhsulları satırdılar.

BİNƏQƏDİ RAYONU

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada şənbə və bazar günləri 23 tona yaxın meyvə-tərəvəz və müxtəlif ərzaq məhsulları satılmışdır. Burada Ağsu və Qazax rayonlarından gətirilmiş xiyar, soğan və pomidorun kiloqramı 20 qəpiyə, üzüm 40 qəpiyə, bibər, badımcan, kartof, kələm 30 qəpiyə, mal əti 3 manat 60 qəpiyə, qoyun əti 3 manat 70 qəpiyə təklif olunurdu.

Dərnəgül yaşayış sahəsində, K.Rəhimov küçəsində yerləşən 6 nömrəli peşə liseyinin qarşısındakı avtomobil yolunun kənarında təşkil edilmiş yarmarkada isə iki gün ərzində 52 tondan çox məhsul satılmışdır. Kartof və soğana növbələr bu məhsullara daha böyük tələbat olduğunu göstərir.

Alıcı Şövkət xanım yarmarkanın təşkilindən razılığını bildirib deyir ki, ilk vaxtlar yarmarkaların davamlı olacağına inanmırdım. Sonralar gördüm ki, səhv düşünürmüşəm. Yeri gəlmişkən, burada mallar həm ucuz, həm də təzədir, çəkidə də alıcını aldatmırlar.

Hər iki yarmarkada mövsümi məhsullar - kələm, kök, nar, alma, lobya və s. çoxluq təşkil edir. Bütün məhsullar bazarlardakından xeyli ucuzdur. Ət satışa yalnız baytar həkiminin icazəsi ilə çıxarılır.

NƏSİMİ RAYONU

Mərdanov qardaşları, 137, “Maşzavod” SC-nin (“Olimpik” idman kompleksinin yanında) həyətindəki yarmarkada kənd təsərrüfatı məhsullarının satışı səhər tezdən başlamışdır. Şəhər sakinləri istədikləri məhsulları ucuz qiymətə alır, yarmarkaların təşkilinə görə ölkəmizin Prezidentinə və hökumətimizə minnətdarlıq edirlər.

Hacıqabul rayonundan Nemət Şirəliyev 500 kiloqram xiyar, lobya, bibər gətirdiyini və artıq məhsulun xeyli hissəsini satdığını bildirir.

Sabirabad rayonundan gəlmiş Yasəf Fətullayev yarmarkanı təşkil edənlərə minnətdarlıq edərək deyir ki, gətirdiyimiz 3,5 ton məhsulu az vaxt ərzində satıb qurtarmışıq.

Həşimxanlı kəndinin sakinləri Nail Babayev və Bilal Bilalov almanı 15-20 qəpiyə, lobyanı 40 qəpiyə, xiyarı 15 qəpiyə, bibəri isə 20 qəpiyə satırlar.

Kənd Təsərrüfatı Nazirliyinin şöbə müdiri İslam İbrahimovun dediyinə görə, bü gün yarmarkaya Sabirabaddan 1,4 ton meyvə və ət, Hacıqabuldan 1,3 ton tərəvəz və ət məhsulları gətirilmişdir.

C.Məmmədquluzadə küçəsi,101, “Bakı Tikiş Sənaye” ASC-nin həyətindəki yarmarkada Lerik rayonunun Veri kəndindən gəlmiş Əbülfət İsiyev 2 ton kartof gətirdiyini və kiloqramını 36-37 qəpiyə verdiyini, məhsulun artıq 1 ton 300 kiloqramını satdığını bildirir.

Ağdaşlı Aqil Əliyev isə öz bağından yığıb gətirdiyi 200 kiloqram narın 150 kiloqramını satıb qurtarıbdır.

Suraxanı quşçuluq təsərrüfatından gətirilmiş toyuq ətinin kiloqramı 2 manat 40 qəpiyə satılırdı.

Ağdaş rayonundakı “Orelay” şirkətinin müdiri Natiq Əbilov deyir ki, qənnadı məhsullarımızın alıcıları həftədən-həftəyə çoxalır. Marmelad, kişmişli noğul, peçenye, müxtəlif çeşidli konfetlər və digər şirniyyat məhsulları mağazalardakından aşağı qiymətlərə təklif olunur.

Alıcılar - “Bakı Tikiş Sənaye” fabrikinin işçiləri Mirhəmid Əhmədov və Məmməd Gülməmmədov qiymətlərin münasib, məhsulların keyfiyyətinin yüksək olduğunu, yarmarkanın yaxşı təşkil olunduğunu bildirirlər.

XƏTAİ RAYONU

Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzindəki yarmarkaya bu həftə Şəmkir rayonundan 3 ton pomidor, 6 ton xiyar, 4 ton soğan, 6,8 ton kartof, 16,4 ton kələm və digər məhsullar çıxarılsa da, iki gün ərzində gətirilmiş malların çox hissəsi elə şənbə günü satılmışdır.

Şəmkir Rayon İcra Hakimiyyətinin məsul işçisi Habil Rzayev bildirir ki, rayonumuzun kəndli-fermerləri yarmarkada məhsul satışı üçün əlverişli şərait yaradılmasından çox razıdırlar və onlar ilboyu şəhər əhalisini təzə kənd təsərrüfatı malları ilə təchiz etməyə çalışacaqlar.

General Şıxlinski küçəsi, 37, metronun “Həzi Aslanov” stansiyasının yaxınlığındakı “Ordubad” kiçik müəssisəsinin ticarət mərkəzində Şəmkir, Kürdəmir, Quba, Saatlı, Ağcabədi, Qax və Azərbaycan Mərkəzi Kooperativlər İttifaqı tərəfindən satışa çıxarılmış müxtəlif çeşidli kənd təsərrüfatı məhsulları şəhər sakinləri tərəfindən həvəslə alınır. Onlar

bu işdə zəhməti olan təşkilatlara və şəxslərə minnətdarlıqlarını bildirirlər.

NƏRİMANOV RAYONU

Metronun “Nərimanov” stansiyasının yaxınlığında, Ə.Əliyev küçəsi, 26 ünvanında, “Bakı taxıl” ASC-nin ərazisindəki yarmarkada Xaçmaz, Tovuz, Neftçala, Qobustan, İmişli və Naxçıvan Muxtar Respublikasının fermerləri meyvə-tərəvəz, ət, müxtəlif şirkətlər şirniyyat, pendir, sərinləşdirici içkilər, un məmulatı, konserv məhsulları, duz, bal təklif edirdilər.

İşçi qrupunun qərargahından verilən məlumata görə, ötən yarmarkalarda burada, ümumilikdə, 1500 tona yaxın təzə kənd təsərrüfatı məhsulları satılmışdır.

Sakinlər Naxçıvan Muxtar Respublikasından gətirilmiş məhsullara maraq göstərirdilər.

Yarmarkanın təşkilinə cavabdeh olan Nərimanov Rayon İcra Hakimiyyətinin nümayəndələri alıcıların və satıcıların iradlarına dərhal reaksiya verir, təkliflərini diqqətlə dinləyirdilər. Ərazidə nümunəvi ticarət üçün normal şərait yaradılmışdı.

NİZAMİ RAYONU

Metronun “Əzizbəyov” stansiyasının ərazisindəki “Ankara” istehsalat kommersiya firmasında bazar günü təşkil edilmiş yarmarkaya pomidor, xiyar, bibər, badımcan, soğan, kartof, alma, kələm, çay, boranı, müxtəlif şirələr, mürəbbələr, konserv məhsulları çıxarılmışdır. Təzə kartof, pomidor daha yaxşı alınırdı.

Nizami Rayon İcra Hakimiyyəti başçısının müavini İldırım Mehdiyevin verdiyi məlumata görə, yarmarkada Lənkəran, Şəmkir, Beyləqan, Tovuz, Samux rayonlarından gətirilmiş məhsullar satılır.

Alıcılar Azərbaycan Prezidenti İlham Əliyevin tapşırığı ilə görülən tədbirlərin öz müsbət nəticəsini verdiyini, yarmarkaların əhalinin nisbətən aztəminatlı təbəqəsinin ən çox üz tutduğu məkanlardan birinə çevrildiyini bildirir, qış mövsümündə də tədbirin davam etdirilməsi barədə arzularını dilə gətirirdilər. Ağsaqqal Əhmədalı Ağayev on bir ayın sultanı - müqəddəs Ramazan münasibətilə xalqımızı təbrik edərək, burada yaradılan şəraitdən razılığını bildirir və deyir ki, hər həftə bazarlığını yarmarkadan edir, çünki həm qiymətlər münasibdir, həm məhsulları təzə, keyfiyyətli və təmizdir, əldən-ələ keçib urvatdan düşmür.

YASAMAL RAYONU

Şərifzadə küçəsi,194, metronun “İnşaatçılar” stansiyasının 200 metrliyindəki sahədə keçirilən bazar günü yarmarkasına alıcıların axını, burada kənd təsərrüfatı məhsullarının bolluğu diqqəti cəlb edirdi.

Əvvəlki günlərdən fərqli olaraq ərazidə boş yer, demək olar, yox idi. Burada satışa Qusar, Kürdəmir, Dəvəçi, Saatlı, Sabirabad, əsasən isə Salyan rayonlarından gətirilmiş məhsullar çıxarılmışdı.

Alıcılar Salyanın “Hacı Camalxan” kəndli-fermer təsərrüfatının müasir texnologiya ilə hazırlanmış konserv və ağartı məhsullarına daha çox maraq göstərirdilər.

Əhali nümunəvi şərait yaradılmış ərazidə keyfiyyətli və bazarlardakından ucuz məhsulları həvəslə alırdı. Polislər möhtəkirlərin yarmarkaya daxil olmasının qarşısını qətiyyətlə alırdılar.