RƏSMİ XRONİKA
BERLİNDƏ BEYNƏLXALQ BERTELSMANN-2006 FORUMU İŞƏ BAŞLAMIŞDIR
AZƏRTAC-ın xüsusi müxbiri xəbər verir ki, sentyabrın 22-də Almaniyanın paytaxtı Berlində Beynəlxalq Bertelsmann-2006 forumu işə başlamışdır.
Azərbaycan Prezidenti İlham Əliyev forumda iştirak etmək üçün Almaniya Xarici İşlər Nazirliyinin binasına gəldi.
Forumu Karl Bertelsmann Fondunun icraiyyə komitəsinin üzvü Verner Veidenfeld açaraq iştirakçıları salamladı və gündəlik barədə məlumat verdi. Bildirildi ki, forum hər iki ildən bir Karl Bertelsmann Fondu tərəfindən təşkil edilir. Forumun məqsədi Avropanın ali siyasi, iqtisadi, mədəni və mətbuat dairələri arasında qitənin gələcəyinə dair dialoqun keçirilməsidir. İndiki forumda isə genişlənmiş Avropanın siyasi-iqtisadi perspektivləri müzakirə ediləcəkdir. Almaniyanın Avropa İttifaqı Şurasına sədrliyi ərəfəsində belə bir forumun təşkili ümumavropa təşəbbüslərinin həyata keçirilməsinə mühüm təkan olacaqdır.
Forumda 20-dək ölkənin dövlət və hökumət başçıları, parlament sədrləri və xarici işlər nazirləri iştirak edirlər.
Sonra Almaniyanın federal kansleri Angela Merkel, Fransanın Baş naziri Dominik de Vilpen, Belçikanın Baş naziri Gi Verhofştadt, Macarıstanın Baş naziri Ferents Dyurçan və Avropa Komissiyasının sədri Joze Manuel Barrozu çıxış etdilər.
Onlar bildirdilər ki, ənənəvi xarakter daşıyan forumdan məqsəd Avropanın gələcəyi barədə geniş fikir mübadiləsi aparmaqdır. Dünya siyasətində Avropanın əhəmiyyətini vurğulayan natiqlər Türkiyə və Ukraynanın Avropa İttifaqına qəbul olunmasını dəstəklədiklərini və bu il ərzində məsələlərin həllinin zəruriliyini bildirdilər. Ümumavropa iqtisadi siyasətinin istiqamətlərini müəyyənləşdirməyin ümumi məsələlərdən biri olduğu və bunun Avropanın inkişafı üçün xüsusi önəm daşıdığı xatırladıldı.
Çıxışlarda deyildi ki, uzun sürən münaqişələrin həlli, aradan qaldırılması vacibdir və ümumi işə fayda gətirər və bu fikri dəstəkləyənlərin sayı günbəgün artır. Avropada ölkələrarası gələcək iqtisadi əlaqələrin ikitərəfli səviyyədən çoxtərəfli müstəviyə keçirilməsi üçün xüsusi iqtisadi proqramın hazırlanması nəzərdə tutulur.
Çıxışlarda Avropanın ümumi inkişafına mane olan iqtisadi və siyasi amillərin aradan qaldırılmasının, Avropa İttifaqına üzv olmaq istəyən və digər ölkələrlə, habelə İslam Konfransı Təşkilatının üzvü olan ölkələrlə münasibətlərin əhəmiyyətindən, Avropanın enerji təhlükəsizliyinin təmin olunması, elmi tədqiqat proqramları, iqtisadi-siyasi və hüquqi layihələrin həyata keçirilməsi, təhsil sistemində islahatların aparılması və dünya səviyyəli yeni universitetlərin yaradılmasından və digər məsələlərdən də danışıldı. Yaxın Şərqdə və dünyanın digər bölgələrində baş verən hadisələrə də toxunuldu.
Fasilədən sonra forumun “Balkanlar və Qara dəniz bölgəsi Avropa üçün lakmus kağızı kimi” mövzusunda birinci iclası keçirildi. Azərbaycan Prezidenti İlham Əliyev iclasda çıxış etdi.
Ölkəmizdə aparılan hüquqi, siyasi və iqtisadi islahatlardan danışan dövlətimizin başçısı dedi ki, Cənubi Qafqaz regionu hazırda Avropa üçün mühüm rol oynayır. Xüsusilə, Xəzər dənizinin enerji ehtiyatlarının Avropa bazarlarına çatdırılması indi ciddi əhəmiyyət daşıyır. Ancaq regionda mövcud olan Dağlıq Qarabağ münaqişəsi Avropa-Cənubi Qafqaz əlaqələrinə böyük maneədir. Avropa bu münaqişənin həllində ciddi rol oynayaraq, regionda sülhün bərqərar olmasına çalışmalıdır. Prezident İlham Əliyev bildirdi ki, Azərbaycan hazırda iri neft və qaz hasilatçısına çevrilmişdir. Avropa üçün isə enerji təhlükəsizliyi zamanın tələbidir. Belə olan halda, Azərbaycan Avropanın enerji təhlükəsizliyinin təmin olunmasında etibarlı tərəfdaş rolunu oynamağa hazırdır.
Sonra aparılan geniş müzakirələrdə Prezident İlham Əliyev bir çox suallara da cavab verdi.
Müzakirələrdə Rumıniya Prezidenti Trayan Besesku, Bolqarıstan Prezidenti Georgi Pırvanov, Çernoqoriyanın Baş naziri, Ermənistanın xarici işlər naziri iştirak edirdilər.
Prezident İlham Əliyev bildirdi ki, Azərbaycan Avropanın yeni qonşuluq siyasətinə qoşulubdur və bunda uğurla iştirak edir. Qərbə inteqrasiya Azərbaycanın xarici siyasətinin əsas istiqamətlərindən biridir. Dövlətimizin başçısı Ermənistan-Azərbaycan, Dağlıq Qarabağ münaqişəsi ilə bağlı ölkəmizin mövqeyini bir daha açıqladı.
Rumıniya Prezidenti Trayan Besesku çıxışında Azərbaycanın mövqeyini dəstəklədiyini bildirərək dedi ki, milli azlıqların hüquqlarının qorunması, bu siyasətin həyata keçirilməsi dövlətlərin ərazi bütövlüyünün pozulmasına səbəb olmamalıdır. Avropa standartlarına cavab verməyən bu cür fikirlərin səslənməsi heç bir səmərə verməyəcəkdir. Hər bir milli azlığın öz dövlətini yaratması mümkün deyil və muxtariyyət təcrübəsi vardır. Bu münaqişələr də həmin prinsiplər əsasında həll olunmalıdır.
Prezident İlham Əliyev daha sonra suallara cavabında vurğuladı ki, hazırda Ermənistan dünyada yeganə dövlətdir ki, ərazisində milli azlıqlar yoxdur, o, monodövlətdir. İki erməni dövlətinin yaradılması qeyri-mümkündür və bütün beynəlxalq hüquq normaları və prinsiplərinə, o cümlədən Avropa standartlarına uyğun deyildir, gələcək Avropa üçün böyük təhlükə mənbəyidir.
Dövlətimizin başçısı qlobal enerji məsələləri, Azərbaycanın neft-qaz siyasəti, Bakı-Tbilisi-Ceyhan və digər layihələr, habelə beynəlxalq məsələlər barədə suallara da ətraflı cavab verdi.
Forumun sonrakı iclaslarında “Şərqi Avropa - yeni hakimiyyət, köhnə qayda?” və “Yaxın Şərqdən Hindiquşa qədər - Qərb strategiyası dağılırmı?” mövzularında müzakirələr də keçirildi.
Azərbaycan bu müzakirələrdə də fəal iştirak etdi. Bununla da forumun birinci iş günü başa çatdı. Beynəlxalq forum sentyabrın 23-də öz işinə yekun vuracaqdır.